Kipindi 8
Mpango Ya Leza Yendanga Ifikidila
1, 2. Leza ukwete mpango’ka ya kutalula’ko masusu?
BULUDIKI bwa bantu bantomboki ne bademona ke bususule muzo wa muntu myaka mivule. Ino Leza kedilwepo masusu etu. Mu myaka yonso, ukwatanga’ko mpango ya kunyongolola bantu mu nkano ya bubi ne masusu.
2 Pālupukile butomboki mu Edena, Leza wāshilwile kusokola mpango yandi ya kutūla’ko umbikalo ukālamuna ino ntanda ke paladisa ya kwikala’mo bantu. (Ngalwilo 3:15) Mwenda mafuku, Yesu, musedi wa myanda mukatampe wa Leza, wāimanina pa uno umbikalo wa Leza ukāya’ko bu mutwe wa mwanda wa bufundiji bwandi. Amba lo lukulupilo lumo kete ku muzo wa muntu.—Danyele 2:44; Mateo 6:9, 10; 12:21.
3. Yesu wātelele namani umbikalo ukāya’ko ukabikala pano pantanda, ne mwanda waka weutelele namino?
3 Yesu wātelele uno umbikalo wa Leza ukāya’ko amba i “Bulopwe bwa mu madiulu,” mwanda kibikēlo kyao kidi mūlu. (Mateo 4:17, Myanda Miyampe ku Bonso) Wēutela ne bu “bulopwe bwa Leza,” mwanda Leza ye Mwine’o. (Luka 17:20) Mu bula bwa tutwa twa myaka, Leza wāpele balembi mushipiditu wandi amba basoneke bupolofeto butala pa boba bakabunda uno umbikalo ne byoukalonga.
Mulopwe Mupya wa Ntanda
4, 5. Lelo Leza wālombwele muswelo’ka amba Yesu ye Mulopwe mwitabijibwe na aye?
4 Yesu ye wāfikidije, myaka kubwipi kwa tununu tubidi kunyuma, bupolofeto buvule butala pa yewa wālailwe amba ukekalanga Mulopwe wa Bulopwe bwa Leza. Ye aye Mulopwe, mutongwe na Leza, upelwe uno umbikalo wa mūlu ukabikala pa bantu. Yesu pa kufwa, Leza wāmusangula mwa kukekadila’ye momwa mūlu bu kipangwa kya kumushipiditu kya bukomo, kekifu. I batumoni bavule bēmwenine lusangukilo lwandi.—Bilongwa 4:10; 9:1-9; Loma 1:1-4; 1 Kodinda 15:3-8.
5 Penepo Yesu “washikete ku lundyo lwa Leza.” (Bahebelu 10:12) Ko kwaādi ukunga kitatyi kya Leza kya kumupa lupusa lwa kubikala bu Mulopwe wa Bulopwe bwa Leza bwa mūlu. Kino kyāfikidije bupolofeto bwa Mitōto 110:1, bumunena’mo Leza amba: “Shikata kuno ku kuboko kwami kwa lundyo, poso bidi ngalamune bakushikilwe ke kitūlo-kya-maulu obe.”
6. Yesu wēlombwele muswelo’ka amba i mufwaninwe kubikala bu Mulopwe wa Bulopwe bwa Leza?
6 Yesu paādi pano pantanda, wēlombwele amba i mufwaninwe kino kitenta. Nansha byaādi upangwapangwa, wālamine bululame bwandi kudi Leza. Enka namino, wālombola’mba Satana wābepele paānene amba i kutupu muntu ukokeja kulama kikōkeji kudi Leza shi watulwa mu matompo. Yesu, muntu mubwaninine, ‘Adama wa bubidi,’ wālombwele amba Leza kētupilepo pa kupanga bantu babwaninine.—1 Kodinda 15:22, 45; Mateo 4:1-11.
7, 8. I bintu’ka bilumbuluke byālongele Yesu paākidi pano pantanda, ne bino bilombola bika?
7 I mulopwe’ka ulongele bintu bivule bilumbuluke pamo na byālongele Yesu mu myaka mityetye ya mwingilo wandi? Yesu wādi na bukomo bwa mushipiditu sandu wa Leza, undapa babela, babulema, bampofu, babitwi ne batumāma. Usangula ne bafwe! Wālombola kipindi kityetye kya bivulevule byakalongela muzo wa muntu kujokoloka ntanda yonso pakāya mu lupusa lwa Bulopwe.—Mateo 15:30, 31; Luka 7:11-16.
