Shapita wa Bubidi

Tumbija Yehova Mwanda Ye Leza Umo Kete wa Bine

1. Lelo Leza umo kete wa bine i ani?

BIBLE unena’mba nansha byokudi baleza bavule, ino “kudi bātwe [kudi] Leza umo enka, Tata.” (1 Kodinda 8:5, 6) Uno “Leza umo” i Yehova, Umpangi wa bintu byonso. (Kupituluka 6:4; Kusokwelwa 4:11) Yesu wāmutelele bu “Leza wami, kadi i Leza wenu.” (Yoano 20:17, MB) Wāpitulukile mu byānene kala Mosesa amba: “Yehova aye i Leza; kutupu ungi mukwabo poso’nka aye’wa kete.” (Kupituluka 4:35) Yehova upityile kulampe kwine bintu byo-byonso bitōtwa, shi bankishi, shi bantu bamonwa bu baleza, nansha ke Satana Dyabola mwine, walwana nandi, “leza wa panopantanda.” (2 Kodinda 4:3, 4) Yehova i mwishile na bano bonso, mwanda Yesu wāmutelele bu “Leza umo kete wa bine.”—Yoano 17:3, NW.

2. Būmi bwetu bukashinta namani ponso potwifunda kuyuka Leza?

² Bantu ba mityima ya kufwija’ko pobefundanga ngikadilo ikoka ya Leza, bintu byalongele ne byaketulongela, kebabulwangapo kufwena kwadi. Buswe bobaswele Yehova pa kwenda kutama, mutyima wabo wa kumutumbija nao wenda wibasoloka. Namani? Muswelo umo bidi i na kusapwila bakwabo myanda imutala. Loma 10:10 unena’mba: “Ku kyakanwa nako ko kunenena ku lupandilo.” Muswelo mukwabo i na kumwiula mu binenwa ne mu bilongwa. Efisesa 5:1 (Bisonekwa Bitokele) unena’mba: “Iulai Leza bwi bandi bana baswe.” Pa kwiula Yehova biyampe shē, tufwaninwe bidi kuyuka mwaikadile binebine.

3. I ngikadilo’ka mikatampe ya Leza?

³ Mu Bible yense mutuntulu mudi binenwa bivule bituyukija ngikadilo ya kutendelwa ya Leza. Ngikadilo yandi iná mikatampe i tunangu, boloke, bukomo, ne buswe. “Mu Aye mo mudi tunangu.” (Yoba 12:13, BB) “Masinda andi onso bo boloke.” (Kupituluka 32:4, BB) Udi na “bukatampe bwa bukomokomo.” (Isaya 40:26) “Leza i buswe.” (1 Yoano 4:8, BB) Inoko, mu ino ngikadilo iná mikatampe ya Leza, i yepi imo ya kutendelwa bininge, mine iyukanya mwaikadile kupita mikwabo yonso?

“Leza I Buswe”

4. I ngikadilo’ka ya Leza mine yāmutonwene apange diulu ne ntanda ne byūmi byonso bidi’mo?

⁴ Langa’po bidi kyātonwene Yehova apange diulu ne ntanda, bipangwa bya ñeni bya ku mushipiditu ne bya ku ngitu. Le i tunangu, nansha i bukomo bwandi? Mhm, nansha Leza byaāingidije ino ngikadilo, inoko ke ayopo yāmutonwene. Kadi ke bolokepo bwandi bwāmulengeje kupa bakwabo kyabuntu kya būmi. Ino i buswe bukatampe bwa Leza bo bwāmufikije ku kusambwila bakwabo nsangaji ya kwikala na būmi bwa ñeni. Buswe bo bwāmutonwene akwate’ko mpango ya kupa bantu ba kikōkeji būmi bwa nyeke mu Paladisa. (Ngalwilo 1:28; 2:15) Kadi buswe bo bwāmufikije ku kukwata mpangiko ya kufundula mambo āpile bantu kudi Adama.

5. Kukwatañana na Bible, Yehova i kimfwa kīsokwele kya ngikadilo’ka ne mwanda waka?

⁵ Nanshi, mu ngikadilo yonso ya Leza, ngikadilo itabukile mikwabo i buswe. Bo bumuntu bwandi bwinebwine. Bible kanenepo pantu nansha pamo amba Yehova i tunangu, boloke, nansha bukomo, nansha ino ngikadilo byoidi ya mvubu. Ino unena amba Yehova i buswe. Bine, Yehova ye kimfwa kīsokwele kya buswe. Buno buswe buludikwanga na misoñanya, ke na kitumbuzajipo. Buswe bwa Leza buludikwanga na misoñanya ya bubinebine ne boloke. I buswe bwa peulu pa peulu, monka mobwilombwela mudi Yehova Leza mwine. Buswe budi namino kebwisakilangapo nansha dimo, kadi bumwekanga nyeke mu bilongwa.

