Shapita wa Dikumi ne Kitema
Endelela na Kusapula Mwanda wa Leza Pakubulwa Moyo
1. (a) I myanda miyampe’ka yādi isapula bana ba bwanga ba Yesu, ino bendeji ne bakulumpe ba Bayuda bālongele bika? (b) I bipangujo’ka byotufwaninwe kwiipangula?
YESU KIDISHITU, Mwanā Leza, wāshingilwe māni pano kepadi kintu kya myaka 2 000 amba ye ukekala Mulopwe wa ntanda. Kupwa wāipaibwa na balwana ba mitōtelo bādi basoñanya bantu, ino Yehova wāmusangula mu bafwe. O mwanda tubwanya kumona būmi bwa nyeke kupityila kudi Yesu. Bana ba bwanga ba Yesu pa kusapula ino myanda miyampe patōkelela, kupangwapangwa kwāshilula. Bamo bāelwa mu kifungo, pakwabo bākupilwa nsonde ne kukandwa kwisambila monka padi Yesu. (Bilongwa 4:1-3, 17; 5:17, 18, 40) Lelo bādi ba kulonga’po namani? Le abe nobe wādi wa kulonga’po namani? Lelo wādi wa kwendelela na kusapula bukamoni pakubulwa moyo?
2. (a) I misapu’ka milumbuluke ifwaninwe kusapulwa mu ino yetu myaka? (b) I ani udi na kiselwa kya kusapula ino myanda miyampe?
2 Mu 1914, Yesu Kidishitu, Mulopwe wa Bulopwe bwa Leza, wāshikete pa lupona momwa mūlu, ne kubikala ‘umbukata mwa boba bamushikilwe.’ (Mitōto 110:2) Kupwa Satana ne bademona bandi bāelwa pano panshi. (Kusokwelwa 12:1-5, 7-12) Mafuku a mfulo ya ino ngikadilo ya bintu nao āshilula. Pasa kufula kino kitatyi, Leza usa kutyumuna bipindibipindi ngikadilo ya bintu yonso ya Satana. (Danyele 2:44; Mateo 24:21) Boba bakapanda bo bakapebwa kyepelo kya kwikala na būmi bwa nyeke mu ino ntanda ikekala ke paladisa. Shi ukulupile ino myanda miyampe, bine kukabulwepo kusapwila’yo bakwenu. (Mateo 24:14) Ino ulanga bantu baketaba muswelo’ka?
3. (a) Lelo bantu betabanga namani ku musapu wa Bulopwe? (b) I kipangujo’ka kitutala batwe bonso?
3 Kitatyi kyosapula myanda miyampe ya Bulopwe, bamo baketabija’yo, ino bavule bakapumpunya’yo. (Mateo 24:37-39) Padi bamo bakakufutulula ne kukulwa. Yesu wādyumwine amba lwana lubwanya kukatamba’nka ne ku balongo bobe. (Luka 21:16-19) Pakwabo ku kaji nansha ku masomo. Mu bifuko bimo bya ntanda, Batumoni ba Yehova i bakankajibwe na Leta. Shi ubatanwa mu ngikadilo ya uno muswelo, le ukendelela na kusapula mwanda wa Leza pakubulwa moyo ne ‘kūminina monka mu lwitabijo’?—1 Kodinda 16:13.
Ketwakikulupilai Bukomo Bwetu
4. (a) Pa kusaka twikale bengidi ba Leza ba kikōkeji, i kintu’ka kya kamweno kyotusakilwa? (b) Mwanda waka kupwila kwa bwine Kidishitu kudi na mvubu mpata?
