Shapita 81

Abatompa Monka Kwipaya Yesu

BUKIDI buyo, Yesu wenda upita mu kibidi kitelwa bu bukōnde bwa Solomone. I kijokoloke tempelo koku ne koku. Kuno ko kwamwela Bayuda umbukata kebamunena’mba: “Le i ku mwaka ka byo witwakamije pa mityima? Shi wi Kidishitu nankyo witusapwididile biyampe.”

“Ami nemusapwila,” ye Yesu utentulula, ino “bānwe ne kwitabija mpika.” Yesu kebalombwelepo patōkelela amba aye ye Kidishitu, pamo na mwaalombwedile mwana-mukaji mwine Samadia ku mushimwa. Ino kunena kuyampe, weyukenye paebashintulwidile amba aye i wa mu bīkalo bya mūlu ne amba wādi’ko kala ne Abalahama mwine kaikele’ko.

Yesu usaka bantu bayuke abo bene amba aye ye Kidishitu, pa kudingakanya mingilo yaingila na yoya yābadikile kunena Bible amba yo ikengilwa na Kidishitu. O mwanda wasoñenye bandi bana-babwanga baleke kusapwila muntu nansha umo amba aye ye Kidishitu. O mwanda mwine wakinenena bano Bayuda ba mityima myumu amba: “Bilongwa bino byo nonga ku lupusa lwa Tata bindyukanya. Ino kemwitabijapo.” (MB)

Mwanda waka kebetabijapo? Le i mwanda i kutupu kintu kiluji kilombola’mba Yesu i Kidishitu? Mhm, ino i pa mwanda wa buno buluji bwaleta Yesu pa kwibanena’mba: “Kemudipo mikōko yami, mhm. Monka mo nemusapwila’mba: Mikōko yami īngivwananga diwi dyami, nami neīyūkile ne kulonda īnonda. Ne būmi bwa nyeke na nyeke, ami nkeīpa’bo, ne kōneka kwine keīkōnekapo nansha patyetye pene, kadi kutupu, nansha umo, ukansompola’yo mu kuboko kwami. Ino [kimpele Tata i kintu kimo kipite bukata bintu bikwabo byonso], e po kepēkadile nansha umo wakuyūka kusompola’yo mu kuboko kwa Tata, mhm.”

Kupwa Yesu kashintulula kipwano kya mpwaninine kyapwene na Shandi, amba: “Amiwa ne Tata mwine tudi bamo bonka.” Bikidi Yesu pano pantanda ino Shandi momwa mūlu, nanshi Yesu kanenepo pa bute pa bute amba aye ne Shandi i muntu umo, nansha’mba i ngitu imo. Ino usaka kunena’mba i bamo mu mpango yabo, badi umbumo.

Bayuda pa kwivwana binenwa bya Yesu, abakalabala, kebaboya mabwe bamwipaye na mobalongele ku Masobo a Matabenakulo etwa ne bu a Bitanda. Yesu walondolola pambulwa moyo bano basaka kumwipaya’mba: “Bintu bingi bingi bīne binengele byo nemulombwele bya kudi Tata, le pa kyepi kya byobya’bya kyo musaka kungashila mabwe’kyo?”

“Ketukwashilangapo pa mwanda wa kintu kiyampe,” bo abo batentulula, “nanshi i ponka pa kutuka Leza, ne pa mwanda wa kwīdingakanya abe mwine pamo ne Leza.” Mwanda waka Bayuda abanena namino aye Yesu kwitela bu leza mpika?

I mwanda Yesu witelelanga aye mwine bukomo bobalangila’mba budi’nka na Leza kete. Kifwa, wapu’nka pano kwisambila pa “mikōko” amba “būmi bwa nyeke na nyeke, ami nkeīpa’bo,” kino i kintu kekibwanya kulonga muntu nansha umo. Ino Bayuda bapumpunya bibasapwila Yesu amba i mutambule lupusa kudi Shandi.

Penepo Yesu webepangula mwanda wa kwilombola’mba i mutyetye kudi Shandi, amba: “Le mu mukanda-wenu-wabijila [mu Mitōto 82:6] kekisonekelwemopo’mba: Ami na’mba: Mwi baleza; a? Penepo le, byo mutelangako boba bakufikilwa ne mwanda wa Leza’mba: Ke baleza. . . . Ino bānwe ke munenako mupandulwe na Shandi wamutuma panopantanda’mba: Utukanga Leza; ponka po nanena’mba: Ndi Mwan[ā] Leza?”

Abyo Bisonekwa i bitele ne batyibi bakondame bu “baleza,” le kilubo penepo i kyepi kyamona bano Bayuda kyobatopekela Yesu pa kunena kwaanena’mba “Ndi Mwan[ā] Leza”? Yesu wabweja’ko amba: “Wivwane nkīngidile Tata mīngilo nankyo kemukangitabijapo. Nanshi shi ñingile’yo kadi, nansha kemungitabijepo ami kekudi mwanda, itabijai nansha ku yoya mīngilo ne kuyūka muyūke mwitabije’mba: Tata udi [umbumo na] ami, [ami] nami [ndi umbumo na Tata].”

Yesu pa kunena namino, Bayuda kebakimbe kumukwata. Ino webanyema pamo na mwaebanyemene ku Masobo a Matabenakulo. Wataluka mu Yelusalema watabuka Munonga wa Yodano dya kwadi kubatyijijañana Yoano kepadi kintu kya myaka iná. Mobimwekela kino kifuko kekidipo kulampe na mbadi ya kunshi kwa Dijiba dya Ngadilea, padi lwendo lwa mafuku abidi nansha abidi ne kupita shi utamba mu Yelusalema.

Bantu bavule abaiya kudi Yesu ku kino kifuko kebamunena’mba: “I binebine Yoano kaubilepo kiyūkeno nansha kimo, nanshi bintu byonso bya Yoano byādi wisambila [pa] uno’u byadi bya binebine.” Enka namino, bantu bavule abaitabija mudi Yesu. Yoano 10:22-42; 4:26; 8:23, 58; Mateo 16:20.

▪ Yesu usakanga bantu bamuyuke bu Kidishitu kupityila ku bika?

▪ Yesu ne Shandi i bamo mu muswelo’ka?

▪ Mungya buluji, mwanda waka Bayuda banena’mba Yesu wifwatakenyanga bu leza?

▪ Kisonekwa kya Mitōto kyatela Yesu kilombola namani amba kedingakenyepo na Leza?