Shapita 108

Abakomenwa Kukwata Yesu

YESU ufundija mu tempelo, wapu pano kupa balwana nandi ba bipwilo byelekejo bisatu bisokwela patōka nshikani yabo, o mwanda Bafadiseo abakalabala, kebakale ñeni ya kumukwatyila ku binenwa bamukute. Abo bapwa kukuta kitumba, abatume babo bana-babwanga ne balondi bamobamo ba Heloda ba kukamukwata.

“Abe Mufundiji,” bo bano bantu banena, “kuyūka tubapu kuyūka byōdi wabinebine, ne dishinda dya Leza ulombola’nka binebine, ne kutyina muntu mpika, mwanda abe kubandilapo mpala ya bantu, ehe. I binebine nanshi, abe amba namani? I kijila ne kusonkela Kesala musonko’ni?”

Yesu kongolwapo na lushiñanya. Wayuka’mba shi anene amba, ‘Mhm, ke mungya kijilapo nansha’mba i kibi kusonka uno musonko,’ bakamulambikila amba kalēmekangapo mbila ya Loma. Kadi shi anene amba, ‘Eyo, mufwaninwe kusonka uno musonko,’ Bayuda bashikilwe kubikalwa kobabikelwe na Loma bakamushikwa. Webalondolola’tu amba: “Lelo i kika kyo muntompela bānwe banzazangi? Nanshi mundaīje bidi ndalama ya musonko mīne.”

Pa kumuletela’bo imo, waipangula’mba: “Lelo kino kyelekejo, ne kisonekwa, bidi ponka, i byāni le?”

“I bya Kesala,” bo abo batentulula.

“Lubulai nanshi bya Kesala kudi Kesala, bya Leza nabyo kudi Leza.” Bine bano bantu, pa kwivwana ano malondololo a bunwa a Yesu, abatendela. Abataluka, abamuleka.

Pa kumona Bafadiseo abakomenwa kumona pa kutopekela Yesu, Basadusea banenanga’mba lusangukilo i kutupu’lo abamufwena, kebepangula’mba: “Abe Mufundiji, Mosesa wanene’mba: Shi muntu afwe, ashie mukaji, ne kubutula mwana mpika, nankyo mwanabo amupyanine’ye amumwenenemo ntundu mwanabo. Ino kwetu kwadi bantu ba munda mwabo busamba-bubidi. Umbajinji kusonga wabadikila wafwa, washiako mukaji, ne kubutula mpika, mwanabo wamupyana. Nandi monka, ne wa busatu mwine, kufika ne ku wa busamba-bubidi, nansha kushiapo mwana mpika. Ino ne mukaji wabo mwine wēfulako. Le ino pa kusanguka dikwabo, ukēkalanga mukaja wepi, ku abo bonso basamba-babidi bādi nabo?”

Yesu watentulula’mba: “Nanshi po po mwalubila i ponkapo pa kubulwa kuyūkapo bilembwa, nansha bukomo bwa Leza, a? Ke-pantu pa kusanguka’bo ku lufu kebakasoñangapo, nansha bakusongibwa, nanshi bakēkalanga pamo bwa bamwikeulu badi mūlu. Lelo pa uno mwanda wa kusanguka [kwa] bafu kemwatangile mu mukanda wa Mosesa popa pa kimuna pāmunenene Leza’mba: Ami ne Leza wa Abalahama, kadi ne Leza wa Isake, ne Leza wa Yakoba, a? Aye Leza kadi Leza wa bafwe, mhm, nanshi i Leza wa bōmi, ino binebine bānwe umbaluba pakatampe pene.”

Bibumbo bibatendela monka malondololo a Yesu. Ne basonekeji bamo abaitabija’mba: “Abe Mufundiji ubēsambe biyampe.”

Bafadiseo pa kumona’mba Yesu wanekenya Basadusea, abaiya monka kibumbo. Musonekeji umo kamwipangula mwanda wa kumutompa’mba: “Abe Mufundiji, lelo kijila kikatampe mu bijila byonso mu mukanda-wabijila i kyepi le?”

Yesu watentulula’mba: “Kikatampe kya ku bijila byonso i kino’mba: Ivwanapo abe Isalela, Yehova Leza wetu i Yehova umo enka. Nobe ukasanswa Yehova Leza obe ne mutyima obe onso, ne muya obe onso, ne ñeni yobe yonso, ne bukomo bobe bonso; kino kyo kijila kibajinji kikatampe. Ebiya kya bubidi kikwabo nakyo kisenselela nakyo’mba: Ukasanswa mukwenu na abe mwine. Kutupu kijila kikwabo kitabukile bino’bi bukatampe, mhm.” Kadi Yesu wabweja’ko amba: “I ponka pa bino bijila bibidi e po pa kitako kya mukanda onso wabijila ne wabapolofeto.”

“Eyo, mwamo, mo monka abe Mufundiji, i binebine mo wane[ne]na,” ye musonekeji witabija. “Kudi Leza umo enka kadi i kutupu ungi i yenka aye. Ne kumusanswa ne mutyima onso, ne ñeni yonso, ne muya onso, ne bukomo bonso, kadi kusanswa mukwenu pamo’nka nābe mwine, nankyo ko kukila byonso bisokwa by[elelw]a Leza ne bitapwa.”

Yesu pa kumona’mba musonekeji walondolola bya ñeni, wamunena’mba: “Kudipo kulampe ne bulopwe bwa Leza, mhm.”

Pano ke mafuku asatu—dya Yenga, dya Mwanzo, ne dya Bubidi—Yesu ufundija’nka kufundija mu tempelo. Bantu bamwivwana na nsangaji, ino bendeji ba bipwilo basaka kumwipaya, inoko abamutompa miswelo yabo yonso, abakomenwa. Mateo 22:15-40; Mako 12:13-34; Luka 20:20-40.

▪ I ñeni’ka ikadile Bafadiseo ya kumona pa kukwatyila Yesu, ne byadi bya kufula ku bika shi walondolwele’mba mhm, nansha’mba eyo?

▪ Yesu waepuka namani matompo adi asaka kumukwatyila’po Basadusea?

▪ I matompo’ka makwabo aleta Bafadiseo a kutompa Yesu, ne abafule ku bika?

▪ Ke mafuku anga afundija Yesu mu tempelo mu mwingilo wandi wa mfulo mu Yelusalema, ne bufundiji bwandi bubatenga bantu muswelo’ka?