4 Mwingidi yense wa kikōkeji wa Yehova unenwe kukulupila mu mpangiko ya Yehova. Imo bidi i kupwila kwa pa kipwilo. Bisonekwa bitusoñanya amba ketufwaninwe kulengwa kupwila. (Bahebelu 10:23-25) Boba bekalanga nyeke Batumoni ba Yehova ba kikōkeji baloñanga bukomo bwa kutanwa kitatyi ne kitatyi ku kupwila pamo na batōtyi nabo. Ku kuno kupwila ko kotuvudija buyuki bwetu bwa Bisonekwa. Kadi ko kotupotololanga biyampe bubinebine botuyukile kala ne kujingulula senene miswelo ya mwa kwibwingidijija. Twikalanga twilamata bininge na banabetu bene Kidishitu botutōta nabo Leza umbumo ne kuningishibwa mwa kulongela kiswa-mutyima kyandi. Mushipiditu wa Yehova wituludikanga kupityila ku kipwilo, kadi Yesu wikalanga umbukata mwetu kupityila ku uno mushipiditu.—Mateo 18:20; Kusokwelwa 3:6.
5. Shi Batumoni ba Yehova i bakankajibwe, bapwilanga namani?
5 Lelo utanwanga kitatyi ne kitatyi ku kupwila konso, ulonga ne bukomo bwa kwingidija byobya byoivwana’ko? Kyaba kimo kilombanga kupwidila mu mobo a banabetu mu tubisumpi tutyetutye shi Batumoni ba Yehova i bakankajibwe. Bifuko ne bitatyi bishintanga, pakwabo mu muswelo okebikusangajapo, kimfwa mubwanya kwanza kupwilwa bufuku. Batutu ne bakaka ba kikōkeji baloñanga bukomo bwa kutanwa ku kupwila ne kupwila, nansha shi bibakoleja ne kwibatūla mu byaka.
6. Tukalombola namani amba tukulupile mudi Yehova, ne kino kiketukwasha namani twisambe pakubulwa moyo?
6 Kukulupila mudi Yehova kutamanga shi tumwabija nyeke mu milombelo ya kyanga, mwanda tuyukile amba aye ye wa kwitukwasha. Lelo nobe umwabijanga? Yesu paādi wingila mwingilo wandi pano panshi, wādi ulombela kitatyi ne kitatyi. (Luka 3:21; 6:12, 13; 22:39-44) Bufuku bukya ke kukamukobeka ku mutyi, wānene bandi bana ba bwanga amba: “Ikalai kutengela ne kulombela mwanda wa kutyina’mba, mwakatompibwa.” (Mako 14:38) Shi tubatana bantu bapela kuteja musapu wa Bulopwe, tubwanya padi kuzoza mu mwingilo wetu. Shi bantu betusepa na kibengo nansha kwitupangapanga, mutyima ukokeja kwitulombola kuleka’byo mwanda wa kutyina myanda. Ino shi tulomba mushipiditu wa Leza na kininga amba witukwashe tusapule pakubulwa moyo, tukekala na bukomo bwa kukomena ano matompo onso.—Luka 11:13; Efisesa 6:18-20.
Nsekununi ya Bāsapwile Pakubulwa Moyo
7. (a) Mwanda waka tufwaninwe kuta mutyima bininge ku nsekununi idi mu Bilongwa? (b) Londolola bipangujo bidi kunshi kwa uno musango, ne kukimba muswelo otubwanya kumwena’mo.
7 Tufwaninwe kuta mutyima bininge ku nsekununi idi mu mukanda wa Bilongwa. Mwanda ilombolanga muswelo wāikele batumibwa ne bana ba bwanga babajinji—bantu bādi na mityima pamo’nka bwa yetu ino—kunekenya bijika, bāikala batumoni ba Yehova ba kikōkeji ne bakubulwa moyo. Tubandaulei bidi kipindi kya ino nsekununi na kubandaula bipangujo ne bisonekwa bilonda’ko. Pano potubandaula’byo, tala muswelo obwanya kumwena mu byotanga.
