Shapita 87

Teakanya Būmi bwa Kumeso na Tunangu Tufwaninwe

YESU wapu kubanga mānga ya mwana wa kisūpa pa kibumbo pongwidile bandi bana-babwanga, basonkeji ba musonko babudimbidimbi ne bantu babipya-mambo bayukane, basonekeji ne Bafadiseo. Pano usapwila bandi bana-babwanga kyelekejo kya muntu mpeta waivwene lusango lubi lwa bintu bilongele mwingidi wandi, kalama wa njibo yandi.

Mungya mwanenena Yesu, uno mpeta waite kalama wandi kamulombola amba nsa kukutalula bu kalama. “Lelo yō! nonga namani, ke-muntu mfumwami kaumfundula mu bukalama?” ye uno kalama ulangalanga. “Ino kudima nkiyūkileko, kadi pa kulomba ke bumvu. Amba: E! nayūka mwakulongela; ebiya po nkafundulwa umbukalama, nankyo [bantu] bakansepelela mu mōbo abo.”

Le i mulangwe’ka wakwata’po uno kalama? Waite boba badi na mapu kwa mfumwandi. “Lelo wāpwile namani?” ye aye wipangula.

Umbajinji amba, ‘I malitele 2200 a māni.’

‘Yata mukanda obe wa mapu, shikata ulembe’po bukidi 1100,’ ye aye umunena.

Waipangula mukwabo amba: “Lelo nobe wāpwile namani?”

Nandi amba, ‘I malitele 22000 a nãno.’

‘Yata mukanda obe wa māpu ulembe’po 18000.’

Uno kalama udi na lupusa lwa kutyepeja lupeto lwa mfumwandi, mwanda ukidi pa kaji ka kubandaula lupeto lwa mfumwandi. Pano patyepeja lupeto, bo bulunda bwasamba na boba bakokeja kumujokejeja bintu biyampe kitatyi kyasa kujimija kaji.

Mfumwandi pa kwivwana uno mwanda, watulumuka. Penepo “wamutendela yewa kalama, wampikwa koloka, [mwanda walonga na tunangu tufwaninwe].” Ebiya Yesu wabweja’ko amba: “Nanshi bāna ba [ino ngikadilo ya bintu] bakidile kudyumuka bāna ba mu dyuba mwendela lukongo lwabo.”

Pano Yesu waleta bufundiji kudi bandi bana-babwanga, webakankamika’mba: “Kasambei bulunda bwa konka ku lupeto lwa bukondame, nalo pa kwimupwa, abo bakemusepelela mu bishikato bya nyeke.”

Yesu watendela uno kalama pangala pa tunangu tufwaninwe twa kwalwila’ko kwitengeleja, ke pa mwandapo wa kubulwa koloka kwandi, ehe. Pavule ‘bāna ba ino ngikadilo ya bintu’ bengidijanga lupeto lwabo nansha bitenta byabo na budyumuku, basamba bulunda na bantu bakokeja kwibajokejeja bintu biyampe. O mwanda bengidi ba Leza, “bāna ba mu dyuba” nabo bafwaninwe kwingidija bintu byabo bya kungitu, lwabo “lupeto lwa bukondame” na tunangu mwa kukamwena’mo biyampe.

Luno lupeto bafwaninwe kusamba nalo bulunda na boba bakokeja kwibatambula mu “bishikato bya nyeke,” pamo na munenena Yesu. Ku boba ba mu kaluombe katyetye, bino bishikato bidi mūlu; ino ku “mikōko mikwabo,” bishikato bidi mu Paladisa pano pantanda. Eyo, i Yehova Leza ne wandi Mwana kete bo bakokeja kutambula bantu mu bino bishikato, nanshi tufwaninwe kwikala na kininga kya kusamba nabo bulunda na “lupeto lwa bukondame” lo-lonso lotudi nalo, kukwatakanya nalo tumweno twa Bulopwe. Ebiya popa pakapwa lupeto lwa kungitu nansha polukasupakana, nalo byokelwijanga kusupakana, būmi bwetu bwa kumeso bukekala bwituteakanibwe senene.

Yesu wanena monka’mba, bantu babinebine mu bino bintu bya kungitu, bintu bityetye, bakekala monka babinebine ne mu bintu bikatakata. “Nanshi,” ye aye ukinena, ‘shi umbulwe kwikala babinebine mu myanda itala lupeto lwa bukondame, lelo i ani kadi ukemukulupila emupe lwabine [ko kunena’mba tumweno twa kumushipiditu, twa Bulopwe]? Kadi lelo shi mu bintu bya bakwenu [tumweno twa Bulopwe tupāna Leza ku bengidi bandi] umbulwe kwikala babinebine, lelo i ani ukemupa bya bānwe bene [mpalo ya būmi mu bishikato byanyeke]?’

Ketukokejapo kwikala bengidi babine ba Leza kadi koku twikele bapika ba lupeto lwa bukondame, lupeto lwa kungitu, enka na mufudijija Yesu amba: “Nansha umo mupika ayūke kwingidila bamfumwandi babidi, mhm, kabulwe padi, washikwako umo, wasanswa umo, walamata umo, walamuka umo. Nanshi bānwe kemukiswai kwingidila Leza ne kwingidila lupeto pamo, mhm.” Luka 15:1, 2; 16:1-13; Yoano 10:16.

▪ Kalama wa mu kyelekejo kya Yesu wasamba bulunda namani na bantu bakokeja kumukwasha mwenda mafuku?

▪ “Lupeto lwa bukondame” i bika, ne tukokeja kusamba nalo bulunda na bantu namani?

▪ I bāni bakokeja kwitusepelela mu “bishikato bya nyeke,” ne bino bishikato bine i bishikato’ka?