Kifundwa 14

Mwikadile Bulongolodi bwa Batumoni ba Yehova

I kitatyi’ka kyāshilwile ngalwilo ya Batumoni ba Yehova ya mu kino kyetu kitatyi? (1)

Lelo kupwila kwa Batumoni ba Yehova kwendejibwanga muswelo’ka? (2)

I kwepi kulupukanga lupeto lobengidijanga? (3)

I bāni batangidile kumeso mu kipwilo ne kipwilo? (4)

I kupwila’ka kukatampe kupwilwanga ku mwaka ne mwaka? (5)

I mingilo’ka ingilwanga ku kité kyabo kitala mingilo kujokoloka ntanda yonso ne mu mabilo a misambo? (6)

1. Batumoni ba Yehova bāshilwile ngalwilo yabo ya mu kino kyetu kitatyi mu myaka ya 1870. Dibajinji bādi batelwa bu Befundi ba Bible. Ino mu 1931, bāsela dijina dya mu Bisonekwa dya bu Batumoni ba Yehova. (Isaya 43:10) Bulongolodi bwāshilula kutandabuka bityebitye na bantu batyetye ku ñanjilo, kufika ne ku midiyo ne midiyo ya Batumoni baputumina mu busapudi dyalelo mu matanda 230 ne kupita.

2. Bipwilo bivule bya Batumoni ba Yehova bipwilanga misunsa isatu ku yenga ne yenga. Nobe wi mwitwe kukatanwa ku kupwila ko-konso. (Bahebelu 10:24, 25) Byonso byobafundijanga bitambanga mu Bible. Kupwila kushilulanga na milombelo kadi kwafula na milombelo. Ku kupwila kuvule, kwimbwanga ne ‘ñimbo ya ku mushipiditu’ ikunka ku mutyima. (Efisesa 5:18, 19) Mutwelwanga bitupu pakubulwa kufuta, kadi kebalombanga’mopo mukongo wa lupeto.​—Mateo 10:8.

3. Bipwilo bivule bipwidilanga mu Mobo a Bulopwe. Ao ano obakwanga mu mūbakilo upēla na Batumoni ba kwituma. Kukamonepo bankishi, misalaba, nansha bintu bya uno muswelo mu Njibo ya Bulopwe. Lupeto lutambanga ku byabuntu bitūlwanga pakubulwa nsengwa. Ku boba basaka kutūla byabuntu, kudi kasanduku ka kutūla’mo byabuntu.​—2 Kodinda 9:7.

4. Mu kipwilo ne kipwilo, mudi bakulumpe, ke batadi kadi. Ye abo batangidile kumeso mu kufundija mu kipwilo. (1 Temote 3:1-7; 5:17) Bangulwanga’ko na bengidi ba mingilo. (1 Temote 3:8-10, 12, 13) Bano bana​-balume kebadipo peulu pa basapudi bakwabo ba pa kipwilo. (2 Kodinda 1:24) Kebapelwepo bitenta bya pa bula. (Mateo 23:8-10) Kebavwalangapo mu muswelo mwishile na wa bakwabo. Kadi kebafutwangapo pa mwanda wa mingilo yabo. Bakulumpe bavuijanga bisakibwa bya ku mushipiditu bya kipwilo na mityima tō. Baseñanga bakwabo pa mutyima ne kuleta bulombodi mu bitatyi bya makambakano.​—Yakoba 5:14-16; 1 Petelo 5:2, 3.

5. Kadi Batumoni ba Yehova bekalanga na kubungakana kukatampe nansha bitango mwaka ne mwaka. Mu bitatyi bya uno muswelo, bipwilo bivule bikalanga bibungila pamo mwanda wa kulonda mpangiko ya pa bula ya bufundiji bwa Bible. Ku kubungakana ne kubungakana nansha ku kitango ne kitango kwikalanga kubatyijibwa nyeke bana ba bwanga bapya.​—Mateo 3:13-17; 28:19, 20.

6. Kité kine kikatampe kitala mingilo ya Batumoni ba Yehova kidi mu New York. Ko ako kudi Kitango Kyendeji, kibundilwe na bakulumpe bapose mu lwitabijo batala mingilo ya bipwilo kujokoloka ntanda yonso. Kadi kudi misambo 100 ne musubu kujokoloka ntanda yonso. Ku bino bifuko, kwikalanga bengidi ba kwituma bavule bakwasha ku kutampa ne ku kutuma mabuku a myanda ya mu Bible. Kadi ko ako kutamba ne bwendeji bwa kulongolola mwingilo wa busapudi. Lelo nobe wabulwa’po kukunga lwendo lwa kukayuka musambo wa kubwipi na kwenu?