Le batumibwa bādi bafunde masomo malampe? Lelo bādi bantu ba kibutwila kyakubulwa kwivwana moyo nansha shi abafikilwa na bintu’ka? (Yoano 18:17, 25-27; 20:19; Bilongwa 4:13)
I bika byākweshe Petelo esambe pakubulwa moyo ku kidye kya Bayuda kyāponeje Mwanā Leza? (Mateo 10:19, 20; Bilongwa 4:8)
I bika byādi bilonga batumibwa mayenga a kunyuma, pobādi kebatwelwe ku meso a Sanhedrini? (Bilongwa 1:14; 2:1, 42)
Ba Petelo ne Yoano bālondolwele namani kitatyi kyobāfunine batumibwa kudi baludiki amba lekai kusapula mu dijina dya Yesu? (Bilongwa 4:19, 20)
Batumibwa pa kukutululwa, bāabije monka ani? Lelo bālombele amba kupangwapangwa kupwe’ni, nansha bālombele bika? (Bilongwa 4:24-31)
Yehova wēbakweshe kupityila kudi bāni pādi pasaka balwana kwimika mwingilo wa kusapula? (Bilongwa 5:17-20)
Batumibwa bālombwele muswelo’ka amba i bemvwanije buluji bwine bobānyongolwedilwe? (Bilongwa 5:21, 41, 42)
Nansha bana ba bwanga bavule byobāpalankene pa mwanda wa kupangwapangwa, ino bāendelele na kulonga bika? (Bilongwa 8:3, 4; 11:19-21)
8. I bipa’ka bisangaja byālupukile ku mwingilo wāingile bana ba bwanga babajinji, netu twibabwanye namani kwingila’o?
8 Mwingilo wa kusapula myanda miyampe kewādipo wa bitupubitupu. Kintu kya bana ba bwanga 3000 bābatyijibwe mu Pentekosa 33 K.K. “Bakwabo badi balundwa konka kudi abo pa kumwitabija Mfumwetu, bibumbo na bibumbo bya bāna-balume ne bāna-bakaji.” (Bilongwa 2:41; 4:4; 5:14) Mwenda mafuku, ne Solo mwine Tasusa, muntu wādi upangapanga byamalwa bantu ba Leza, nandi wāikala ke mwine Kidishitu, kasapula bubinebine pakubulwa moyo. Uno Solo ye otwita bu mutumibwa Polo. (Ngalatea 1:22-24) Mwingilo wāshilwile mu myaka katwa kabajinji kewimenepo. Ne pano ukikongakanya bantu bavulevule mu ano mafuku a mfulo, kadi ke mufike ne kulampe kwine ku mfulo ya ntanda. Tudi netu na madyese a kwingila uno mwingilo, ne potwingila’o, tuboilanga ñeni ku kimfwa kyētushidile batumoni ba dikōkeji bētubadikidile kwingila’o.
9. (a) Polo wāmwene mikenga’ka ya kusapula’mo bukamoni? (b) I miswelo’ka yoingidijanga pa kusambulwila bakwenu musapu wa Bulopwe?
9 Lelo i bika byālongele Polo paāyukile bubinebine butala padi Yesu Kidishitu? “Wadi . . . kala kasapula Yesu mu mashinakoka’mba: I Mwana Leza.” (Bilongwa 9:20) Wāfwijije’ko Leza pangala pa buntu bwaāmulombwele, wāyuka ne kuyuka amba muntu ne muntu nandi usakilwa kwivwana myanda miyampe yobamusapwila. Polo byaādi Muyuda, wāenda kukapāna bukamoni mu mashinakoka mungya kibidiji kya mu mine myaka’ya. Wāsapula ne ku njibo ne njibo, ulanguluka ne na bantu mu nsoko. Kadi wādi wenda na mutyima tō mu myaba mipya kukasapula’mo myanda miyampe. —Bilongwa 17:17; 20:20; Loma 15:23, 24.
10. (a) Polo wēlombwele namani amba wādi na kusansanya nansha byākadipo na moyo wa kupāna bukamoni? (b) Tukeula ngikadilo ya Polo namani potusapwila balongo, bengidi netu ne bakwetu ba ku masomo?
