Nunupilai Pamo

1, 2. (a) Lelo i kwalamuka’ka kwiyanga pamo na bununu? (b) Lelo i muswelo’ka wābwenye bantu bādi bakaminwe Leza mu myaka yakala kwikala na būmi bwansangaji umbununu bwabo?

BUNUNU bwiyanga na kwalamuka kuvule. Ngitu yenda izonza, bukomo bwenda butyepa. Pa kwitala mu dikalashi, wemona mikonye impya, nywene keyenda itwela mvwi​—nansha kupwa ku mutwe. Washilula kwilwa myanda mivule. Musuku umpya shi bana abasonge, ne shi abakubutwila bankana. Ku banunu bamo-bamo, kukwata pasho kwalamunanga būmi bwabo bininge.

² Kyabine, kununupa kukokeja kwikala kwa masusu. (Musapudi 12:1-8) Ino vulukai mwādi mwikadile bengidi ba Leza bavule ba mu myaka yāsonekelwe Bible. Bāpelwe tunangu ne kwivwanija, ye bintu byādi bibapa nsangaji mikatampe umbununu bwabo, nansha byobāfudile ku kufwa. (Ngalwilo 25:8; 35:29; Yoba 12:12; 42:17) I muswelo’ka obābwenye kwikala na būmi bwansangaji umbununu bwabo? Bine, bēkibwenye na kukwatañanya būmi bwabo na misoñanya yotutana mu Bible dyalelo.​—Mitōto 119:105; 2 Temote 3:16, 17.

3. I madingi’ka āpelwe banunu bana-balume ne bana-bakaji na Polo?

³ Mu mukanda wātumine mutumibwa Polo kudi Tetusa, wāmulombwele’mo buludiki bwa kamweno ku boba benda banunupa. Wāsonekele’mba: “Bāna-balume bakulumpe bēkale kwifula, ne kubulwa kusepakanasepakana, ne kwilemeka senene, ne kukoma mu kwitabija, ne lusa, ne mu kwitūkija mutyima. Bāna-bakaji bakulumpe nabo mo monka, bēkale bajila mu ngikadilo mwabo, kebalubabopo, mhm, nansha kumunwa na vinyu mingi, mhm, bēkale bafundiji ba bilumbuluke.” (Tetusa 2:2, 3) Kuta mutyima ku bino binenwa kukokeja kukwikadija senene umbununu bobe.

IBIDILA BWANAPABO BWA BOBE BANA

4, 5. I kika kiloñanga bambutwile bavule patalukanga babo bana ku njibo yabo, ne i muswelo’ka wibidilanga bamo-bamo ino ngikadila impya?

⁴ Kwalamuna mikadila kulombanga kwiibidija na bwino. I kyabine, nakampata shi bana ke batame, abasonge, pano kebaviluka ku njibo! Kino kyo kintu kibajinji kiyukilanga’po bambutwile bavule amba ke banunu. Nansha byobekalanga na nsangaji pa kumona lwabo lutundu lwenda lutama, ino pavule bekalanga na mityima myapuke pamwanda wa babo bana, amba shi bakabwanya kwiludika abo bene senene. Kadi bevwananga melu a kwikala nabo mu yabo njibo.

⁵ Omwanda bambutwile basakilanga nyeke babo bana bukomo, nansha shi ke balupuke kala mu yabo njibo. Inabana umo wānene’mba: “Yō, shi nadi’mba ntambulanga nansha mawi atamba kobadi, alombola’mba i bakomo, longa nsangalanga.” Shabana umo usekununa’mba: “Pāvilukile wetu mwana mwana-mukaji ku yetu njibo, wādi mwanda mukatampe. Wāshile kipunzu kikatampe mu kisaka, mwanda twādi nyeke tulongela bintu byonso pamo.” Lelo i muswelo’ka wēnyongolwele bano bambutwile mu milangwe ya kushībwa na babo bana? Pavule i na kuta bantu bakwabo mutyima ne kwibakwasha.

6. I kika kikwashanga kisaka kikale kulama kipwano mu muswelo mufwaninwe?

⁶ Shi bana abasonge, mikadila ya bambutwile yalamukanga. Ngalwilo 2:24 unena’mba: “Mwana-mulume [ukashia] shandi ne inandi mwine, ukalamata kudi wandi mukaji, ino abo bonso babidi ke ngitu imo yonka.” Kwitabija misoñanya ya Leza itala pa bu-mutwe ne pa ndudi miyampe kuyukijanga bambutwile kutūla bintu pa bifuko bibifwaninwe.​—1 Kodinda 11:3; 14:33, 40.

