Shapita 104

Diwi dya Leza Dibaivwanikwa Musunsa wa Busatu

YESU ukidi ku tempelo, ulwa na milangwe ya lufu lwasa kufwa panopano. Kyalanga bininge i muswelo usa kutengwa ntumbo ya Shandi, o mwanda walombela’mba: “Abe Tata, tumbija dijina dyobe.”

Amba bevwane, diwi dya bukomo dibatambe mūlu, kedinena’mba: “Kutumbija napu kwiditumbija, ne pano pene nkeditumbijanga dikwabo.”

Kibumbo kimene koku na koku kibapuakana’po. Bamo amba: “I mwikeulu wēsamba nandi.” Bakwabo amba i mikungulo. Ino aye i Yehova Leza unene! Uno ke musunsa umbajinjipo waivwanikwa diwi dya Leza pa mwanda wa Yesu.

Myaka isatu ne kipindi kunyuma, pa kubatyijibwa kwa Yesu, Yoano Mubatyiji waivwene Leza wisambila padi Yesu amba: “Uno nandi i wami Mwana wakuswedibwa o ntōkelwa pa mutyima.” Kadi, paalamukile Yesu kaeñenya pa kupwa kwa Pashika wapityile, ba Yakoba, Yoano ne Petelo baivwene Leza unena’mba: “Uno i wami Mwana o nsenswe, untōkele mutyima, mwikale kumwivwana.” Pano kadi diwi dya Leza dibaivwanikwa monka na bantu musunsa wa busatu, mu mafuku 10 a Nisane, mafuku aná kumeso kwa lufu lwa Yesu. Pano Yehova wanena mwanda wa milwi ne milwi ya bantu ivwane!

Yesu washintulula’mba: “Dino diwi kedīlepo amiwa, mhm, nanshi i pa wenu mwanda o dyaīla.” Dibaleta bukamoni amba binebine Yesu i Meshiasa wālailwe, Mwanā Leza. “Pano po pa kidye kya kutyibwa mambo a [ino n]tanda,” ye Yesu ukinena, “ino panopano ponka pano mwine mulopwe wa [ino ntanda usa kwelwa panja].” Būmi bwa kikōkeji bwa Yesu bubalombola’mba Satana Dyabola mulopwe wa ntanda, ufwaninwe “kwelwa panja,” kwipaibwa.

Papo Yesu wisambila pa bintu bisa kulupulwa na lufu lwandi lwafwena’lu, amba: “Ino ami nami shi naimikwa panshi, nankyo nkakokela bonso kudi ami mwine.” Lufu lwandi ke kushindwapo, mwanda i kupityila ku alo kwakakokela bantu bakwabo kwadi mwa kukaloelelwa’bo mu būmi bwanyeke.

Ino kibumbo kibamupatanya’mba: “Twaivwene mu mukanda-wabijila’mba: Kidishitu usa kwikala myaka yonso nyeke ne nyeke. Ino papo pene kadi i kika kyōnenena’mba: Poso Mwanā muntu ēmīkwe bidi. Le Mwanā muntu’o i ani le?”

Bantu bavule, nansha byobamona bilomboji byonso, kubadila’mo ne diwi dya Leza dyobaivwana, kebetabijepo amba Yesu ye Meshiasa wālailwe, Mwana wabine wa muntu. Ino Yesu wetela monka bu “mwinya,” mwaetelele myeji isamba kunyuma pa Masobo a Matabenakulo, wakankamika ne bemvwaniki bandi amba: “Ponka pano po mukidi na mwinya itabijai ku mwinya, mwanda wa kunena’mba mwalamuke ke mudi bāna ba mwinya.” Yesu upwa’tu kunena bino bintu, wataluka, wakafyama, mwanda būmi bwandi pano kebudi mu kyaka.

Kubulwa lwitabijo mudi Yesu kwa Bayuda kubafikidija binenwa bya Isaya bisambila pa ‘meso a bantu mapūtwe ne mityima yabo myumijibwe, kutyina’mba bakālamuka kebondapibwa.’ Isaya wāmwene bipango bya mūlu bya Yehova mu kimonwa, ne Yesu monka paādi ukidi mu ntumbo pamo na Yehova kumeso kwa kwiya’ye pano pantanda. Ino Bayuda abafikidija byāsonekele Isaya pa kupela na mutyima umo bilomboji bilombola’mba uno ye Munyongolodi wabo Mwine wālailwe.

Ku mutamba mukwabo, bantu bavule, ne baludiki bamo (ba mu kidye kikatampe kya Bayuda, kitelwa bu Sanhedrini) nabo abaitabija Yesu. Nikodema ne Yosefa mwine Adimatea i bamo ba mu bano baludiki. Inoko pano, baludiki abakomenwa kulombola lwitabijo lwabo patōka, batyina kutalulwa pa bitenta byabo mu shinakoka. Bine abebudija bintu bivule!

Yesu wanena kadi amba: “Wivwane yewa wakungitabija nabya kangitabijepo ami, mhm, nanshi waitabija kudi yewa wauntuma. Ino wakumona ami uno, nankyo wamone ne wauntuma. . . . Ino wivwane muntu wakwivwana īno myanda yami ne kwitabija’yo mpika, nankyo amiwa nkim[wimukijapo], mhm, mwanda amiwa nkiīdile [kwimukija n]tanda ehe, poso ne[i]pandije [n]tanda. . . . Mwanda o nanenene o onka ukamutyibila mambo mu dyodya difuku dya kumfulo.”

Buswe buswele Yehova ntanda ya bantu bo bumutonwene atume Yesu amba boba bamwitabija bapandijibwe. Ino bantu bakapandanga enka shi i basumininwe kukōkela bintu binene Yesu byobamusoñenye kudi Leza kunena. Butyibi bwine bukekala’ko ‘mu difuku dya mfulo,’ mu Umbikalo wa Myaka Kanunu wa Kidishitu.

Yesu wavuya kunena’mba: “Ino nkidipo kyo nenenena ami mwine, ehe, poso’nka Tata wauntumine ye wandaīle mwanda’mba: E mōkasapwila nankyo, e mōkēsambila nenki’mu. Kadi ngyūkile uno wandi mwanda wālaīle i wa būmi bwa nyeke ne nyeke. Ino kyo nena nakyo i kyonka kyāndaīle Tata nami nēsambila monka.” Yoano 12:28-50; 19:38, 39; Mateo 3:17; 17:5; Isaya 6:1, 8-10.

▪ I byaba’ka bisatu bimvwanikilwe’mo diwi dya Leza disambila padi Yesu?

▪ Mupolofeto Isaya wāmwene ntumbo ya Yesu muswelo’ka?

▪ I baludiki’ka betabije Yesu, ino mwanda waka kebamwitabijepo patōkelela?

▪ ‘Difuku dya mfulo’ i difuku’ka, ne i pa bika pakemanina butyibi bukatyibilwa bantu?