Yesu Utabukile Bademona Bukomo

LE UKIVULUKILE kyāikadije umo wa mu bamwikeulu ba Leza ke Satana Dyabola?​—I kilokoloko kya aye mwine kya kusaka kutōtwa kyamulengeje ekale ke walwana na Leza. Lelo bamwikeulu bakwabo nabo bāalamukile ke balondi ba Satana?​—I bine, bāalamukile. Bible wibatela bu ‘bamwikeulu ba Satana,’ nansha bu bademona.​—Kusokwelwa 12:9.

Bano bamwikeulu babi, nansha amba bademona, lelo nabo betabije mudi Leza?​—‘Bademona betabije amba Leza udi’ko,’ ye munenena Bible. (Yakoba 2:19) Inoko pano bazakalanga. Mwanda bayukile amba Leza ukebapa mfuto pangala pa bintu bibi byobalongele. Le i bibi’ka byobalongele?​—

Bible unena amba bano bamwikeulu bāshile bifuko byabo momwa mūlu, bāiya pano panshi kushikata bu bana-balume. Kyobāidile i kusaka kulāla na bana-bakaji ba buya bwa dyangi pano panshi. (Ngalwilo 6:1, 2; Yude 6) Le uyukile amba bulādi i bika?​—

Bulādi i kusambakena pamo kwa mwana-mulume ne mwana-mukaji kupityila ku dishinda dimo dya pa bula. Kupwa kusambakena pamo, mwana ubwanya kwanza kutamina munda mwa inandi. Ino ku bamwikeulu bulādi i kilubo. Leza usaka amba bulādi bulongwe enka na ba mwana-mulume ne mwana-mukaji besonge kete. Nankyo nansha shi mwana wabutuka, ba mulume ne mukaji’ba bakamulela.

Pāvwele bamwikeulu imbidi ya bu muntu ne kulāla na bana-bakaji pano pa ntanda, babo bana pa kutama’bo bāikele ke batumpangala. Bādi baswele bya luma mpata, kadi bādi basanshija bantu. Ebiya Leza wāleta dilobe dikata dya kutukija batumpangala’ba ne bantu babi bonso. Ino wānena Noa kūbaka safini, bwato bukatakata, mwa kupandijija bantu batyetye bādi balonga byoloke. Mufundiji Mukatampe wānene amba kuvuluka byobya byālongekele pa Dilobe i kwa kamweno.​—Ngalwilo 6:3, 4, 13, 14; Luka 17:26, 27.

Lelo uyukile kyāfikile bamwikeulu babi’ba kitatyi kyāile Dilobe?​—Bālekele kwingidija imbidi ya bu muntu yobāvwele, kebajokela kadi mūlu. Ino kebāikelepo monka bamwikeulu ba Leza, bāikele ke bamwikeulu ba Satana, nansha bademona. Ne i kika kyāfikile babo bana, batumpangala’ba?​—Bāfwile ku Dilobe. Kadi ne bantu bakwabo bonso bampikwa kukōkela Leza nabo bāfwile.

Tamba kitatyi kya Dilobe, Leza kalekelepo kadi bademona amba bealamune bu bantu dikwabo. Ino nansha byoketubwanyapo kwibamona, bademona bendelelanga kulongeja bantu bintu bibi mpata. Baletanga kavutakanya kupita ne pabajinji pene. Mwanda i bapangwe mūlu ne kwelwa pano panshi.

Lelo uyukile mwanda waka ketubwanyapo kumona bademona?​—Mwanda badi na imbidi keimweka. Ino tuyuke’tu amba badi’ko bōmi. Bible unena amba Satana ‘ongolanga bantu ba pano pa ntanda ponso,’ ne bademona bandi nabo bamukwashanga’ko.​—Kusokwelwa 12:9, 12.

Lelo Dyabola ne bademona bandi babwanya kwitongola nansha kwitudimba netu?​—Bine, babwanya shi ketudyumukilepo. Inoko, ketudipo ne kyotukwatyilwa moyo. Mufundiji Mukatampe wānene amba: ‘Dyabola kadipo na lupusa pondi.’ Shi tufwene kudi Leza, nabya uketukinga kudi Dyabola ne bademona bandi.​—Yoano 14:30.

