Shapita 133

Yesu Wavuya Byonso Byamunene Leza

YESU Kidishitu Mulopwe Kalala ka Mavita pakatalula Satana ne ntanda yandi ya bukondame, bine kukekala nsangaji ya kamfula nkonko! Papo po pakashilula Umbikalo wa Myaka Kanunu wa ndoe wa Yesu!

Mu buludiki bwa Yesu ne balopwe nandi, bantu bakapanda ku Amakedona bakolola bityakuku bikashibwa na dino divita dya boloke. Mobimwekela, boba bapandile bakabutula bana mu bula bwa kitatyi kampanda, bano bana bakebakwasha ku mwingilo usangaja wa kulongolola ntanda ke budimi bwa dyangi shē.

Ebiya, Yesu ukalupula midiyo ya bantu keibadika mu bibundu byabo, amba bāye baloelelwe mu ino Paladisa milumbuluke. Ukekilonga mwanda wa kufikidija mulao wandi wa’mba: “Dyuba dikaya’ko’dya bonso badi mu bibundu bivulukwa . . . kutamba [bakatamba]’mo.” (NW)

Mu bano bakasangulwa na Yesu mukekala ne yewa nonga-bibi wāfwile ku mutyi wa masusu pabwipi nandi. Vuluka’mba Yesu wāmulaile’mba: “Binebine nakusapwila dyalelo dino’di, ukekalanga nami mu Paladisa.” (NW) Ke kunenapo amba uno muntu ukaselelwa mūlu kukabikala bu mulopwe pamo na Yesu, nansha’mba Yesu ukealamuna kadi bu muntu kwiya kushikata nandi mu Paladisa pano pantanda, mhm. Ino Yesu ukekala na uno muntu wādi nonga-bibi mu buno buluji, ukamusangula ekale na būmi mu Paladisa ne kumupa bisakibwa byandi byonso, bya kungitu ne bya kumushipiditu, pamo na mobilombwedilwe pa paje ulonda’ko’u.

Langa’po bidi! Pakata Yesu mutyima pano pantanda na buswe bwandi, muzo wa muntu onso mutuntulu—boba bakapanda ku Amakedona, lutundu lwabo, ne tununu twa midiyo ya bantu bakasangulwa bamukōkele—ukafikijibwa pa bubwaninine. Yehova ukekalanga na bantu bonso kumushipiditu, kupityila kudi Yesu Kidishitu wandi Mwana mubikale. “Kadi,” enka na mwikinenena diwi dya mūlu dyāivwene Yoano, “Leza ukapampula impolo yonso mu meso abo; ne lufu nalo kelukēkalakopo dikwabo kadi, mhm, nansha kuyoyokota miyoa, nansha kudila kwine, nansha misongo mīne mpika.” Kutupu muntu ukasusuka nansha ukabela pano pantanda.

Ku mfulo kwa Umbikalo wa Myaka Kanunu wa Yesu, ngikadilo ikekala enka mwādi mwiisakila Leza ku ngalwilo paānene ba Adama ne Eva, ba mulume ne mukaji babajinji, amba bevudije ne kuyuja ntanda. Bine, ntanda yonso ikasambakana muzo moloke wa bantu babwaninine. Kikekala namino mwanda byabuyabuya bya kinkūlwa kya kitapwa kya Yesu bikapebwa muntu ye-yense. Lufu lutambile ku bubi bwa Adama kelukekala’kopo dikwabo!

Enka namino ye mukavuila Yesu byonso byāmunene Yehova kulonga. Ebiya ku mfulo kwa myaka kanunu, Yesu ukajokeja Bulopwe ne kisaka kya bantu babwaninine kudi Shandi. Kupwa Leza ukakutulula Satana ne bademona bandi, kwibatambija mu lupongo, ke ngikadilo yakubulwa bukomo mobadi pamo bwa abo bafwe kadi. Lelo i bika byakebakutulwila?

Eyo, bantu bavule bakekala mu Paladisa ku mfulo kwa myaka kanunu bakekala bantu basangwilwe, kebatompelwe lwitabijo lwabo nansha dimo. Mwanda bāfwile pampikwa kuyuka milao ya Leza nansha kumona muswelo wa kwitabija’yo. Nanshi pa kupwa kusangulwa’bo ne kufundijibwa bubinebine budi mu Bible, bakapēlelwa kwingidila Leza mu Paladisa, pampikwa kya kwibakalakanya nansha kimo. Ino shi Satana wadi amba upelwe kyaba kya kutompa kwibemika mu mingilo yobengidila Leza, lelo mu ao matompo badi ba kwikala nyeke badikōkeji? Pa kulondolola kino kipangujo, Satana ukakutululwa.