10 Polo kādipo na moyo, ino wādi na kusansanya, netu mo motufwaninwe kwikadila. Shi usapwila Bayuda, wādi wibalombola bintu bibasangaja mungya milao yālaile Leza ku bakulutuba babo. Shi ke Bangidiki, webālombola bintu byobādi kala bebidile. Pamo wādi usapula bukamoni na kusekununa bidi myanda yāmutene pa kuyuka bubinebine. O mwanda wānene amba: “Nongela bintu byonso pa mwanda wa myanda-miyampe, na’mba ngikale kumwena monka pamo na bānwe.” —1 Kodinda 9:20-23; Bilongwa 22:3-21.
11. (a) Polo wādi ulonga bika mwa kwepukila kwisusa divulevule na balwana? (b) I kitatyi’ka kyotukokeja kwiula na tunangu kimfwa kya Polo, ne muswelo’ka? (c) I kwepi kutamba bukomo bwetu bwa kunena pakubulwa moyo?
11 Pobyādi bimweka amba kulwa kobalwa Polo kubapite’byo kipimo, wādi utonga kukasapula kitatyi kamukaya mu mwaba mukwabo pa kyaba kya kwisusa divulevule na balwana. (Bilongwa 14:5-7; 18:5-7; Loma 12:18) Inoko Polo kādipo wivwanina myanda miyampe bumvu. (Loma 1:16) Nansha byakādipo usangela kutukwa—ne kumweshibwa malwa—na balwana bakubulwa kafuku, ino wādi ‘ukankamana pampikwa moyo mudi Leza wetu,’ koku wendelela na kusapula myanda miyampe. Wānene amba: “Mfumwetu wadi wimene nami monka kunkomeja pō, amba lubila lwelwe lwa kusambakanya konso konso.” (1 Tesalonika 2:2; 2 Temote 4:17) Yesu, Mutwe wa kipwilo kya bwine Kidishitu, ukyendelela na kupāna bukomo bwitusakilwa mu mwingilo waālaile amba ukengilwa mu ino yetu myaka.—Mako 13:10.
12. I kika kilombola amba bene Kidishitu kebadipo na moyo, ne mwanda waka kebadipo nao?
12 Tudi na bubinga bonso bwa kwendelela na kusapula mwanda wa Leza pakubulwa moyo, mwēusapwidile Yesu ne bengidi ba Leza ba kikōkeji ba mu myaka katwa kabajinji. Inoko ke kunenapo amba ketukibangapo bakwetu, nansha kuningila bantu bapela musapu amba’nka twimusapwile, mhm. Ino ketulekanga’byopo kusapula mwanda’po’tu bantu abapele kwivwana; kadi ketulekangapo balwana betukankaje kunena. Pamo bwa Yesu, tulombolanga amba Bulopwe bwa Leza bo abo bufwaninwe kuludika ntanda yonso. Tusapulanga na kikulupiji kyonso, mwanda tutuminwe na Yehova, Mfumu Mulopwe wa diulu ne ntanda, ne musapu otusapula mwine ke wetupo, i wandi. Kadi buswe botuswele Yehova bo bufwaninwe kwitukunka ku mityima tumutendele.—Fidipai 1:27, 28; 1 Tesalonika 2:13.
Myanda ya Kupituluka’mo
• Mwanda waka i kya mvubu kusapula musapu wa Bulopwe ku muntu ye-yense, ino tuyukile amba bantu bakokeja kwitaba namani?
• Tukalombola namani amba ketukulupilepo bukomo bwetu potwingidila Yehova?
• I ñeni’ka ya mvubu yotwaboila ku mukanda wa Bilongwa?
[Kifwatulo pa paje 173]
Bengidi ba Yehova ba dyalelo basapulanga mwanda wa Leza pakubulwa moyo pamo bwa bengidi ba pa kala