Kifundwa 15

Kwasha Bakwabo Nabo Balonge Kiswa-Mutyima kya Leza

Mwanda waka ufwaninwe kusapwila bakwabo myanda yowifunda? (1)

I bāni bokokeja kusapwila myanda miyampe? (2)

Mwiendelejo obe ukokeja kwikala na lupusa’ka pa bakwabo? (2)

I kitatyi’ka kyokokeja kushilula kusapula pamo na kipwilo? (3)

1. Pano kodi mwifunde bintu bivule biyampe bya mu Bible. Buno buyuki bufwaninwe kukufikija ku kutamija bumuntu bwa bwine Kidishitu. (Efisesa 4:22-24) Buno buyuki budi na mvubu mikatampe kodi mwanda ukamwena’mo būmi bwa nyeke. (Yoano 17:3) Inoko, ne bakwabo nabo bafwaninwe kwivwana myanda miyampe, nabo bakapande. Bene Kidishitu babine bonso bafwaninwe kusapwila bakwabo ino myanda. I musoñanya utambile kudi Leza.​—Loma 10:10; 1 Kodinda 9:16; 1 Temote 4:16.

2. Ukokeja kushilula na kusapwila bakwabo bomushikete nabo bintu biyampe byowifunda. Sapwila’byo ba mu kyenu kisaka, balunda nobe, bakwenu ba ku masomo nansha ba ku kaji. Ikala na kanye ne na kitūkijetyima kitatyi kyowibasapwila’byo. (2 Temote 2:24, 25) Vuluka amba bantu batalanga nakampata mwikadilo wa muntu kupita’ko kwivwana byaebasapwila. O mwanda mwikadilo obe muyampe ukokeja kukoka bantu bakwabo bavule nabo bevwane musapu owibasapwila.​—Mateo 5:16; 1 Petelo 3:1, 2, 16.

3. Mwenda mafuku, ukokeja kubwanya bisakibwa bya kufikila pa kushilula kusapula pamo na kipwilo kya Batumoni ba Yehova ba mu kyenu kibundi. Dino i ditabula dya mvubu mikatampe mu kwendelela kobe. (Mateo 24:14) Wivwane nobe ubwanye kukwasha muntu mukwabo ekale ke mwingidi wa Yehova, nandi akapebwe būmi bwa nyeke, bine ikekala nsangaji mikatampe mpata!​—1 Tesalonika 2:19, 20.