Shapita 89

Mwingilo wa Kulombola Lusa mu Yudea

MAYENGA matyetye kunyuma, Bayuda baswile kwipaya Yesu ku Masobo a Kufikijija adīlwe mu Yelusalema. O mwanda waendele kungala, kubwipi na Dijiba dya Ngadilea.

Pano waenda dya kunshi ku Yelusalema, wenda usapula mu bibundi bikunkuja dishinda dya mu Pelea, mu bulolo bwa kutunduka kwa Munonga wa Yodano. Wapu kuleta kyelekejo kya mpeta ne Lazalasa, kaendelela na kufundija bandi bana-babwanga bintu byaebafundije kala pobadi mu Ngadilea.

Kifwa, unena’mba, i kipite buya ku muntu “shi kidibwe kya kupela bukula kyamukutyilwe mwishingo bamwela pa mema a dijiba dya kalunga” kupita’ko kukukaja kamo ka mu “totwa tutyetye” twa Leza. Watenga ne myanda ya kwilekela mambo, amba: “Shi [mwanenu] akupye difuku dimo mambo asamba-abidi ino ālukile kobe pasamba-pabidi’mba: Nēsasapo; nankyo ukamulekela’o.”

Bana-babwanga pa kulomba’mba, “Betuvudijijeko lwitabijo,” Yesu walondolola’mba: “Shi bānwe mwadi ne lwitabijo pamo [bwa] kaseke ka kadadi, longa nankyo mukanena uno mutyi wa kikuyu’mba: Jukapo ukēkune pa mema a kalunga, nankyo nao ukemukōkela.” Nanshi lwitabijo nansha i lutyetye, lukokeja kulonga bintu bikatampe.

Kupwa, Yesu kasekununa mwanda umonwanga nyeke umbūmi ulombola mwikadilo usakwa ku mwingidi wa Leza mwinē bukomo bonso. “Le wa kwenu i ani, udi ne mupika wa kudima, nansha wakukumba banyema,” ye Yesu unena, “ino pa kujoka ku budimi amunene’mba: Shikata udye? [Mwene] ubadikila kumunena’mba: Unongolwele bidibwa byami bya kyolwa, winingijeko ungilaīja poso nadī, natome, ebyobiya nobe kokadī, kokatome? Lelo umufwijako pa kumulongela byāmutumine a? Mhm. Ino ne bānwe i pamo’nka namino po mukalonga byonso bya kwimutumwa [m]ukanena’mba: Bātwe tudi bapika ba bitupu, ne kyo twaubile twaubile mu bupika monka.” Nanshi bengidi ba Leza kebafwaninwepo kwilangila bu balongelanga Leza kintu kikatakata pobamwingidilanga. Ino kintu kyobafwaninwe kuvuluka nyeke i madyese obapelwe a kumutōta bu ba mu njibo yandi bakulupilwe.

Mobimwekela, i kinondanonda’tu na papwile Yesu kuleta kino kyelekejo, mukendi umo wafika. Utuminwe na Madia ne Mata, banababo na Lazalasa bekalanga mu Betani wa mu Yudea. “Abe Mfumwetu, kuno, yo-o! uno ōsenswe byamalwa wabela,” ye mukendi usapula.

Yesu walondolola’mba: “Luno luba kelwalufupo, mhm, nanshi i lwa ntumbo ya Leza’mba, Mwan[ā] Leza atumbijibwe ntumbo ponka.” Kupwa kulāla mafuku abidi kuno kwadi, Yesu wanena bandi bana-babwanga’mba: “Twitolelei bidi konka ku Yudea dikwabo.” Ino abo abamuvuluja’mba: “Mhm! Mufundiji, panopano ponka pasakile [Bayuda] kukwasa mabwe, kadi witolele konka?”

“Le mu dyuba dimo kemudipo sā dikumi ne īnga? ne ībidi?” ye Yesu ulondolola bwa aye wipangula. “Ino shi muntu asake kunanga mwinya, nabya kakukalapo mhm, mwanda umwene na mwinya wa [ino n]tanda. Nanshi yewa usaka kunanga bufuku, nankyo aye ukakukala, ke-muntu mudi aye mwinya mutupu’o.”

Mobimwekela, Yesu usaka kunena’mba ‘nsaa ya mwinya,’ kitatyi kilekele Leza bu kya mwingilo wa Yesu pano pantanda, keyapwile, kadi kufika ne poikapwa, kekudipo muntu ukokeja kumusanshija. Usaka kwingila mu kino kitatyi kityetye kyonso kimushadile ku “mwinya,” mwanda pokisaka kupwa, “bufuku” busa kwila pasa kumwipaya balwana nandi.

Yesu wabweja’ko amba: “Mukwetu Lazalasa walāla mu tulo, ino ami ke ñenda konka nkamulangule.”

Bana-babwanga abakulupila amba, Lazalasa byalēle ukōkolokwa, i kintu kiyampe kilombola’mba usa kukoma, abalondolola’mba: “Abe Mfumwetu, ēkale ulēle mu tulo nabya ukapandanga.”

Papo Yesu webasapwila patōkelela’mba: “Lazalasa wafu. Ino ami nasepelela byo nkitēnweko, mwanda wa bānwe mukētabije, ino pano twayai kwādi.”

Tomase walanga’mba Yesu wakepaibwa mu Yudea, papo ukanina kukamwitabila, wakankamika bakwabo bana-babwanga’mba: “Twendei nanshi ne bātwe bene tukafwei nandi pamo.” Bana-babwanga abakatwala Yesu ku uno mwingilo wa kulombola lusa mu Yudea, kuyuka bayukile’tu amba abatūla būmi bwabo mu kyaka. Luka 13:22; 17:1-10; Yoano 10:22, 31, 40-42; 11:1-16.

▪ I kwepi kusapula Yesu pano?

▪ I bufundiji’ka bwapituluka’mo Yesu, ne i mwanda’ka umonwanga nyeke umbūmi wasekununa Yesu, weuleta mwanda wa kulombola kika?

▪ I musapu’ka watambula Yesu, ne i kika kyasaka kunena pa kutela bishima “mwinya” ne “bufuku”?

▪ Tomase usaka kunena bika pa kunena’mba, ‘Twendei nanshi tukafwei nandi pamo’?