6. I bika bitukwasha tumone kwiula Leza nansha byadi mukatampe kwitupita?

⁶ Buno buswe, ngikadilo ya kutendelwa, bo bwitukwasha twiule Leza. Dimodimo tukokeja kulanga amba ketubwanyapo kumwiula biyampe, mwanda twi bantu batyetyetyetye, bakubulwa kubwaninina, babipya-mambo. Ino ivwana kilomboji kikwabo kya buswe bukatampe bwa Yehova: Uyukile mikalo yetu, kadi ketulombangapo kwikala babwaninine. Uyukile amba pano ketudipo nansha kubwipi kwine na bubwaninine. (Mitōto 51:5) O mwanda Mitōto 130:3, 4 unena’mba: “Shi abe, Yehova, ubangile mambo nankyo le i ani, a Mfumwami, ukēmananga? Ino kudi abe ko ku kulekelwa kwa mambo.” Bine, Yehova i Leza “muyule lusa ne buntu, wija pakufuna bulobo, kadi i wa kanye ka ntanda ne ntanda.” (Divilu 34:6) “Abe, Mfumwami, wi muyampe, ne mutyima wa lubilo wa kulekela (myanda).” (Mitōto 86:5) Bine, i kintu kitusenga mpata! Bine tutūkijanga mutyima pa kwingidila uno Leza wa kwanwa, ne pa kwimwena buswe bwandi ne mutyima wandi wa lusa!

7. Tukokeja namani kumona buswe bwa Yehova mu mingilo yandi ya bupangi?

⁷ Buswe bwa Yehova bumwekanga ne mu mingilo yandi ya bupangi. Langa’po bidi bintu bivule bilumbuluke bitupele Yehova bya kwitusangaja, kimfwa ngulu minengele, mató, majiba, ne tulunga-lui. Witupele kadi bidibwa kapwila bishileshile bya kwivwana’ko butobaji ne kwitupa bukomo. Kadi Yehova i mwitupe ne maluba malumbuluke a ntanda ne miseke adi na luvumba luyampe, kutentekela’po ne banyema ba kufwa lubandi. Wālongele bino bintu bya kusangaja bantu, nansha byakādipo unenwe’nka kwibilonga. I bine, ketudipo mwa kusangela bipangwa byandi ne pa mfulo mwanda tudi mu ntanda imbi, kadi mu ngikadilo yambulwa kubwaninina. (Loma 8:22) Ino langa’po bintu biketulongela Yehova mu Paladisa! Mulembi wa mitōto witukulupija’mba: “Abe ubalanga kuboko kobe, wikutyija mityima ya bintu byonso byumi.”—Mitōto 145:16.

8. I kilomboji’ka kine kikatampe kya buswe bwituswele Yehova?

⁸ Lelo i kilomboji’ka kine kikatampe kilombola buswe buswele Yehova bantu? Bible ushintulula’mba: “Aye Leza byāsenswe bapanopantanda nenki, wapana Mwana wandi wa bunka’mba, bonso bakumwitabija nankyo kebakonekapo, ehe, poso batambule būmi bwa kulādila monka nyeke ne nyeke.” (Yoano 3:16) Lelo Leza wātumine wandi Mwana pa mwanda wa buyampe bwa bantu? Loma 5:8 (MB) ulondolola’mba: “Leza wetulombola mwaetusanshilwe’mba po twakidi babipyamambo, Kidishitu wetufwidile.” I amo, Leza wātumine wandi Mwana mubwaninine pano panshi amba apāne būmi bwandi bu kitapwa kya kikūlwa mwanda wa kwitunyongolola ku mfuto ya bubi ne lufu. (Mateo 20:28) Kino kyo kyāshitwidile bantu baswele Leza dishinda dya kukamona būmi bwa nyeke. I bya dyese, mwanda buswe bwa Leza bulombolwanga boba bonso basaka kulonga kiswa-mutyima kyandi, mwanda Bible witusapwila’mba: “Leza kalemekangapo bantu’mba: Yeu ye yeu, mhm. Nanshi mu mizo yonso enka umutyina, ulonga bilumbuluke nabya ye waitabijibwa kudi aye.”—Bilongwa 10:34, 35.

