Shapita 121

Ku Meso a Sanhedrini, Kupwa Ke kwa Pilato

BUFUKU kebusa kukya. Petelo wapu kutuna Yesu musunsa wa busatu, ba mu Sanhedrini nabo abapu kīmu kyabo kya mabelamabela, abasansana. Pano bubaki, ke dya Butano lubanga, abetana kadi, pano ke ku njibo kungwilanga ba mu Sanhedrini. Mobimwekela, bakimba kubingija kīmu kyobadi bakutyile kala bufuku. Yesu pa kuletwa ku meso abo, abanena’nka na mobadi banenene bufuku, amba: ‘Shi i abe Kidishitu, witusapwile.’

‘Nansha shi nemusapwile kemusakepo kwibitabija,’ ye Yesu ulondolola. “Kadi shi nemwipangula nami [k]ipangulo kadi kemukanondololapo.” (MB) Inoko Yesu weyukanya pampikwa moyo amba: “Kushilwila’nka pano, Mwan[ā] muntu ukashikata ku mutamba wa kuboko kulume [kwa bukomo] kwa Leza.” (MB)

“Lelo ino abe wi Mwanā Leza, a?” bo abo basaka kuyuka.

“I amo, banwe bene mubekinena kala,” ye Yesu utentulula. (BB)

Bano bantu byobasaka kala kumwipaya, ano malondololo i mebabwane. Abeamone bu kutuka Leza. “Lelo kudi o tusaka wakumujingulula’ni?” bo abo bepangula. “Bātwe bene tubaivwana mukanwa mwandi.” Penepo abakute Yesu kebenda nandi kwa Pontyusa Pilato, mbikavu wa Loma.

Yudasa, mwine wabile Yesu, utala mwimukilwa kīmu. Pa kumona abaponeja Yesu, wealakanya. Waenda kudi babitobo bakatampe ne bakulumpe kukebajokeleja bityele 30 bya ndalama, kaebashintulwila’mba: “Napi mambo pa kusokola mashi a muntu wampikwa mwanda.”

“Lelo ino kadi, bātwe i mwanda ka? i abe mwine ukamona’kyo,” bo abo bamutentulula basūle’ko ne kusūla. Yudasa wakuse bityele bya ndalama mu tempelo, watambidila kakeyoa. Ino mobimwekela musambo ukutyile’ko Yudasa myonji ubaposoka, umbidi wandi ubaponena pa mabwe adi munshi ubasonsakana.

Babitobo bakatampe abakomenwa kya kulonga na bityele bya ndalama. “I kijila kwiītūla mu kilambwilo,” bo abo banena, “ke-luntu luno lupeto i lupeto lwa mashi.” Abebaba’po bidi, kupwa abakapote nalo budimi bwa umbumbi bwa kujīka’mo beni. Abainikidila buno budimi bu “budimi bwa mashi.”

Lukidi lubanga lonka, abatwala Yesu ku njibo ya mbikavu. Ino Bayuda bakamutwele abapele kutwela, mwanda balanga’mba kisense kya uno muswelo na Bajentaila kisa kwibasubija disubi. Pilato watambe panja kakalonga mobasakila. “Lelo i mwanda ka o mwamujingulula nao uno muntu?” ye aye wipangula.

“Shi wadi wampikwa kulonga bibi, longa nankyo ketumufikijepo kuno kōdi,” bo abo balondolola.

Pilato kakimbe kwepuka kutwela mu mwanda, walondolola’mba: “Muyatei bonka bānwe bene mutyibe mambo konka ku mukanda-wenu-wa-bijila.”

Bayuda abasokola milangwe yabo ya butapani pa kunena’mba: “Ehe, bātwe kwipaya muntu i kijila.” I byabine, shi bepaye Yesu pa Masobo a Pashika, kusa kulupuka lupotopoto, mwanda bantu bavule i balēmeke Yesu mpata. Ino shi bamwekeje amba bene Loma bo bamwipaila myanda ya mabikavu, nankyo abaepa kulambikilwa uno mwanda na bantu.

O mwanda bendeji ba bipwilo abashilula pano kufwatakanya matope makwabo a bubela, abaleka matope obadi batwikile Yesu mu kīmu kibajinji amba utukanga Leza. Abamukutyila matope amo pasatu, amba: “Uno’u twamutēne [1] usoñanya bantu’mba: [2] Kemukilambula Kesala; ino [3] aye mwine’mba: Ne Kidishitu mulopwe.”

Kyateneka Pilato i matope a kunena’mba Yesu witelanga bu mulopwe. Watwela kadi mu njibo, waityila Yesu kwadi, kamwipangula’mba: “Lelo abewa nanshi wi mulopwe wa [Bayuda]?” Ko kunena’mba, lelo ubajilula bijila kowitela abe mwine bu mulopwe pa kyaba kya Kesala?

Yesu usaka kuyuka myanda imutala itelekele Pilato, wamwipangula’mba: “Lelo i abe mwine wisamba’ni, i bantu bakusapwila’byo?”

Pilato wanena’mba kekudipo kyayukile padi aye, ino usaka’tu kusapwilwa mobikadile. “Le ami ne Muyuda?” ye aye ulondolola. (MB) “I onka muzo obe, ne ba[bitobo] bakatampe bene, bo bakufikija ko ndi. Lelo kyo walonga kīne i kika?”

Ino Yesu kafindilepo uno mwanda, wa bumulopwe bwandi. Bine, malondololo asa kuleta’po Yesu akatulumuja Pilato. Luka 22:66–23:3; Mateo 27:1-11; Mako 15:1; Yoano 18:28-35; Bilongwa 1:16-20.

▪ I kika kyetanina kadi ba mu Sanhedrini lubanga?

▪ Yudasa wafu lufu lwa muswelo’ka, ne i bika byalongwa nabyo bityele 30 bya ndalama?

▪ Mwanda waka Bayuda basaka bene Loma bepaye Yesu pa kyaba kya kumwipaya abo bene?

▪ Bayuda abatopeka Yesu matope’ka?