Kusokwelwa kwāpelwe Yoano kulombola’mba, kupwa kwa Umbikalo wa Myaka Kanunu wa Yesu, Satana ukalubija kibalwa kekibadika kya bantu baleke kwingidila Leza. Ino shi matompo a mfulo abapu, Satana, ne bademona bandi, ne boba bonso bakabombolwa, bakonakanibwa lonso. Ku mutamba mukwabo, bantu batompibwe ne pa mfulo, ko kunena’mba badikōkeji bapandile, bakekala nyeke na būmi, baloelelwa na byabuyabuya bikebapa Shabo wa mūlu nyeke ne nyeke-ke.

I bine, Yesu i mwingile, ne kadi ukendelela na kwingila mwingilo mukatampe wa kufikidija mpango ya Leza ya ntumbo. Bine, būmi bwetu bwitutengele kumeso i bulumbuluke kashāa shi tutale bintu byonso bivuija Yesu pano pabikele bu Mulopwe mukatampe wa mūlu ubikikilwe na Leza. Ino ketufwaninwepo kwilwa bintu byonso byaālongele paādi ukidi pano pantanda.

Yesu wāitabije kwiya pano pantanda, wētufundija myanda ya Shandi. Nakampata, wādi kifwa kīsokwele kya ngikadilo milumbuluke ya Leza. Bine, mityima yetu iteñwanga bininge potubandaulanga bunkanka ne bwana-bulume bwandi, tunangu twakubulwa tukwabo tudingakene nato, manwa andi a bu mufundiji wañeni matabuke, bwendeji bwandi bwakubulwa moyo, mutyima wandi wa lusa ne kanye, ne kwitūla kwaādi witūla pa kyaba kya bakwabo. Bine, mityima yetu ifwaninwe kwitukunka ponso potuvuluka biyampe byāetulongele, wētususukile byamwiko pa kupāna kinkūlwa, mwanda o wādi muswelo umo kete kudi batwe wa kumwena’ko būmi!

Binebine, kwifunda būmi bwa Yesu kubetulombola’mba i muntu wa kashāa! Bukatampe bwandi i bumwekelele’tu amba i bukatakata byamwiko. I bine, mutyima wetu witutakika tupituluke mu byānene Pontyusa Pilato mbikavu mwine Loma amba: “Talai, muntu au!” (MB) Bine Yesu ye “muntu,” muntu mukatakata wa kasha ne kashele!

Shi twitabije kitapwa kya kinkūlwa kyandi kyapēne, bubi ne lufu byotupyene kudi Adama biketutalulwa, kadi Yesu ukekala “Tata wa nyeke.” (BB) Boba basaka kukamona būmi bwanyeke kebafwaninwepo enka kwifunda kuyuka Leza kete, ino i ne kuyuka Yesu Kidishitu wandi Mwana. Tubakusakila butangi ne bwifundi bobe bwa dino dibuku bukukwashe wikale na buyuki bumwenwa’mo būmi! 1 Yoano 2:17; 1:7; Yoano 5:28, 29; 3:16; 17:3; 19:5; Luka 23:43; Ngalwilo 1:28; 1 Kodinda 15:24-28; Kusokwelwa 20:1-3, 6-10; 21:3, 4; Isaya 9:6.

▪ I madyese’ka aleta nsangaji akekala na bantu bakapanda ku Amakedona ne babo bana?

▪ Kutentekela pa bantu bakapanda ku Amakedona ne babo bana, i bāni bakwabo bakekala mu Paladisa, ne Yesu ukekalanga nabo mu buluji’ka?

▪ Ngikadilo ikekala namani ku mfulo kwa myaka kanunu, ne penepa Yesu ukalonga bika?

▪ Mwanda waka Satana ukakutululwa mu lupongo, ne kupwa papo, i bika bikamufikila aye ne bonso bamulonda?

▪ Yesu ukokeja kwikala bu “Tata wa nyeke” namani?