Shapita 118

Waabwa ne Kukwatwa

BUFUKU ke bupite pa kankatyi, papo Yudasa wendeja kibumbo kikatampe kya bashidika, babitobo bakatampe, Bafadiseo, ne bakwabo, kakatwela nakyo mu budimi bwa Ngesemani. Babitobo abaitabija kupa Yudasa bityele 30 bya ndalama ebābile Yesu.

Padi, papangilwe Yudasa mu bidibwa bya Pashika, wadi waendelela kudi babitobo bakatampe. Nabo abakongakanya ponka na ponka bamudyavita babo ne kibumbo kya bashidika. Padi Yudasa waenda bidi nabo kwadi kuvulukila Yesu ne batumibwa bandi Pashika. Kino kibumbo kikatampe kiselele byabulwi ne bimuni ne binanu pa kuyuka’mba ke bataluke’ko kala, kibalupuka mu Yelusalema kyenda kilonda Yudasa, kekikatabuka Lupongo lwa Kidelone.

Papo Yudasa wendeja kibumbo, kaenda nakyo ku Lūlu lwa Impafu, mwikulupije kala ku kifuko kampanda kobakokeja kutana Yesu. Mu yenga wapityile’u, Yesu ne batumibwa pobadi baselakana pa Betani ne Yelusalema, badi bemana divule mu budimi bwa Ngesemani kwitūkija ne kwisamba. Ino pano Yesu udi mu kyemba kya impafu mufīta, lelo bashidika basa kumujiula namani? Padi kebamumwene kasha. O mwanda Yudasa waleta kiyukeno kya kumuyukila’po, amba: “O mwakamona ami mwimune lwimu lwa pa kyakanwa nabya e yenka mukwat[ei mwende nandi pampikwa kumulonga kibi].”

Yudasa watwala kibumbo mu budimi, pa kumona Yesu ne batumibwa bandi, waenda tululū ne padi Yesu. “Wakamapo! abe Mufundiji!” ye aye umwimuna lwimu lwa pa kanwa biyampe shē.

“Abe mukwetu le kyo walonda pano i kika?” ye Yesu umutentulula. Kupwa welondolola aye mwine kipangujo kyandi amba: ‘Yudasa, koaba Mwanā muntu na lwimu lwa pa kanwa?’ Aye papo wapu kumwaba, kyandi kibapu’mo! Yesu wafwena ku kitōkeji kya bimuni ne binanu kaipangula’mba: “Le o musaka i ani?”

“Tusaka Yesu mwine Nazala,” bo abo balondolola.

“Ami uno,” ye Yesu utentulula, papo wimene pakubulwa moyo ku meso a abo bonso. Bano bantu abatulumuka kubulwa moyo kwandi, kuyuka byasa kwibalonga mpika, kebajoka kimvunda-nyuma, abapone panshi.

“Nki nemusapwilapo na’mba: Ami uno,” ye Yesu ukinena na diwi ditūke. “Wivwane shi munsaka ami nankyo lekaiko bano bende.” Kitatyi kityetye kunyuma, Yesu wadi walombola Shandi mu milombelo pobadi mu kyumba kya peulu amba i mulame batumibwa bandi bakikōkeji, kutupu nansha umo ujimine, “poso enka yewa mwana wadi moneke kala.” O mwanda wanena balondi bandi bende, kinenwa kyandi kifikidile.

Bashidika abeshinkija, abaimana kebakute Yesu myonji, batumibwa abanañuna bisa kulongeka’po. “Abe Mfumwetu, twibatape ne kipete?” bo abo bepangula. Aye Yesu kalondolwele, Petelo wakulumuna kala kimo kya pa bipete bibidi biselele batumibwa, wakalabila Makusa, umpika wa kitobo mukatampe. Wamutupe’kyo ku mutwe, ino kibamupitula kutwi kwa lundyo.

“Lekai bidi,” ye Yesu wibakanda. Watenga Makusa ku kutwi, kilonda kibelukididile. Kupwa waleta’po bufundiji bukatampe, wanena Petelo amba: “Someka kipete kyobe mu kikwa kyakyo, mwanda bonso bakusomona kipete bakafwila konka ku kipete. Lelo abe’mba ami mwine nkiyūkilepo kwela lubila kudi Tata pano ponka, nandi waumpa pano po ñimene bamwikeulu bakukila kuvula mavita ne mavita dikumi ne abidi?”

Yesu i mwitabije kukwatwa, o mwanda washintulula’mba: “Ino kīkale nankyo nanshi le byobya bisonekwe bifikepo namani?” Kadi wabweja’ko amba: “Lelo kitomeno kimpele Tata kino nkitome’kyopo’ni?” Bine, i mwitabije na mutyima onso kiswamutyima kya Leza kilongeke padi aye!

Kupwa Yesu kanena kibumbo nakyo. “Lelo ne ngivi o mwaiya kutamba ne bipete, ne mikombo, kunkwata?” ye aye wipangula. “Mafuku onso mo bukila nadi nshikata nenu kwimufundija mu njibo ya Leza, ne kunkwatapo mpika, nansha umo. Ino byonso bino’bi byaubilwa’mba bilembwa bya bapolofeto bifikile ponka.”

Pa kunena namino, kibumbo kya bashidika ne bakulumpe ba basola ne bamudyavita ba Bayuda abakwata Yesu kebamukute myonji. Batumibwa pa kumona namino, abashiye Yesu kebanyema. Inoko nsongwalume umo—dimodimo i mwanā-bwanga Mako—washala mu kibumbo. Padi nandi wadi ku njibo kwadi kudidile Yesu Pashika, kupwa walonda kibumbo pa kutamba ku ino njibo. Ino pano abamujiula kebakimbe kumukwata. Wakuse mutwelo wandi wa bukonge, wanyema. Mateo 26:47-56; Mako 14:43-52; Luka 22:47-53; Yoano 17:12; 18:3-12.

▪ Mwanda waka Yudasa i mwikulupije amba usa kutana Yesu mu budimi bwa Ngesemani?

▪ Yesu walombola muswelo’ka amba utele batumibwa bandi mutyima?

▪ Petelo walonga kika kya kwitabila Yesu, ino Yesu wanena Petelo bika?

▪ Lelo Yesu walombola muswelo’ka amba i mwitabije kiswamutyima kya Leza padi aye kilongeke?

▪ Batumibwa pa kushiya Yesu, i ani washala, ne i bika byamufikila?