I biyampe tuyuke bintu bibi bitompanga kwitulongeja bademona. Ebiya langa’po bidi. Le i bintu’ka bibi byādi bilonga bamwikeulu pobāile pano panshi?​—Kumeso kwa Dilobe, bālele na bana-bakaji, kintu kyādi kibi kulongwa na bamwikeulu. Dyalelo bademona basangelanga bantu pobaleka kukōkela mbila ya Leza itala pa bulādi. Nkwipangule’ko bidi, bulādi bufwaninwe kulongwa’nka na bāni kete?​—Ubanena bya bine, i enka bantu besonge kete.

Dyalelo, banuke bana-balume ne bana-bakaji bamobamo balālanga na bakwabo, inoko i bibi byobalonga. Bible shandi wisambila pa “mutaka” wa mwana-mulume, nansha bya bwana-bulume. (Levi 15:1-3, Bisonekwa Bitokele) Kadi wisambilanga ne pa mutaka wa mwana-mukaji, nansha bya bwana-bukaji. Bino bipindi bya ku ngitu, Yehova wāpangile’byo na mpango ya pa bula ifwaninwe kuloelelwa enka bantu besonge kete. Bademona basangelanga kumona bantu balonga bintu bijidikilwe na Yehova. Kimfwa, bademona basangalanga shi mwana mwana-mulume ne mwana mwana-mukaji bekaila ku mitaka. Batwe ketusakepo kusangaja bademona, mwene i amo?​—

Kudi kintu kikwabo kisangajanga bademona ino Yehova ushikilwe’kyo. Le wikiyukile?​—I bikandangobo. (Mitōto 11:5) Tutelanga bikandangobo shi bantu bamwesha bakwabo malwa ne kwibasanshija. Vuluka amba ye mwādi mulongela batumpangala’ba, bana ba bademona.

Kadi bademona basangelanga kuzakaja bantu. Kitatyi kimo bemwekejanga bu bantu bafwe. Bakokeja nansha ke kwiula mawi a bafwile. Mu uno muswelo bademona bongolanga bantu bavule bakulupila amba bafwe badi’ko, ne amba babwanya kwisamba na bōmi. Bine, bademona i bāfikije bantu bavule ku kukulupila mu bibanda.

Nanshi tufwaninwe kudyumuka kutyina amba Satana ne bademona bandi baketongola. Bible udyumuna’mba: ‘Satana wimwekejanga aye mwine bu mwikeulu muyampe, ne bengidi bandi bene nabo baloñanga’nka nabya.’ (2 Kodinda 11:14, 15) Inoko, na bubine, bademona i babi. Tutale muswelo obakimbanga kwitukoka twikale pamo bwa abo.

Lelo i kwepi kufundanga bantu bya bikandangobo ne bulādi bwa munyanji ne bya mishipiditu ne bibanda?​—Mwene i mu kubandila bilombolwa ku matelevijo ne masinema, mu makayo a mu kompyuta ne a mu video, mu bikimbwakimbwa mu Entelenete, ne mu mabuku a bya kusepeja obatanga? Lelo kulonga bintu bya uno muswelo kwitufwenyanga kudi Leza’ni, nansha kwitufwenyanga kudi Dyabola ne bademona bandi? Le ulanga’po namani?​—

Molangila, le i bāni betusakila kwivwana ne kubandila bintu bibi?​—Bine, i Satana ne bademona bandi. Penepo, abe ne ami i bika byotufwaninwe kulonga?​—Batwe tufwaninwe kutanga, kuteja, ne kubandila bintu biyampe ne byobya bitukwasha mwa kwingidila Yehova. Lelo ubwanya kufwatakanya’ko bintu biyampe bimobimo byotukokeja kulonga?​—

Shi tulonga biyampe, nankyo kekudipo kyotukwatyilwa moyo wa bademona. Yesu wibatabukile bukomo, kadi nabo bamwivwananga moyo. Difuku dimo bademona bāsamine ku meso a Yesu amba: “Ubaiya kwitōnakanya’ni?” (Mako 1:24) Mwene tukasangalanga pakafika kitatyi kya Yesu konakanya Satana ne bademona bandi?​—Ino pano’ko bidi, tukulupile amba Yesu uketukinga ku bademona shi twendelela kufwena kwadi ne kudi Shandi wa mūlu.