Kifundwa 1

Muswelo Okokeja Kuyuka Kyokya Kisaka Leza

I myanda’ka ya mvubu itanwa mu Bible? (1)

Mulembi mwine wa Bible lelo i ani? (2)

Mwanda waka ufwaninwe kwifunda Bible? (3)

1. Bible i kyabuntu kilēme kitupele Leza. Udi pamo bwa mukanda utamba kudi shabana wa buswe watumīne bandi bana. Witulombolanga bubinebine bwa padi Leza​—aye i ani ne byasaka i bika. Ushintulula muswelo wa kunekenya makambakano ne wa kutana nsangaji yabine. I enka Bible kete ye witusapwila kyotufwaninwe kulonga mwanda wa kusangaja Leza.​—Mitōto 1:1-3; Isaya 48:17, 18.

2. Bible wāsonekelwe na bantu kubwipi kwa 40, mu bula bwa myaka 1 600 ne musubu, tamba mu 1513 K.K.K. I mubundwe na mikanda mityemitye 66. Boba bāsonekele Bible bāpelwe bukomo bwa mushipiditu na Leza. Bāsonekele milangwe yandi, ke ya abo benepo. Nanshi Mulembi mwine wa Bible i Leza momwa mūlu, ke muntupo wa pano panshi.​—2 Temote 3:16, 17; 2 Petelo 1:20, 21.

3. Leza wātengele’po kuboko, Bible wātentulwa pakubulwa kilema, kadi wālamwa senene. Mabible atampwanga mavulevule kutabuka kitabo kikwabo kyo-kyonso. Ke bantu bonsopo bakasangela kukumona wifunda Bible, inoko kokaleka kino kikukalakanye. Būmi bobe bwa nyeke bwa kumeso bwimanine pa kobe kufikila pa kuyuka Leza ne kulonga kiswa​-mutyima kyandi nansha shi bakukankaja.​—Mateo 5:10-12; Yoano 17:3.