Bidibwa bya Kyolwa bya Mfumwetu—Kuvuluka Kupēja Leza Bulēme

BENE KIDISHITU i basoñanibwe kuvuluka Kivulukilo kya lufu lwa Kidishitu. Kuno kuvuluka kutelwanga ne bu “bidibwa bya kyolwa bya Mfumwetu.” (1 Kodinda 11:20) Le bidi na buluji’ka bukatampe? I kitatyi’ka ne i muswelo’ka otufwaninwe kuvuluka’kyo?

Yesu Kidishitu wāshimikile ano masobo mu bufuku bwa Pashika wa Bayuda mu 33 Yesu ke mwiye. Pashika i masobo ādi asobwa dimo kete ku mwaka mu mafuku 14 a Nisane, kweji wa Bayuda. Pa kupikula dino difuku, bimweka amba Bayuda bādi belaija ndiñamano ya mwinya ne bufuku ya ku muketeko. Dino difuku dyādi na kintu kya nsá 12 ya dyuba ne nsá 12 ya bufuku. Kutentama kubajinji kwa kweji kinondanonda na ndiñamano ya mwinya ne bufuku ya ku muketeko dyo difuku dibajinji dya kweji wa Nisane. Ebiya Pashika yādi isobwa mafuku 13 pa kupita’po, dyuba pa kupwa kupona.

Yesu wāvulukile Pashika pamo na batumibwa bandi, kupwa wātambija’mo Yudasa Isakadiota, penepa kashilula Bidibwa bya ku Kyolwa bya Mfumwetu. Bino bidibwa byo byāpingakenine pa Pashika wa Bayuda, o mwanda bifwaninwe kuvulukwa musunsa umo ku mwaka.

Evanjile ya Mateo inena’mba: “Yesu watekuna mukate, pa kupwa kwesela dyese, weutyumuna, wapa’o bana ba bwanga, kanena’mba: ‘Atai, mudyei. Uno welekeja umbidi wami.’ Kadi, watekuna kitomeno nakyo, wafwija’ko, webapa’kyo, kanena’mba: ‘Tomai’mo, banwe bonso, kino kyelekeja ami “mashi a kipwano,” asa kumwangwa pa mwanda wa bavule, mwanda wa kulekelwa bubi.’”—Mateo 26:26-28.

Bamo bakulupile amba Yesu wāfulamwine mukate ke musunya wandi ne vinyu nayo ke mashi andi. Ino umbidi wa misunya wa Yesu wādi ukidi mutuntulu kitatyi kyaāpēne mukate. Le bine batumibwa ba Yesu bādile musunya wandi ne kutoma mashi andi? Nansha dimo, mwanda nabya badi ba kudya mwita wa muntu kadi bādi ba kujilula kijila kya Leza. (Ngalwilo 9:3, 4; Levi 17:10) Kukwatañana na Luka 22:20, Yesu wānene amba: “Kino kitomeno kyelekeja kipwano kipya kya pa mashi ami, asa kumwangwa pa mwanda wenu.” Le pano kitomeno kyo akyo kyādi “kipwano kipya”? Kebibwanikapo, mwanda kipwano i kwiimvwanika kwa bantu, ke kintupo kimweka na meso.

Nanshi mukate ne vinyu byādi’tu byelekejo. Mukate welekeja umbidi mubwaninine wa Kidishitu. Yesu wāingidije mukate wāshele ku bidibwa bya Pashika. Mukate’wa wādi mupungwe pampikwa kiyujo nansha kimo. (Divilu 12:8) Divule Bible wingidijanga kiyujo bu kyelekejo kya bubi ne bubole. O mwanda mukate welekeja umbidi mubwaninine wāelele Yesu bu kitapwa. Kewādipo na kabubi nansha kamo.—Mateo 16:11, 12; 1 Kodinda 5:6, 7; 1 Petelo 2:22; 1 Yoano 2:1, 2.

Vinyu ityila yelekeja mashi a Yesu. Mashi o ālengeje kipwano kipya kikale na mvubu. Yesu wānene amba mashi andi āmwangilwe “mwanda wa kulekelwa bubi.” Pa kino, bantu bakokeja kwikala batōka ku meso a Leza ne kumona muswelo wa kutwela mu kipwano kipya na Yehova. (Bahebelu 9:14; 10:16, 17) Kino kipwano nansha kwiumvwanika ko kulengeje bene Kidishitu ba kikōkeji 144 000 bende mūlu. Mwine’mwa bakekala ke balopwe ne babitobo mwanda wa kwesela muzo onso wa muntu.—Ngalwilo 22:18; Yelemia 31:31-33; 1 Petelo 2:9; Kusokwelwa 5:9, 10; 14:1-3.

Le i bāni bafwaninwe kudya bino byelekejo bya pa Kivulukilo? Mungya buluji, enka boba badi mu kipwano kipya—ko kunena’mba, boba bakulupile kwenda mūlu—bo bafwaninwe kudya mukate ne kutoma vinyu. Mushipiditu wa Leza o wibakulupija amba i batongwe kukekala balopwe momwa mūlu. (Loma 8:16) Ne kadi badi mu kipwano kya Bulopwe na Yesu.—Luka 22:29.

Le boba bakulupile kukekala nyeke pano panshi mu Paladisa nabo le? Bakōkelanga ku lubila lwa Yesu ne kwiya kutanwa ku Bidibwa bya Kyolwa bya Mfumwetu, ino bāyanga’ko kubandila bitupu na bulēme, kebekalangapo badya’ko nansha kutoma’ko. Batumoni ba Yehova bavulukanga Bidibwa bya Kyolwa bya Mfumwetu musunsa umo ku mwaka, mu mafuku 14, kweji wa Nisane, dyuba pa kupwa kupona. Nansha byokudi enka tununu tutyetye kete ntanda yonso twa boba betela bu bakulupile kwenda mūlu, ino kino kivulukilo kidi na bulēme ku meso a bene Kidishitu bonso. I kitatyi kya bonso kulangulukila pa buswe bukatakata bwālombwele Yehova Leza ne Yesu Kidishitu.—Yoano 3:16.