Shapita 102
Kidishitu Watwela mu Yelusalema na Ntumbo
BUBAKI lubanga mu dya Yenga, mafuku 9 a Nisane, Yesu wataluka mu Betani ne bandi bana-babwanga kaenda mu Yelusalema ku Lūlu lwa Impafu. Kebejijepo, abafika kubwipi na Befaji, ku Lūlu lwa Impafu. Yesu wasoñanya bandi bana-babwanga babidi amba:
“Pitailai mu kyokya kibundi kidi kampalampala na kino, namo pa kufikamo’tu kala, musa kumona kimbulu kikutyile, ne mwana wakyo ponka, mukutulule’kyo mundetele pano. Kadi shi kudi muntu wakemunena, nankyo nenu mutentulule’mba: I Mfumwetu udi ne ky[a]ekisakila, ponkapo kala nandi ukebituma.”
Nansha bana-babwanga byobakomenwa kujingulula dibajinji amba ino misoñanya iyafikidija bupolofeto bwa Bible, ino basa kuyuka mwenda kitatyi amba iyafikidija’bo. Mupolofeto Zekadia wānene’kyo kala, amba Mulopwe ulailwe wa kubikikwa na Leza ukatwela mu Yelusalema utentamine pa kimbulu, bine, “ke pa mwana kimbulu kadi, mwana kimbulu kikaji.” Mulopwe Solomone nandi wātentamine pa kyana kya kimbulu paādi wenda kukashingwa māmi.
Bana-babwanga pa kufika ku Befaji, kebasela kyana kya kimbulu ne inakyo, bantu badi kubwipi kebebanena’mba: “Le bika byo mulonga nankyo”? Ino pa kwibasapwila’mba bano banyema baselelwa Mfumwetu, bantu abaleka bana-babwanga baselele’bo Yesu. Bana-babwanga abaala mitwelo yabo pa kimbulu ne pa kana kakyo, ino Yesu wakanda pa kana ka kimbulu.
Aye Yesu wenda ufwena ku Yelusalema, kibumbo nakyo kyenda kivudila’ko. Bantu bavule benda bala mitwelo yabo ya pangala mu dishinda, bakwabo benda batyumuna mitabi ya mityi bala’yo. “Keye wadyese ne dyesepo! Mulopwe wa kwiya mu dijina dya Yehova,” bo abo batūta byungwe. “Mūlu mwikale ndoe, shē! ntumbo kadi īkale mūlu mwine.”
Bafadiseo besobele mu kibumbo abafītwa pa kwivwana bino byungwe, kebeuningila Yesu amba: “Abe Mufundiji, bāna-bobe-babwanga wibakandepo.” Ino Yesu webatentulula’mba: “Nemusapwila’mba: Shi abo batalalepo, nankyo mabwe akaningija diwi.”
Yesu pa kulumba ku Yelusalema, wamone kino kibundi kaekitompwela, amba: “Yō! Yō! shi wayūkile abewa mu dino dyuba byobya bilemenena ku ndoe yobe! Nanshi pano, yō! bibakufībwa mu meso obe.” Bine, Yelusalema usa kufuta mambo apile a kubulwa kikōkeji kwandi, na munenena Yesu amba:
“Bakukushikwa [bene Loma bendejibwa na Mudyavita Titus] bakakukolela mu mpembwe bakakujokoloke, ne ku mitamba yonso bakakujikile monka. Ebiya bakakusala ne bāna bobe bōdi nabo monka, kadi kebakakulekela[po] nansha dibwe ditentakene ku dibwe dikwabo.” Kuno konakanibwa kwa Yelusalema kwanena Yesu kusa kufikidila kupwa kwa myaka 37, mu mwaka wa 70 K.K.
Mayenga matyetye kunyuma, bavule mu kino kibumbo bamwene Yesu usangula Lazalasa. Ne pano bakisapwila bakwabo myanda ya kino kingelengele. O mwanda Yesu pa kutwela mu Yelusalema, kibundi kyonso kibaimana nteitei. “Lelo i ani nandi, uno’le?” bo bantu basaka kuyuka. Bibumbo papo kebibasapwila’mba: “Uno i Yesu mupolofeto, mwine Nazala mu Ngadilea.” Bafadiseo pa kumona byonso bino, abakomenwa kya kulonga, kebatompola’mba: ‘Ntanda ibamulonda aye.’
Yesu waenda kukafundija ku tempelo, mwalongelanga nyeke shi wafika mu Yelusalema. Kwine’ko bampofu ne balemane abaiya kwadi, nandi webabelula! Babitobo bakatampe ne basonekeji abakalabala pa kumona bintu byakutendelwa byalonga, ne pa kwivwana banuke batūta byungwe mu tempelo amba, ‘Witukūle’po, tubakwisāshila, a Mwanā Davida!’ “Lelo ubaivwana mo banenena’ni?” bo abo bafuna.
“Ñimvwene!” ye Yesu utentulula. “Le kasha kemwatangilepo Kisonekwa kinena’mba: ‘Ubatambija mitendelo mu byakanwa bya banuke ne mu bya twana twa lukeke,’ a?” (MB)
Yesu ukifundija, koku utala bintu byonso bidi mu tempelo. Kyolwa kibaoloba. Wataluka ne bano 12 kajokela ku Betani, padi kintu kya makilometele asatu. Kwine’ko wekulāla bufuku bwa mu dya Yenga, mobimwekela udi kwa mulunda nandi Lazalasa. Mateo 21:1-11, 14-17; Mako 11:1-11; Luka 19:29-44; Yoano 12:12-19; Zekadia 9:9.
▪ I kitatyi’ka ne i muswelo’ka watwela Yesu mu Yelusalema bu Mulopwe?
▪ Bibumbo bibatendela Yesu, kino kidi na mvubu’ka?
▪ Yesu waivwana namani pa kumona Yelusalema, ne i bupolofeto’ka bwaanena?
▪ I bika byalongeka paenda Yesu ku tempelo?