9. Kuyuka kotwayuka amba Yehova witupele wandi Mwana bu kikūlwa kufwaninwe kwitwikadija namani?

⁹ Kuyuka kotwayuka amba Yehova i mupāne wandi Mwana bu kikūlwa kya kwitushitwila dishinda dya būmi bwa nyeke, kufwaninwe kushinta namani muswelo otwingidija būmi bwetu? Kufwaninwe kutamija buswe bwetu bwa mushike botuswele Yehova, Leza wa bine. Kadi kufwaninwe kwitupa mutyima wa kuteja Yesu, mwine utuminwe na Leza. “[Yesu] wafwidile bonso’mba, boba badi ne būmi kebakeikadilangapo na būmi abo bene, mhm, i padi aye webafwidile.” (2 Kodinda 5:15) Bine, i kya nsangaji mpata kulonda mu matabula a Yesu, mwanda aye wāletele kimfwa kya mwa kwiwila buswe ne lusa lwa Yehova! Kino i kimweke mu binenwa byānene Yesu ku betyepeje amba: “Iyai kwami bānwe bonso bakuputuma na mīngilo, ne bakulemenwa, nabya nami nkemutukija’byo biyampe. Twela mu lupungu lwami lwa bu-umpika, muboīle manwa kudi ami, ke-ne-muntu amiwa ne wakukōkela, kadi ngidi ne bumvu pa mutyima, ebiya nabya mukamonanga mityima mitūke biyampe. Mwanda lupungu lwami lwa bu-umpika ludipo biyampe ne kiselwa kyami nakyo kyonka kipela.”—Mateo 11:28-30.

Tulombolei Buswe ku Bakwetu

10. I miswelo’ka imoimo yotukokeja kulombola buswe ku banabetu bene Kidishitu?

¹⁰ Tukalombola namani amba buswe botuswele banabetu bene Kidishitu budi pamo na bobwa bobetuswele kudi ba Yehova ne Yesu? Ivwana miswelo mivule ya kulombola’bo: “Buswe budi na kitūkijetyima ne kanye. Buswe kebudipo na mukao, kebwianyangapo, kebwitatulangapo, kebuloñanga byampikwa kwendela’mo, kebukimbangapo tumweno twa abo bwine, kebukwatwangapo nsungu. Kebuvulukangapo kisansa. Kebusepelelangapo pangala pa bukondame, ino abo busepelelanga pangala pa bubinebine. Butyumwinanga byonso mu manwi, bwitabijanga byonso, bukulupilanga byonso, būmininanga byonso. Buswe kebukankalwangapo.”—1 Kodinda 13:4-8, NW; 1 Yoano 3:14-18; 4:7-12.

11. I bāni bakwabo botufwaninwe kuswa, ne muswelo’ka?

¹¹ Lelo i bāni bakwabo botufwaninwe kulombola buswe, ne muswelo’ka? Yesu wānene amba: “Endai nanshi mukafundijei mizo yonso ya bantu nabo ke bāna-babwanga, kwibabatyija mu dijina dya Tata, ne dya Mwana, ne dya Mushipiditu Sandu. Kadi ne kwibalombola balaminine byonso byo nemulaīle ami mwine.” (Mateo 28:19, 20) Kino kitulomba kusapula myanda miyampe ya ntanda impya ya Leza īya’ko, ikekala ke paladisa, ku boba kebaikele banabetu bene Kidishitu. Yesu wālombwele patōka amba buswe bwetu kebufwaninwepo kukadikila’nka ku boba botudi nabo nkulupilo imo, mwanda wānene amba: “Shi bānwe mwikale kusanswa bonka bakwimusanswa, nankyo le mpalo yenu īdi paka? Lelo ne basonkeja-musonko nabo kebaloñangapo’nka namino? Kadi shi mwimune bonka bamwanenu, lelo nankyo po mukidile kunengeja i paka? Lelo baJentaila nabo kebaloñangapo’nka namino?”—Mateo 5:46, 47; 24:14; Ngalatea 6:10.

‘Nangila mu Dijina dya Yehova’

12. Mwanda waka dijina dya Leza i dimufwaninwe enka aye bunka bwandi?

¹² Muswelo mukwabo wa mvubu wa kutumbija Leza i kuyuka dijina dyandi dya pa bula dya bu Yehova, kutela’dyo, ne kufundija’dyo bakwetu. Mulembi wa mitōto wālombwele patōka bine byaādi wabila ku mutyima: “Amba bayūke’mba, abe enka, wa dijina dya bu-Yehova, wi Mwinemukatakatamwine panopantanda ponsololo.” (Mitōto 83:18) Dijina dya Yehova dishintulula amba “Yewa Wikadija ke.” Ye Mukala Mpango Mwine Mukatampe, ufikidijanga nyeke mpango yandi. I enka Leza wa bine kete ye ufwaninwe dino dijina, mwanda bantu kebayukangapo byobalonga shi bikabwanika. (Yakoba 4:13, 14) Yehova bunka bwandi ye ubwanya kunena amba kinenwa kyandi “kikafikijija biyampe’tu” kintu kyatumīne’kyo. (Isaya 55:11) Bavule babezemukanga pa kumona musunsa umbajinji dijina dya Leza mu Mabible abo ne pa kuyuka nshintulwilo yadyo. (Divilu 6:3) Ino bakamwena mu buno buyuki enka shi ‘banangila mu dijina dya Yehova nyeke ne nyeke.’—Mika 4:5.