8 Yesu wālongele bintu bilumbuluke bivule mpata paākidi pano pantanda, o mwanda mwanā-bwanga Yoano unena’mba: “Kadi kudi ne bikwabo nabyo bivule bīne byālongele aye Yesu, shi ami na’mba nabyo byadi bisonekwe abyo byonso, longa ne panopantanda pēne kepadipo kyaba kya kutūla’yo mikanda misonekwe.”—Yoano 21:25.a
9. Mwanda waka bantu ba mityima myoloke bādi batutyikila kudi Yesu?
9 Yesu wādi wa kanye ne lusa, muswe bantu byamwiko. Wādi ukwasha balanda ne bamweshibwa malwa, kadi kādipo na mboloji ya kushikwa bampeta nansha bantu ba bitenta. Bantu ba mityima myoloke bāitabile ku lwito lwādi lwibeta Yesu na buswe amba: “Iyai kwami bānwe bonso bakuputuma na mīngilo, ne bakulemenwa, nabya nami nkemutukija’byo biyampe. Twela mu lupungu lwami lwa bu-umpika, muboīle manwa kudi ami, ke-ne-muntu amiwa ne wakukōkela, kadi ngidi ne bumvu pa mutyima, ebiya nabya mukamonanga mityima mitūke biyampe. Mwanda lupungu lwami lwa bu-umpika ludipo biyampe ne kiselwa kyami nakyo kyonka kipela.” (Mateo 11:28-30) Bantu bakaminwe Leza bādi batutyikila kwadi, batengela na kitūkijetyima buludiki bwandi.—Yoano 12:19.
Boba Bakabikala Nandi
10, 11. I bāni bakabikala ntanda pamo na Yesu?
10 Imbikalo ya bantu idi ne babilolo bayo, ne Bulopwe bwa Leza bwa mūlu nabo mo monka. Kudi bantu bakwabo bakabikala ntanda pamo na Yesu, mwanda wālaile bapwani nandi amba bakabikala nandi bu balopwe pa muzo onso wa muntu.—Yoano 14:2, 3; Kusokwelwa 5:10; 20:6.
11 Nanshi kudi kibalwa kifikile kya bantu bakekala na Yesu basangwilwa ku būmi bwa mūlu. Abo bonso pamo babundile Bulopwe bwa Leza bukaletela bantu madyese anyeke. (2 Kodinda 4:14; Kusokwelwa 14:1-3) O mwanda tamba nkongo ne nkongo, Yehova walanga kyalwilo kya buludiki bukaletela muzo wa muntu madyese a nyeke ne nyeke.
Buludiki Bwipele Bwanapabo Bubafika ku Mfulo
12, 13. Bulopwe bwa Leza butengele kulonga bika panopano?
12 Mu kano katwa ka myaka, Leza i mukwate aye mwine myanda ya ntanda makasa abidi. Monka motusa kumwena mu Kipindi 9 mu uno mukanda, bupolofeto bwa Bible bulombola’mba Bulopwe bwa Leza bubikelwe na Kidishitu bwābikikilwe mu 1914, pano butengele kupondakanya ngikadilo yonso ya Satana. Buno Bulopwe i bwiteakanye ‘kubikala umbukata mwa balwana na [Kidishitu].’—Mitōto 110:2.
13 Bupolofeto bwa Danyele 2:44 bunena pa uno mwanda’mba: “Mu mafuku a boba balopwe [bakidi’ko dyalelo] Leza wa mūlu ukemika bulopwe [momwa mūlu] kebukonakanibwapo nansha patyetye, nansha bulopwe bwine bwabo kupityila ku bantu bangi [buludiki bwa bantu kebukekala’kopo monka], ehe; ino [Bulopwe bwa Leza] bukatyumuna bipindibipindi ne kukubija malopwe ano’a onsololo, kadi bukemananga nyeke.”
14. I byabuyabuya’ka bimobimo bikamonwa pakafula mabikavu a bantu?
14 Bulopwe bwa Leza bukabikala pano pantanda ponsololo, pa kupwa kukubija ano maludiki ēpele bwanapabo bwa kuleka kulonda bisaka Leza. Buno bulopwe kebukonwepo na milangwe ya bantu mwanda bukabikēla mūlu. Lupusa lwa kubikala lukajokela kudi Leza, mwine wādi nalo kala dibajinji momwa mūlu. Bulopwe bwa Leza bukabikala pano pantanda ponso, kekukekalapo muntu ukongolwa na mitōtelo ya bubela nansha na mafilozofi a bituputupu a bantu nansha na milangwe ya kipolitike. Kekukekalapo kintu nansha kimo kya uno muswelo.—Mateo 7:15-23; Kusokwelwa, shapita 17 ku 19.
[Kunshi kwa dyani]
a Shi usaka kuyuka lusango lonso lwa būmi bwa Yesu, tala dibuku Muntu Mukatakata wa Kasha ne Kashele, dilupwilwe mu 1991 na Batumoni ba Yehova.
[Kifwatulo pa paje 18]
Yesu paākidi pano pantanda, wāundapile babela, wāsangula bafwe mwanda wa kulombola byakalonga mu ntanda impya
[Kifwatulo pa paje 19]
Bulopwe bwa Leza bwa mūlu bukapondakanya lonso mabikavu a miswelo yo-yonso ēpele bwanapabo bwa kuleka kulonda bisaka Leza