Shapita 94

Mvubu ya Milombelo ne Kwityepeja

MAFUKU a kunyuma, pakidi Yesu mu Yudea, waletele kyelekejo kilombola mvubu ya kwipāna mu milombelo. Mu luno lwendo lwandi lwa mfulo lwaenda ku Yelusalema, wakome monka mvubu ya kulombela pampikwa kukōka. Dimodimo Yesu ukidi mu Samadia nansha mu Ngadilea pano paleta kino kyelekejo kikwabo kudi bandi bana-babwanga, amba:

“Mwadi mwikele mu kibundi kimo mutyibi wadi wakubulwa kutyina Leza, nansha kulemeka muntu mpika. Ebiya mwadi mwikele mukaja-mufu monka mu kyokya kibundi aye waendele kwādi’mba: Banketeleko ano mambo ne o twikendanga nandi? Nan[d]i wapelele kitatyi kīne, ebiya kanena munda mwandi’mba: Ami nansha byo nkityina Leza, ne muntu kadi, nkilemeka. Ino nanshi uno mukaja-mufu wiya kumpuñanya, nanshi longa nkamuketele nsambu, mwanda wakunena’mba pa kwiyaiya nyeke umpuñanya, mutyima ke umfīta.”

Kupwa Yesu waleta bufundiji bwine bwa mānga yandi, amba: “Ivwanapo bidi, kyānenene yewa mutyibi wampikwa koloka. Ino Leza aye i namani, abulwe kukaketela nsambu bandi batonge, boba bamwitaita nyeke, dyuba ne bufuku, nansha kudi abo i wa kuleñanya bidi?”

Yesu kasakepo kunena’mba Yehova Leza udi pamo bwa uno mutyibi wampikwa boloke, mhm. Ino usaka kunena’mba, shi mutyibi wampikwa boloke ulondolola ku byobamulomba bukīle bukya, mwene Leza po pene, aye moloke kadi muyampe, ukalondolola shi bantu bandi balombela pampikwa kukōka. O mwanda Yesu waendelela’mba: “Nemunena’mba: [Leza] ukebaketelanga nsambu bukidi bukidi bonka.”

Misunsa mivule, batupwaipwai ne balanda bo baponejibwanga, ino bamfumu ne bampeta babingijibwa. Ino Leza aye kakasakepo’nka bantu babi bapebwe mfuto kubapu, ino kadi ukemanina bintu byonso mwanda wa bengidi bandi bekale kubingijibwa ne kupebwa būmi bwanyeke. Ino i bantu banga bakulupile na mutyima umo amba Leza ukatyibijanga nsambu bukidibukidi?

Yesu ulombola nakampata mwimanine lwitabijo pa bukomo bwa milombelo, waipangula’mba: “Mwanā muntu pa kwiya lelo ukatāna lwitabijo panopantanda’ni?” Nansha kino kipangujo byokishele kyampikwa kulondololwa, inoko mulangwe udi’po i wa amba lwitabijo lwa uno muswelo kelukekalapo na bavule pakāya Kidishitu na bukomo mu Bulopwe.

Mu bantu bevwana Yesu, bamo bemwene abo bene amba badi na lwitabijo. Bekulupile abo bene amba i boloke, bela bakwabo mwenji. Kepabulwe padi ne bana-babwanga ba Yesu bamobamo babadilwa mu kino kisumpi. O mwanda Yesu webape’po kino kyelekejo kilonda’ko amba:

“Bāna-balume [babidi] bakandile mu njibo ya Leza kulombela, au muFadiseo, mukwabo usonkeja-musonko. Kūmvwana kudi muFadiseo kwimana bunka, kalombela’mba: Abe Leza, nakufwijapo byo nkīfwenepo pamo ne bangi basompola byakusompola, nansha na bakubulwa koloka, nansha na bamakoji, nansha pamo ne uno usonkeja-musonko uno’u, mhm. Kadi ami nshikilwanga ne nzala ku yenga mafuku abidi, ku yenga mafuku abidi, kadi kulambula nako nambulanga byakujikija ku dikumi bya byonso byo mpetele.”

Bafadiseo i bayukane mwanda wa kwimwekeja kwabo kobemwekejanga ku bantu bu boloke. Mafuku obetungīle a kushikilwa na nzala i dya Mwanzo ne dya Buná, kadi batūlanga kya kujikija ku dikumi nansha ke tubidimibwa tutyetye namani twa umbudimi. Myeji mityetye kunyuma, mwenji obelele bantu bitupu wamwekele patōka ku Masobo a Matabenakulo kobanene amba: “Kino kibumbo kyampikwa kuyūka mukanda-wabijila [ko kunena’mba, nshintulwilo youshintululwa na Bafadiseo] i kifingwe mafingo.”

Yesu ukyendelela na kyelekejo kyandi, wesambila padi umo wa mu kibumbo “kifingwe” amba: “Ino usonkeja-musonko waimene kulampe, kasakilepo kutalula nansha meso kūlu, ino kēpapa ponka pa mutyima’mba: Abe Leza, bamfwile lusa, ami kipya-mambo.” Uno musonkeji wa musonko mwityepeje wiyukile bilubo byandi, o mwanda Yesu wanena’mba: “Nemusapwila’mba: Uno waendele ku njibo yandi mupebwe nsambu, ino mukwabo, mhm. Mwanda yewa wakwilemeka aye mwine ukapelulwa, kadi wakwipeleka aye mwine ukalemekwa.”

I bine, Yesu wakokela monka milangwe pa mvubu ya kuyuka kwityepeja. Bana-babwanga ba Yesu i batamine mu ludindi mutumbile Bafadiseo bemona bu boloke, mufwilwa lupusa, bitenta ne ludingo, nanshi ke kya kutulumukapo pa kwibamona ne abo nabo batengwe na uno mushipiditu. Bine, buno bufundiji bwa Yesu bwa kwityepeja i bulumbuluke kashāa! Luka 18:1-14; Yoano 7:49.

▪ Mwanda waka mutyibi wampikwa boloke waitabija byalomba mukaji wa kishala, ne i bufundiji’ka budi mu kino kyelekejo kya Yesu?

▪ I lwitabijo’ka lukakimba Yesu kitatyi kyakāya?

▪ Yesu wape bāni kyelekejo kya Mufadiseo ne musonkeji wa musonko?

▪ I ngikadilo’ka ya Bafadiseo ifwaninwe kwepukwa?