7. Shabana umo wātamije ngikadilo’ka milumbuluke pātalukile bandi bana bana-bakaji ku yabo njibo, bākafīka ku malubo?

⁷ Ba mulume ne mukaji bamo bāsongeje babo bana babidi, pa kukafīka’bo ku malubo, bāshala na kipunzu kikatampe umbūmi bwabo. Ku ñanjilo, shabana wāshikilwe bandi bako. Ino’nka pa kulanguluka pa musoñanya wa bu-mutwe, wānañuna’mba bandi bako bo ke bene kiselwa kya kulama bipango byabo. Penepo, shi bandi bana abamulombe madingi, wibepangulanga bidi mulangila’po babo balume, nandi walondela monka. Pano bandi bako bamumonanga pamo bwa mulunda nabo ne kwitabija madingi aebapa.

8, 9. I muswelo’ka ulekanga bambutwile bamo-bamo babo bana beludike abo bene?

⁸ Lelo kikekala namani shi ba mulume ne mukaji betundaile pano-pano, nansha shi mwendele Bisonekwa kebajilulangapo, ino bapela kulonda bibasakila babo bambutwile? Ba mulume ne mukaji bāsongeje babo bana banena’mba: “Twibakwashanga nyeke na kwibalombola mumweno wa Yehova, ino nansha shi mbila yobetyibile abo bene keitusangejepo, twitabijanga’yo, twebakwasha ne kwibakankamika.”

⁹ Mu matanda amo-amo a mu Azia, bainabana kebasakilangapo babo bana bana-balume kwiludika abo bene. Inoko, kukōkela ku ndudi ya bwine-kristu ne bu-mutwe ye kwibatyepejejanga kwipotomeja na bakaji ba babo bana. Mwana-mukaji umo unena’mba monanga kulupuka kwa bami bana bana-balume ku yetu njibo bu “mwanda onkashala netendela nyeke.” Usepelelanga mpata muswelo obakwatakanya bipango byabo na bwino. Kino i kibatentule kiselwa, aye ne wandi mulume, ku ngitu ne mu milangwe yabo mu bununu bwabo.

NINGISHAI KIJIMBA KYA BUSONGI BWENU

10, 11. I madingi’ka a mu Bisonekwa akakwasha bantu bekale kwepuka makinga amo-amo aponenanga’mo babitumbafumu?

¹⁰ Shi muntu wafikila pa kitatyi kya bu kitumbafumu, milongelo yandi ikalanga yalamuka. Bana-balume bashilula kuvwala bya busongwalume. Bana-bakaji basela mityima kūlu, pa kuvuluka mukebazonzela ngitu pakapwa lubutulo munda. I kyabulanda, babitumbafumu bamo-bamo bakolomonanga kīnji ne mukao wa babo bakaji pa kutembwija-tembwija bansongwakaji. Ino bana-balume banunu bakwakamwa Leza bayukile “kukomeja mutyima” ne kulwa na bilokoloko bibi. (1 Petelo 4:7) Ne bana-bakaji bapye nabo mo monka, baloñanga bukomo bwa kulama busongi bwabo, mwanda basenswe babo balume ne kusaka kusangaja Yehova.

¹¹ Mulopwe Lemwele wātendele, ku bukomo bwa mushipiditu, “mwana-mukaji mulumbuluke” uyukile kulongela wandi mulume byonka “biyampe ke bibipo, mhm, mafuku onsololo a būmi bwandi.” Mulume mukristu kabulwepo kutendela wandi mukaji pangala pa muswelo walwa na milangwe isansa ku mutyima imufikila mu myaka ya bununu bwandi. Buswe bwamusenswe bo bukamutūtula pa mutyima ‘amutendele.’​—Nkindi 31:10, 12, 28.