13. “Kuyuka” Yehova ne ‘kunangila mu dijina dyandi’ kulomba kuyuka ne bika?

¹³ Mitōto 9:10 unena pa mwanda utala dijina dya Leza amba: “Boba bakuyūkile dijina dyobe bakakukulupilanga.” Kino kekilombepo’nka kuyuka dijina Yehova kete, mhm, mwanda kuyuka’dyo konkakonka kekulombolapo amba tumukulupile. Ino kuyuka dijina dya Leza i ne kujingulula Yehova i Leza wa muswelo’ka, kulēmeka lupusa lwandi, kukōkela ku mbila yandi, ne kumukulupila mu bintu byonso. (Nkindi 3:5, 6) Ne ‘kunangila mu dijina dya Yehova’ nako monka na monka, kulomba kwipāna kwadi, kumwimanina bu umo wa mu batōtyi bandi, kwingidija bya binebine būmi bwetu bonso mungya kiswa-mutyima kyandi. (Luka 10:27) Le ye molongelanga?

14. Shi tusaka kwingidila Yehova nyeke ne nyeke, i bika bitusakila’ko kupita’ko’tu kwikumona bu kiselwa?

¹⁴ Shi tudi na mutyima wa kwingidila Yehova nyeke ne nyeke, nabya ketufwaninwepo kwikimona’nka bu kiselwa kete. Mutumibwa Polo wāsoñenye Temote wādi kala wingidila Yehova myaka mivule amba: ‘Wiibidije kwikala na lulamato lwa bwine Leza bu kitungo kyobe.’ (1 Temote 4:7) Lulamato lutambanga ku mutyima wa muntu usepelela ne kufwija’ko yewa walamete. ‘Lulamato lwa bwine Leza’ lulombolanga kalēmo kakatampe kotulēmekele Yehova. Lumwekanga mu kumulamata na buswe mwanda tumupele aye ne bijila byandi bulēme bukatampe. Kadi lwitupanga mutyima wa kusakila muntu yense akwate dijina dyandi na mutyika mukatampe. Tufwaninwe kutamija lulamato lwa bwine Leza mu būmi bwetu shi tusaka kunangila nyeke ne nyeke mu dijina dya Yehova, Leza umo kete wa bine.—Mitōto 37:4; 2 Petelo 3:11.

15. Tukokeja namani kulamata Leza kasuku kandi kete?

¹⁵ Pa kwingidila Leza mwasakila, ketufwaninwepo kumutōta kulu mu dishinda kulu mu biyombo, mwanda aye i “Leza wa mukao.” (Divilu 20:5) Kebibwanikapo kuswa Leza koku kadi tuswele ntanda imbi yendejibwa na Satana, leza wayo. (Yakoba 4:4; 1 Yoano 2:15-17) Yehova uyukile senene kwielela kwielela’ko umo ne umo mwanda wa kwikala muntu wa muswelo kampanda. (Yelemia 17:10) Shi binebine tuswele boloke, aye witumwene, ne kadi uketukwasha tūminine matompo etu a difuku ne difuku. Uketukwasha na mushipiditu sandu wa bukomo amba tunekenye bubi buzambalele mu ino ntanda. (2 Kodinda 4:7) Kadi uketukwasha tulame ne lukulupilo lukomo lwa būmi bwa nyeke mu paladisa pano pa ntanda. Bine, kino i kyepelo kya ntumbo’po kashā! Tufwaninwe kufwija’ko mpata Yehova, Leza wa bine mwine witupele kino kyepelo, ne kwikala na mutyima wa kumwingidila.

16. Lelo ufwaninwe kulonga bika pamo na mulongela bantu midiyo ne midiyo?

¹⁶ Bantu midiyo ne midiyo kujokoloka ntanda yonso betabijanga na nsangaji lwito lwa mulembi wa mitōto wāsonekele amba: “Yō! tumbijai Yehova pamo nami, kadi tutulwile dijina dyandi pamo ponka.” (Mitōto 34:3) Yehova ukwita nobe wiye wisobe mu milwi ne milwi yenda īlundila’ko, ya bantu batambile mu mizo yonso bamutumbija.

Myanda ya Kupituluka’mo

• Yehova i muntu wa muswelo’ka? I kamweno’ka kotumwena mu kwivwanija senene ngikadilo yandi?

• Tukokeja namani kukwasha bakwetu nabo bayuke bubinebine padi Leza?

• Kuyuka Yehova ne kunangila mu dijina dyandi kulomba bika ne bika?

[Kifwatulo pa paje 14]

Yehova, mu buswe bwandi bukatampe, ‘ukabāla kuboko kwandi ne kwikutyija mityima ya bintu byonso byumi’