Shapita 100

Kyelekejo kya Mina

PADI Yesu ukidi ku njibo ya Zakiasa, kwaeshinkija mwa kwendela ku Yelusalema. Bandi bana-babwanga bakulupile amba, shi abafika mu Yelusalema, Yesu usa kwielela mbila’mba i Meshiasa, ashimike ne Bulopwe bwandi. Ino pa kusaka kulemununa uno mulangwe ne kulombola’mba Bulopwe bukidi kulampe, Yesu waleta’po kyelekejo.

“Kwadi muntu umo wabutwilwe ku kisaka kya bulopwe,” ye aye usekununa, “waendele ku ntanda ya kulampe kukabikikwa bulopwe penepa kajokela kwandi.” (MB) Uno “muntu wabutwile ku kisaka kya bulopwe” i Yesu, “ntanda ya kulampe” i mūlu. Pakafika’mo Yesu, Shandi ukamubikika.

Inoko kumeso kwa kutaluka, muntu wabutwilwe ku kisaka kya bulopwe waite bapika dikumi, webape umo ne umo mina ya ndalama, amba: “Kasungululeimo poso ami njoke.” Mu kufikidila kutyetye, bano bapika dikumi belekejanga bana-babwanga babajinji ba Yesu. Ino mu kufikidila kukatampe, bafunkilanga pa bantu bonso batengele kukekala bampyana pamo nandi mu Bulopwe bwa mūlu.

Mina ya ndalama i bityele bya lupeto lulēme, kimo ne kimo i kifikile pa mfutwa ya myeji isatu ipebwanga kidimye udimina muntu. Le mina yelekejanga bika? Ne busunga bwine busa kukesungulula nayo bapika i busunga’ka?

Mina yelekejanga bintu bipelwe bana-babwanga bashingwe māni a mushipiditu bya kwingidija mwa kulupwila’ko bampyana ba Bulopwe bwa mūlu bavulevule, kufika ne pakāya Yesu bu Mulopwe mu Bulopwe bulailwe. Kupwa kwa kusangulwa kwa Yesu ne kwimwekeja kwandi kudi bandi bana-babwanga, wēbapele mina ya kyelekejo ya kulonga nayo bana-babwanga bavulevule ba kubwanya ku kabumbo kakabikala Bulopwe bwa mūlu.

“Ino,” ye Yesu ukinena, “bantu ba kibundi kyandi badi bamushikwe [muntu mubutulwe ku kisaka kya bulopwe], ke batume mikendi kumulonda’mba: Ketumuswele uno etubikadile bulopwe, mhm.” Bantu ba kibundi i bene Isalela, Bayuda, kutalula’mo bandi bana-babwanga. Yesu pa kwenda mūlu, bano Bayuda bēlombwele na kupangapanga bandi bana-babwanga’mba kebāmusakilepo ekale mulopwe wabo. Mu uno muswelo, bāikele na bilongwa bidi pamo bwa bya bantu ba kibundi bādi batuma mikendi.

Lelo bapika dikumi basa kwingidija mina yabo namani? Yesu ushintulula’mba: “Ebiya byo kwadi nabya, ino pājokele kwakamwene bulopwe, watumenye kwita boba bapika bāye kwādi, boba bashīdile lupeto, amba ayūke ne mo basungulwilamo. Ebiya mubajinji kufwena’mba: Abe mfumwami, lupeto lobe [mina, BB] luno lubasungulula dikumi. Ino kwivwana padi aye’mba: Ubanengeja abe mupika muyampe, byo wadi utūkenye mu tutyetye, nanshi ukēkalanga wa lupusa lwa bibundi dikumi. Ebiya kūmvwana wa bubidi aye’mba: Abe mfumwami, lupeto [mina, BB] lobe luno lubasungulula ītano mikwabo. Ponkapo wamunena’mba: Abe nobe ukēkalanga wa lupusa lwa bibundi bitano.”

Umpika wa mina dikumi ufunkilanga pa kabumbo, kakisumpi ka bana-babwanga ba tamba pa Pentekosa 33 K.K. kufika ne dyalelo, kubadila’mo ne batumibwa. Umpika wasokwele mina itano nandi welekejanga kisumpi kya bantu ba kitatyi kimo kyonka bavudijanga bintu bya mulopwe byobadi nabyo pano pantanda, mungya mikenga ne bukomo bwabo. Bino bisumpi byonso bisapulanga myanda miyampe na bupyasakane, o mwanda bantu bavule ba mityima myoloke bekalanga ke bene Kidishitu. Bapika kitema abasungulula byabusunga byabo senene, abavudija bintu byobebapele.

“Ebiya,” ye Yesu ukyendelela, “ungi’mba: Abe mfumwami, talapo bidi lupeto [mina, BB] lobe lo nabīkile biyampe mu kakipeta. Ino nakutyinine moyo ke-wi-muntu abewa ukola, utekunanga kyo kutūdile, kadi wangulanga byo kukushile. Ebiya wamunena’mba: Abe mupika mubi, nanshi nkakuketela mambo mu kyakanwa kya abe mwine. Ino wandyukile byo ndi mukole, ntekune kyo nkitūdile? kadi ñangula byo nkikushile. Lelo i mwanda ka? o kwatūdile lupeto lwami ku bakwilusungulula, longa ami pa kwiya natēnemo ne lukwabopo. Ebiya kanena bemene ponka’mba: Mu[yat]ei lupeto [mina, BB] mupane’lo ku yeu udi ne dikumi.”

Kuyatwa mina ya kyelekejo kwa uno umpika umbi, i kuyatwa kyaba mu Bulopwe bwa mūlu. Bine, wayatwa madyese a kukabikala pa bibundi dikumi nansha pa bibundi bitano. Yuka kadi amba, uno umpika ketyilwepo bu mubi pa mwanda wa bubi kampanda bwalongele, mhm, ino i pa mwanda wa kubulwa kusungulula bupeta bwa bulopwe bwa mfumwandi.

Ayo mina imo yadi ya umpika mubi ipebwa umpika umbajinji, pabalupuka lupotopoto, amba: “Mfumwami [yao] udi ne mpeto [mina, BB] dikumi.” Ino Yesu wamulondolola’mba: “Bonso badi nabyo bakapebwa, ino wakubulwa’byo, nanshi ukanyongololwa ne kyādi nakyo. Ino boba bakushikwa ami, ne kebanswele ku mbikika umbulopwe bwabo mwibaletei pano mwibēpaye ku meso ami.” Luka 19:11-27; Mateo 28:19, 20.

▪ I kika kyalengeja Yesu alete kyelekejo kya mina?

▪ Muntu wabutwilwe ku kisaka kya bulopwe i ani, ne i ku ntanda’ka kwaendele?

▪ Bapika i bāni, ne mina yelekejanga bika?

▪ Bantu ba kibundi i bāni, ne abalombola mushikwa wabo namani?

▪ Mwanda waka umpika umo witwa bu mubi, ne kujimija kwandi kwa mina kushintulula bika?