Yesu Witufundija Kulombela

LELO kodi musapwile Yehova Leza myanda?​—Aye usakanga umusapwila myanda. Kusapwila Leza myanda ko kwitwa bu milombelo. Pavule pene Yesu wādi wisamba na Shandi udi mūlu. Dimodimo wādi usaka kwikala pa bunka bwandi pa kwisamba na Leza. Kyaba kikwabo, Bible witusapwila amba, “Wakandile lūlu kasuku kandi kulombela, ino kyolwa kyamolobela konka bunka bwandi.”​—Mateo 14:23.

Lelo i kwepi kobwanya kukalombela kudi Yehova pa kasuku kobe?​—Padi ubwanya kwikala pa kasuku pa kwisamba na Yehova bufuku kumeso kwa kulāla. Yesu wānene amba: “Pa kulombela nobe utwela monka mu kadimbwa ka njibo yobe, ushiteko ne kinjilo kyobe, ebiya kolombela kudi Shobe.” (Mateo 6:6) Lelo ulombelanga kudi Yehova difuku dyonso bufuku kumeso kwa abe kukalāla?​—Ufwaninwe kulonga kino.

Kadi Yesu wādi ulombela ne kitatyi kyaādi pamo na bantu bakwabo. Pāfwile mulunda nandi Lazalasa, Yesu wālombele ku meso a bantu kokwa kwājikilwe Lazalasa. (Yoano 11:41, 42) Kadi Yesu wādi ulombela paādi ubungakena pamo na bandi bana ba bwanga. Lelo nobe wendanga ku kupwila, kokwa kulombelwanga milombelo?​—Pavule pene, muntu mutame ye ulombelanga’ko. Teja senene byanena’bya, mwanda wisambanga na Leza pa kyobe kyaba. Nabya ukamona mwa kunenena amba “Amena” ku milombelo’ya. Lelo uyukile mushintulwila kunena amba “Amena” ku mfulo kwa milombelo?​—Kishintulula amba ubasangela milombelo’ya. Ko kunena amba ubaitabija binenwe’mo ne ubasake amba ikale yobe milombelo.

Kadi Yesu wādi ulombela pa kudya. Wādi ufwija’ko Yehova pa mwanda wa bidibwa byandi byapāna. Lelo nobe ulombelanga kumeso kwa kudya bidibwa?​—I biyampe kufwija’ko Yehova pa mwanda wa bidibwa kumeso kwa batwe kudya. Padi i muntu mukwabo ukalombela shi mudila pamo kitango. Ino le ukalonga namani shi udya pa bunka bobe? Ne kadi ukalonga namani shi mudila pamo na bantu kebafwijangapo Yehova?​—Nabya ufwaninwe kulombela milombelo ya abe mwine.

Lelo bikulomba kulombela nyeke enka na diwi ditunduke’ni? Nansha Yehova ubwanya ne kwivwana shi ubalombela munda mwa mutyima kwampikwa kutulula diwi?​—Tutana malondololo pa byāfikīle Nehemia. Wādi mutōtyi wa Yehova wādi wingidila mu ndaku ya Alatazelekishishi, Mulopwe wa Peleshia. Difuku dimo Nehemia wādi mufitwe mutyima mpata mwanda wāivwene amba nsakwa nansha lubumbu lwa Yelusalema, kibundi kikulupilwe kya wandi muzo, i lutūtwe.

Mulopwe pa kwipangula Nehemia mwanda waka i mufitwe mutyima, dibajinji Nehemia wālombēle lulombelo lwa mundamunda. Kupwa Nehemia wāsapwila mulopwe kyādi kimufityije mutyima, wāmulomba ne kumulomba shi ukokeja kwenda ku Yelusalema kukōbakulula nsakwa. Le byāpityile namani?​—

Bine, Leza wālondolwele lulombelo lwa Nehemia. Mulopwe wāmunena amba ukokeja kwenda! Mulopwe wāpa Nehemia enka ne mbao mivule ya kūbaka nayo nsakwa. Nanshi na bubine Leza ubwanya kulondolola milombelo yetu, nansha shi i ya munda mwa mutyima.​—Nehemia 1:2, 3; 2:4-8.

