Mishipiditu Ke Bipangwapo Byādiko Pano Pantanda Kupwa Byafwa

Mishipiditu idiko bine! Mu kikalo kya mishipiditu kya kubulwa kumweka mudi mishipiditu miyampe ne imbi. Lelo, dibajinji bādi bantu bādiko pano pantanda, kupwa bafwa?

Mhm, keamopo. Bantu bavule bafwatakanyanga’mba shi muntu wafu wendanga mu ntanda ya baya-kalunga, ntanda ya mishipiditu, ino bine kekidipo uno muswelo. Twikiyukile muswelo’ka? Mwanda Bible wikishintululanga. Bible i dibuku dya bubinebine dilupukile kwa Leza umo wabine, wa dijina dya bu Yehova. I Yehova wāpangile bantu; uyukile biyampe kibafikilanga pa kufwa.​—Mitōto 83:18; 2 Temote 3:16.

Bible unenanga’mba Leza wapangile Adama, muntu umbajinji, “ku biloba bya panshi.” (Ngalwilo 2:7) Wamutūla mu Paladisa, mu budimi bwa Edena. Shi Adama wakōkele ku kijila kya Yehova, kaswilepo kufwa; wādi wakwikala mūmi pano pantanda kufikija ne dyalelo. Ino pa kujilula kijila kya Leza ku kusaka kwa aye mwine, Leza wamunena’mba: “[Ukajokelanga] ku biloba; mwanda e mo walupwilwe, ke-wi-muntu wi biloba, kabidi i kubiloba konka kokajokela.”​—Ngalwilo 3:19.

Lelo kino kishintulula kika? Bine, i kwepi kwādi Adama kumeso kwa aye kupāngibwa na Yehova ku biloba bya panshi? Kādikopo. Kādipo mūlu, bu mushipiditu wādi ufwaninwe kubutulwa. Wādi kutupu’ye. Shi kepano, Yehova pa kunena Adama’mba ‘ukajokela ku bilobo,’ kyādi kishintulula’mba Adama wādi wakufwa. Adama kātundulukīlepo mu kikalo kya mishipiditu. Pa kufwa, Adama kākidipo na būmi, wājokēle ku ngikadilo ya kubulwa kujina, ya kubulwa kwikalako. Lufu i kubulwa kwikala na būmi.

Ino, lelo bafu bakwabo nabo? Lelo nabo kebakidikopo? Bible ulondolola’mba:

• “Bonsololo [bantu ne banyama bene] benda pantu pamo ponka; bonsololo i baluvumbi, kabidi bonso bālamuka ke luvumbi monka.”​—Musapudi 3:20.

• “Bafwe kebayukilepo nansha kimo kine.”​—Musapudi 9:5.

• “Lusa lwabo nalo pano i loneke, ne nshikani yabo mine mo monka, ne kwabila kwabo kwine kumo.”​—Musapudi 9:6.

• “Kekudipo mingilo nansha kusambakanya bintu pamo miswelo ne miswelo, nansha kuyukidija, nansha ñeni mu kibundu koenda’kwa.”​—Musapudi 9:10.

• “[Muntu] walukila ku biloba byandi, mu dyodya difuku dimo dyonka mifwatakanyo yandi ībaoneka [ibatukila].”​—Mitōto 146:4.

Lelo kwitabijepo bino bisonekwa bya mu Bible? Shi kwibitabijepo, nankyo languluka bidi pakino: Mu bisaka bivule, i mwana-mulume wikalanga usokola lupeto mwanda wa kudisha ne kuvwika ba mu kyandi kisaka. Shi wafu, kyandi kisaka kikalanga kitāna makambakano. Pamo, wandi mukaji ne bana bekalanga babulwa nansha lupeto lutyetye lwa kupota nalo kakibese ka lulundu. Pamo kadi bekalanga bashala kususulwa na bādi balwana na uno muntu. Ino, wiipangule bidi: ‘Shi uno muntu i mūmi mu ntanda ya mishipiditu, mwanda’ka kendelelangapo na kuvuija bisakibwa bya ba mu kyandi kisaka? Mwanda’ka kebakingengapo ku bantu babi?’ Bisonekwa bidi na bubinga. Uno muntu kadipo na būmi, kakokejapo kulonga kintu nansha kimo.​—Mitōto 115:17.

Lelo kino kishintulula’mba bafu kebakokejapo nansha dimo kukekala kadi na būmi? Mhm. Tusa kwisambila pa lusangukilo kumeso kotwenda kuno. Ino, kino kishintulula’mba bafu kebayukilepo kintu nansha kimo kyolonga. Kebakokejapo kukumona, kukwimvwana nansha kwisamba nobe. Kufwaninwepo kwibakwatwa moyo. Kebakokejapo kukukwasha, ne kebakokejapo kukususula.​—Musapudi 9:4; Isaya 26:14.