12. I muswelo’ka ukokeja kuningisha ba mulume ne mukaji bumo bwabo pobenda banunupa?

¹² Mu myaka yomwādi mwikonda na kulela bana, banwe bonso mwādi mulonga bukomo bwa kusūla bintu byādi bimusangaja mwanda wa kuta mutyima ku bisakibwa bya benu bana. Shi abavilukila kwabo, kyo kitatyi kya kuloeja kadi busongi bwenu. Mwana-mulume umo unena’mba: “Pātalukile betu bana bana-bakaji ku yetu njibo, nashilwile kutweja bukena dipya na wami mukaji.” Mukwabo nandi unena’mba: “Umo ne umo utele mutyima ku bukomo bwa ngitu ya mukwabo, kadi twivulujanga batwe bonso mvubu ya kwipwija mukose.” Pa kyaba kya kulanga bana bebashile, aye ne wandi mukaji batambulanga na kizaji banabetu ba pa kipwilo. Eyo, kuta mutyima ku bakwetu kuletanga madyese. Kutabukidila, kisangajanga Yehova.​—Fidipai 2:4; Bahebelu 13:2, 16.

13. Kunena na mutyima umo ne budimbidimbi mpika kukokeja kukwasha ba mulume ne mukaji muswelo’ka bekale kununupila pamo?

¹³ Kemufwaninwepo kubulwa kwisambila pamo na mwine-pobe. Mwisabilei pamo pakubulwa kafinda. (Nkindi 17:27) Mwana-mulume umo unena’mba: “Tuloejanga kwitēleka umo ne mukwabo na kwita mutyima ne kwilēmeka.” Wandi mukaji witabija’mba: “Pano byoketudi banunu, tutomenanga tyai pamo, kwisamba, ne kwiangula batwe bonso.” Kunena kobe kwakubulwa kafinda ne budimbidimbi mpika kukokeja kuningisha kijimba kya busongi bwenu, kwibupa mutyika keukokeja kusabwa na miketo ya Satana, umpomoni wa masongi.

SANGELA BOBE BANKANA

14. I mwingilo’ka wāvuije nkambwa Temote mwana-mukaji mwanda wa kumukwasha ekale mukristu?

¹⁴ Bankana ye “kilongo” kya banunu. (Nkindi 17:6) Bupwani na bankana bukokeja kuleta nsangaji yabinebine—kinsañanya ne kutalaja mutyima. Bible utendelanga Loisa, wāfundije wandi munkana Temote nkulupilo yandi, pamo ne wandi mwana Yunisa. Uno nkasampe wātamine muyuke’mba, inandi ne nkambo wandi bādi balēmekele bubinebine bwa mu Bible.​—2 Temote 1:5; 3:14, 15.

15. Pa mwanda utala bankana, i mwingilo’ka wa bulēme ukokeja kuvuija bankambo wabo, ino i kika kyobafwaninwe kwepuka?

¹⁵ Kino i kipindi kya pabula kifwaninwe kupāna’mo bankambo bukwashi bukatampe. Banwe bankambo, muyukile kala momwādi mulombwela benu bana buyuki butala pa mpango ya Yehova. Ne pano longelai monka na lukongo lukwabo! Banuke bavule basangalanga bininge pa kwivwana bankambo babo bebasekunwina mānga ya mu Bible. Kyabine, kekishintululapo amba mukatentula bashabana kiselwa kya kufundija babo bana bubinebine bwa mu Bible, mhm. (Kupituluka 6:7) Inoko mwibakwashei’ko. Lombelai pamo na mwālombedile mulembi-wamitōto’mba: “Pa kununupa ne mvwi ku mutwe, abe Leza, kokandekelela; poso’mba, mpwe kusapula bidi bukomo bobe ku lukongo lukwabo lwiyako, ne bukomo bobe bukata kudi bonso bakāyako.”​—Mitōto 71:18; 78:5, 6.

16. I kika kifwaninwe kulonga bankambo, kutyina’mba bakaleta nkalañani mu kisaka?

¹⁶ I kyabulanda, bankambo bamo-bamo balelemunanga banuke, kino ye kilengejanga kubulwa kumvwañana na babo bana ke batame. Ino shi ukwete bobe bankana na kanye kabine, bakashilula kukusapwila myanda yobafwanga bumvu kusabila babo bambutwile. Pavule, banuke bakulupilanga’mba bankambo babo bakokeja kwibēlela kunyuma kumeso a babo bambutwile. Ino ukalonga namani? Ingidija tunangu ne kukankamika bobe bankana, bekale kusabila babo bambutwile myanda. I kiyampe kwibashintulwila’mba kulonga namino kusangajanga Yehova. (Efisesa 6:​1-3) Shi kyendelemo, ukokeja kubadikila kulombola benu bana myanda isaka kwibayukija benu bankana. Sapwila bobe bankana pakubulwa kafinda bintu byoyukile umbula bwa myaka yowalāla. Kunena kobe kwa na mutyima umo ne budimbidimbi mpika, kukekala kwa kamweno kobadi.