Langa’po bidi kino nakyo. Lelo ufwaninwe kubandika mutwe shi kolombela? Lelo ufwaninwe kufukata manwi panshi? Le ulanga’po namani?​—Mu byaba bimobimo Yesu wādi ufukata manwi panshi shi kalombela. Mu byaba bikwabo wādi wimana bwimwa. Ne pakwabo napo pa kulombela, wādi utulula mutwe katale meso mūlu, pamo na mwaālongele paālombele pa mwanda utala Lazalasa.

Penepo, le bino bishintulula namani?​—Bine, bishintulula amba mushikatyilo nansha mwimanino obe ke akyopo kintu kya mvubu. Mu byaba bimobimo i biyampe kubandika mutwe obe ne kupūta meso. Mu byaba bikwabo nabyo ukokeja nansha ke kufukata mu manwi, na mwādi mufukatyila Yesu. Inoko, vuluka amba mu bitatyi byonso, wikale mwinya nansha bufuku, tubwanya kulombela Leza, nandi uketwivwana. Kintu kine kya mvubu pa kulombela i batwe kwikala na kikulupiji kya binebine amba Yehova witwivwananga. Lelo nobe ukulupile amba Yehova wivwananga milombelo yobe?​—

Lelo i bika byotufwaninwe kulomba mu milombelo yotulombela kudi Yehova?​—Nsapwile’po bidi: Polombelanga, le i bika byosapwilanga Leza?​—Yehova witupanga bintu biyampe bivule byotufwaninwe kumufwijija’ko, mwene i amo?​—Tubwanya kumufwija pa mwanda wa bidibwa byotudya. Ino le umufwijanga’ko nyeke ne pa mwanda wa kufituluka kwa diulu, mityi ya musombelo wa mani a lulundu, ne maluba a buya bya dyangi?​—I aye wālongele ne bino bine.

Difuku dimo, bana ba bwanga ba Yesu bānene Yesu ebafundije muswelo wa kulombela. Ebiya Mufundiji Mukatampe nandi wēbalombola bintu bya mvubu kutabuka bya kulomba mu milombelo. Lelo uyukile bino bintu i bintu’ka?​—Sela Bible obe, pūtula mu Mateo shapita wa 6. Mu vese wa 9 kufika ku wa 13, tutana’mo lolwa lulombelo lobetanga kudi bavule bu lwa Tata Wetu nansha bu Lulombelo lwa Mfumwetu. Tutange’lo bidi batwe bonso pamo.

Pano tubayuka’po amba Yesu i mwitusapwile twikale kulomba pa mwanda wa dijina dya Leza. Wānene kulombela amba dijina dya Leza dijile kijila, nansha amba dimonwe bu dikola. Le dijina dya Leza i ani?​—Bine, i Yehova, ne tufwaninwe kuswa dino dijina.

Kya bubidi, Yesu wētufundije kulombela Bulopwe bwa Leza bwiye. Buno Bulopwe budi na kamweno mwanda bukaleta ndoe pano pa ntanda ne kwiyalamuna ke paladisa.

Kya busatu, Mufundiji Mukatampe wānene kulombela amba kiswa-mutyima kya Leza kilongwe pano pa ntanda enka na mokilongelwa momwa mūlu. Shi tulombela pa bino bintu, nankyo tufwaninwe kulonga byobya bisaka Leza.

Kikwabo, Yesu wētufundije kulombela pa mwanda wa bidibwa bya bukile bukya byotusaka. Kadi wānene amba tufwaninwe kulombola Leza amba tufitwanga mutyima shi tubalonga bintu bibi. Kadi tufwaninwe kulomba Leza etulekele. Ino kumeso kwa Leza kwitulekela, tufwaninwe netu kulekela bakwetu shi abetulubila. Lelo bikupēlelanga kulekela bakwenu?​—

Kya mfulo, Yesu wānene amba, tufwaninwe kulombela kudi Yehova Leza etukinge kudi yewa mubi, Satana Dyabola. Nanshi bino byonso’bi i bintu biyampe kulomba kudi Leza.

Tufwaninwe kukulupila amba Yehova wivwananga milombelo yetu. Kutentekela pa byotumulomba kwitukwasha, tufwaninwe ne kumufwija’ko nyeke. Aye usangalanga potulomba na mutyima wa bubinebine ne shi tumulomba bintu byendele’mo. Nandi uketupa bintu’bya. Lelo nobe ukulupile kino?​—