Shapita 92

Kupwibwa kwa Bamakopo Dikumi mu Lwendo lwa Yesu lwa Mfulo ku Yelusalema

YESU wakalakanya bukomo bwa Sanhedrini bwa kusaka kumwipaya pa kutaluka’ye mu Yelusalema kaenda mu kibundi kya Efelaimi, bimweka bu kidi kubwipi kwa makilometele 25 mu bwikike bwa kungala ne kutunduka kwa Yelusalema. Washikata kwine’ko na bandi bana-babwanga, kulampe na balwana nandi.

Inoko Pashika ya 33 K.K. keidi pabwipi, Yesu wataluka kadi kaenda. Wapite mu Samadia kalunguluka mu Ngadilea. Buno bo bupempudi bwandi bwa mfulo mu uno mwaba kumeso kwa lufu lwandi. Bimweka bu pano pobakidi mu Ngadilea, abatwela mu mulongo wa bakwabo benda ku Yelusalema kukavulukilwa Pashika. Abalonda dishinda dipityila mu bulolo bwa Pelea, kutunduka kwa Munonga wa Yodano.

Abo bataluka kebenda, bakitwela’tu mu kibundi kimo nenki, shi mu Samadia, shi mu Ngadilea, Yesu wesambakana’mo na bana-balume dikumi babela makopo. Luno luba lukomo ludyanga bityebitye bipindi bya ngitu ya muntu—minwe, maná, matwi, mulu ne milomo. Pa kutyina’mba lwakasambukila bakwabo, Bijila bya Leza binena muntu wamakopo’mba: “Ukaputa ku mulomo wa kūlu, kaela mbila’mba: Ne musubile, ne musubile. Enka nankyo mafuku onsololo a luba ludi mwandi ukekalanga musubile. . . . Ukekalanga [mwitolwele pa] kasuku kandi.”

Bano bamakopo dikumi abalonda Bijila byobajidikilwe, abaimanina kulampe na Yesu. Bela lubila na mawi matunduke amba: “Abe Yesu Mfumwetu, witufwileko lusa.”

Yesu pa kwibamona kulampe, webanena’mba: “Endai mu kēlombole kudi ba[bitobo].” Yesu webanena namino mwanda Bijila bya Leza i bipe babitobo lupusa lwa kunena’mba bakansangwa badi babela makopo abapwibwa misongo yabo. Wivwane banenwe namino, kubapu abapebwa lupusa lwa kushikata kadi pamo na bantu bakomo.

Bano bamakopo dikumi i bakulupile bukomo bwa Yesu bwaenda ulonga nabo bingelengele. Abataluka lubilo kebenda kukamona babitobo, nansha byokebabelukile. Abo bakidi mu dishinda, lwitabijo lwabo mudi Yesu lubapalwa mpalo. Abashilula kwimona ne kwiivwana bu abapwibwa!

Bamo kitema mu bano bapwibwa makopo abalunguluka na lwendo lwabo, ino umo, mwine Samadia, wajoka kukakimba Yesu. Mwanda waka? Mwanda wa kumufwija’ko na bino byamupityila. Katendela Leza na diwi dikatampe; pa kwitana na Yesu, wafukata ku maulu andi kamufwija’ko.

Yesu nandi kishima tentu amba: “Lelo ke dikumi dyo mwapwibwa? Ino kitema badi kwepi? Nanshi bakujoka kutumbija Leza ntumbo kutupu’bo enka uno, nandi i mweni.”

Kupwa wasapwila uno mwana-mulume mwine Samadia amba: “Taluka wende lwitabijo lobe lubakupandija.”

Potutanga ino myanda ya Yesu wabelula bamakopo dikumi, tufwaninwe kuta mutyima ku bufundiji buselele kino kyandi kipangujo: “Ino kitema badi kwepi?” Kubulwa kufwija’ko kwādi na boba bantu kitema i kilubo kikatampe. Lelo twabulwapo netu kwikala na mutyima wa kufwija’ko, pamo bwa mwine Samadia, pa mwanda wa bintu byotutambula kudi Leza, kutentekela’po mulao wa kukekala na būmi bwanyeke mu ntanda impya ya Leza mukekalanga boloke? Yoano 11:54, 55; Luka 17:11-19; Levi 13:16, 17, 45, 46; Kusokwelwa 21:3, 4.

▪ I muswelo’ka wakalakanya Yesu bukomo bwa kusaka kumwipaya?

▪ Kupwa Yesu waenda kwepi, ne kwasaka kufika kwine i kwepi?

▪ Mwanda waka bamakopo abaimanina kulampe, ne mwanda waka Yesu webanena kwenda kukamona babitobo?

▪ I bufundiji’ka botufwaninwe kuboila pa uno mwanda?