WIENDEJE MUNGYA BUKULUMPE BOBE

17. I kusumininwa kwa muswelo’ka kwādi na mulembi-wamitōto kufwaninwe kwiula banunu?

¹⁷ Mu kwenda kununupa, ukamona bintu bivule byowādi ulonga nansha byosaka kulonga byashilula kukukomena. Lelo i muswelo’ka ukokeja kununupa muntu senene? Dimo-dimo ukokeja kwifwatakenya’mba nakidi na myaka 30, ino pa kwitala mu dikalashi wemona bingi. Komeja mutyima. Mulembi-wamitōto wāabije Yehova’mba: “Kokangela pa mwaka wa bununu; kokandekelela pa kulonga bukomo bwami ke bwenda bupwa.” Tompa kwiula kusumininwa kwādi na mulembi-wamitōto. Wānene’mba: “Nanshi nkakulupilanga nyeke, ne kukakutendela, ñenda ninga.”​—Mitōto 71:9, 14.

18. I muswelo’ka ukokeja kwingidija mukristu mupye kitatyi kyandi kupwa kwa kukwata pasho?

¹⁸ Bavule babadikilanga kwiteakanya mwanda wa kukalundila’ko mitendelo yabo kudi Yehova kupwa kwa kukwata pasho. Shabana umo mukwate pasho unena’mba: “Nateakenye kala bintu byonso bya kukalonga pakapwija wetu mwana mwana-mukaji masomo. Nātyibile mbila ya kushilula mwingilo wa busapudi wa kitatyi kyonso, kupwa napoteja bintu byonso byonādi nsunga mwanda wa kushala na bwanapabo bwa kwingidila Yehova kitatyi kyonso. Nādi nombela Leza andudike senene.” Wivwane nobe utengēle kukwata pasho, nankyo teja binenwa bya Umpangi wetu Mukatakata bya kukusenga pa mutyima: “Ne ku bununu bobe ami ne aye enka; kabidi ne ku nywene ne mvwi-to-o nkemuselanga.”​—Isaya 46:4.

19. I madingi’ka apelwe boba benda banunupa?

¹⁹ Kwibidila būmi bwa pasho ke mwandapo upēla. Mutumibwa Polo wādingile banunu kwikala “senene umbyonso, MB.” Kino kilomba kwilama mu bintu bivule, kuleka kukimba enka būmi bwa kubulwa masusu. Muntu mukwate pasho ukokeja kwipāna mu mwingilo kampanda difuku ne difuku ne kusumininwa kupita mwādi wikilongela pākidi na kaji. Nanshi ikala “muvudilwe [bya kulonga] pakatampe pene, mafuku onso nyeke, monka mu mīngilo ya Mfumwetu, pa mwanda o mwayūka’mba, kuputumina kwa mu mīngilo yenu kekudipo kwa bitu[pu]bitupu mudi Mfumwetu, ehe.” (1 Kodinda 15:58) Vudija mingilo yobe mwanda wa kukwasha’ko bakwenu. (2 Kodinda 6:13) Bakristu bavule bekiloñanga na kusapula myanda miyampe na bupyasakane mungya pafudile bukomo bwabo. Ikala ‘mukomo mu lwitabijo, mu buswe ne mu kūminina’ umbununu bobe.​—Tetusa 2:2.

KULWA NA MILANGWE YA KUFWILWA MWINE-POBE

20, 21. (a) Mu ino ngikadilo ya bintu, i kika kikokeja kusansanya ba mulume ne mukaji? (b) I kika kyālongele Ana kishele bu kimfwa kilumbuluke ku bakaji-ba-bafu?

