Shapita 120

Watunwe mu Kipango

BA PETELO ne Yoano badi abashiye Yesu mu budimi bwa Ngesemani, abanyema na moyo ne batumibwa bakwabo, ino pano abo bubidi abaimana. Kepabulwe padi abapeta Yesu pano pendwa nandi kwa Anasa. Anasa pa kumutuma kwa Kaifasa Kitobo Mukatampe, ba Petelo ne Yoano nabo benda balonda kyaba nabya, mobimwekela badi na mityima ibidi, aku batyina kutūla būmi bwabo mu kyaka, koku kadi bafwila kuyuka bisa kufikila Mfumwabo.

Abafika kwa Kaifasa mu lubanza lukatampe, Yoano watwela mu kipango, mwanda bamuyukile kudi kitobo mukatampe. Ino Petelo washala panja wimene nzulanzula pa kibelo. Kepejijepo, Yoano wajoka wanenena Petelo kwa mwingidi mwana-mukaji, kalama wa kibelo, ko kumutweja abamutweja.

Pano kudi mashika, batulama ba kipango ne bamudyavita ba kitobo mukatampe ababanza mudilo wa kota. Petelo nandi wafwena’ko kaote nabo pano pailaija kuyuka musa kufudila kīmu kimuka Yesu. Kwine kuno mu kitōkeji kya mudilo, kalama wadi umutwejeje wamujiula. “Abe nobe wadi ne Yesu mwine Ngadilea!” ye mwana-mukaji umubwalukila.

Petelo mutyima munda ubaposoka pa kujiulwa’ye, watune ku meso a bantu bonso amba kayukilepo Yesu. “Nkimuyūkilepo, nansha kwivwana mo wanenenamo,” ye aye unena.

Petelo watalukidila’po waenda dya kutambilwa. Kwine’ko nsongwakaji mukwabo wamujiula, kasapwila bemene nandi amba: “Ne uno’u nandi wadi ne Yesu wa Nazala.” Petelo watune monka, watyipe ne mutyipo amba: “Nkiyūkilepo uno muntu.”

Petelo waikala monka mu kipango, kakimbe muswelo onso wa kwifinda. Kepabulwe padi wasantamunwa pano na kudila kwa banzolo ba mu kibangabanga. Akyo kīmu kya Yesu koku kyendelela. Mobimwekela bamwimukijija’kyo mu kipindi kya njibo kya peulu pa kipango. Papo Petelo ne bakwabo belaija munshi bamona monso mupitakena batumoni beshileshile betyilwa kutemuna myanda.

Ke kintu kya nsaa imo tamba pajiulwa Petelo musunsa wa mfulo amba wadi wenda na Yesu. Pano bantu bavule bemene dya kubwipi na Petelo abamufwena, kebamunena’mba: “I binebine nobe nanshi udi waku abo, ke-wi-muntu muneneno obe ubakusokola.” Umo mu kino kibumbo ubutulwa na Makusa wadi utyibilwe kutwi na Petelo. “Nkyakumwenepo nandi mu budimi’mwa?” ye aye unena.

“Mhm, ami nkiyūkilepo muntu’o,” ye Petelo upatanya. Katompa kwibakulupija’mba abo bonso abetupe, utyipa wikodyota, amba malwa andi shi byanena ke byabinepo.

Petelo upwa’tu kutuna musunsa wa busatu, ntombolwe nandi udila. Yesu nandi koku utambidila, walupukila pa kidyangwa kya peulu pa njibo, waalamuka kamutale. Ponka na ponka, Petelo wavuluka byadi bimunene Yesu mu kyumba kya peulu nsaa mityetye kunyuma, amba: “Nzolo pakadidile, kulondakanya dibidi, abe nobe ukantuna disatu.” Petelo walēmenenwa na bubi bwandi, watambe wenda udila wityikwila.

Lelo bino bibafikila Petelo namani? Le watune Mfumwandi misunsa isatu mituntulu namani, aye wadi ke mupwe kwikulupila bukomo bwandi bwa kumushipiditu? Bine, ngikadilo yobimutene’mo yo ibamumija umeso. Bubinebine bubakobakanibwa, Yesu wamonwe bu kabwalala. Kyoloke kibamonwe bu kikondame, wakubulwa mwanda ye walambikilwa myanda. Kuno kuningilwa pa kino kyaba ko kwashetemuna Petelo. Ne milangwe yandi ya dikōkeji mine ibamuvutakana; kya bulanda, waoya moyo wa kutyina bantu. Kino kekifwaninwepo kwitufikila nansha dimo! Mateo 26:57, 58, 69-75; Mako 14:30, 53, 54, 66-72; Luka 22:54-62; Yoano 18:15-18, 25-27.

▪ Ba Petelo ne Yoano abatwela mu kipango kya kitobo mukatampe namani?

▪ Ba Petelo ne Yoano pobadi mu kipango, i bika bilongwa mu njibo?

▪ Le nzolo wadila misunsa inga, ne Petelo watune Kidishitu misunsa inga?

▪ Petelo watyipe wikodyota mwanda wa kulombola bika?

▪ I bika byalengeja Petelo atune amba kayukilepo Yesu?