²⁰ Mu ino ngikadilo ya bintu, mwenda mafuku, balume ne bakaji bakalañanibwanga na lufu, bine i kya bulanda. Bakristu bafwidilwe bene-pabo bayukile’mba bakena babo pano balēle, ne bakulupile’mba difuku dimo bakebamonanga. (Yoano 11:11, 25) Lufu byolukipepeja bantu mityima, lelo i kika kikokeja kulonga’po yewa washala mūmi?a

²¹ Kuvuluka muswelo wālongele bantu bakwabo besambilwe’po mu Bible, kukokeja kumukwasha. Kimfwa Ana, wāijije umbusongi’nka myaka isamba-ibidi kete, wandi mulume wāfwa, ino tutañanga’mba wādi ke mununu wa myaka 84. Pāfwile wandi mulume, wāshele na kyaso kikatampe. Lelo wālongele’po kika? Wādi wingidila Yehova Leza mwingilo ukola mu tempelo yandi, mwinya ne bufuku. (Luka 2:36-38) Bine, mwingilo wādi uvuija Ana ne kushikilwa na milombelo, ye byādi bimutūkija milangwe ya bulanda ne ya bushiyena bwa bu mukaja-mufu.

22. Lelo i muswelo’ka unekenyanga balume ne bakaji-ba-bafu bamo-bamo milangwe ya bushiyena?

²² Myaka 10 kunyuma, mukaja-mufu umo wa myaka 72 wānene’mba: “Kintu kikatampe kyondwa nakyo pano i kubulwa mwisambi-nami. Wami mulume wādi muntu uyukile kuteja. Twādi twisamba nandi nyeke myanda itala pa kipwilo ne pa mwingilo wetu wa busapudi.” Mukwabo unena’mba: “Nansha binenanga bantu’mba kyaso kibelukanga mu kulāla mafuku, ino ami mona bu i kyoloke kunena’mba, kubeluka kwimanine pa bintu bilonga wakyaso mwine. Mwanda ye mwine udi pa kyaba kilumbuluke kya kukwasha bakwabo.” Mulume-wakishala umo wa myaka 67 unena’mba: “Muswelo mulumbuluke wa kwipwa milangwe i kwipāna abe mwine mu kusenga bakwabo.”

MULĒME KUMESO A LEZA UMBUNUNU BWANDI

23, 24. Le Bible upanga banunu kikulupiji’ka kikatampe, nakampata boba bafwidilwe bene-pabo?

²³ Nansha shi wi mufwilwe mwine-pobe osenswe, yuka’mba Yehova i wabinebine nyeke, wakukulupilwa. Davida, Mulopwe wakala, wāimbile’mba: “I kimo kyonka kyonalomba kudi Yehova, e kyonka kyo nkalondalonda; na’mba ngikale mu njibo ya Yehova mafuku onso a būmi bwami, mandila buya bwa Yehova, ne kulanga mu njibo yandi īkola.”​—Mitōto 27:4.

²⁴ Mutumibwa Polo usoñanya’mba: “Lemeka bakaji-ba-bafu bafudilwe binebine.” (1 Temote 5:3) Madingi alonda pa uno musoñanya alombola’mba bakaji-ba-bafu bafudilwe binebine, bakubulwa ba ku wabo musuku wa munda, bakokeja kupebwa bukwashi bwa bintu bya kungitu na kipwilo. Inoko kishima ‘kulēmeka’ kidi ne na buluji bwa kwibapa bulēme, kwibakwata na mutyika. Bine balume ne bakaji-ba-bafu baseñwanga pa mutyima bininge pa kuyuka’mba Yehova wibakwete na bulēme ne kebalekelelepo!​—Yakoba 1:27.

25. I kitungo’ka kifwaninwe kwitungila banunu?

²⁵ Kinenwa kya Leza kya ku bukomo bwa mushipiditu kinena’mba: “Būya bwa banunu . . . i mvwi pa mutwe.” Mwanda mutwe wa mvwi “i kilongo kya ntumbo, ukatanwa mu dishinda dya boloke.” (Nkindi 16:31; 20:29) Omwanda nanshi, endelela na kutūla mwingilo wa Yehova pa kifuko kibajinji mu bobe būmi, wikale musonge nansha wakubulwa kusonga. Ukapebwa dijina dilumbuluke na Leza tamba’nka pano, ne būmi bwanyeke mu mafuku akāya kumeso, pakafundulwa masusu atamba ku bununu pano pantanda.​—Mitōto 37:3-5; Isaya 65:20.