Le Kitango Kyendeji Kingilanga Namani Dyalelo?

Mu myaka katwa kabajinji, kakisumpi ka “batumibwa ne bakulumpe mu Yelusalema,” ko kādi kengila bu kitango kyendeji mwanda wa kukwata butyibi bukatampe butala kipwilo kyonso kya bene Kidishitu bashingwe māni. (Bilongwa 15:2) Pa kukwata butyibi bwitabije bonso, bādi babadikila kubandaula byobya binena Bisonekwa ne kulonda bwendeji bwa mushipiditu wa Leza. (Bilongwa 15:25) Kyo kimfwa kilondwa ne dyalelo.

Kingidijibwanga na Leza mwanda wa kulonga kiswa-mutyima kyandi. Batutu bashingwe māni bengila mu Kitango Kyendeji batele mutyima nakampata ku Kinenwa kya Leza kadi badi na bwino bwa kupwija myanda ya mu būmi ne ya ku mushipiditu. Bebuñanga yenga ne yenga mwanda wa kubandaula bisakibwa bya banabetu ntanda yonso. Enka na mu myaka katwa kabajinji, baletanga bulombodi butamba mu Bible kupityila ku mikanda, ku batadi bendakana ne mu miswelo mikwabo. Kino kilengejanga bantu ba Leza balange ne kulonga bintu mu muswelo umo. (Bilongwa 16:4, 5) Kitango Kyendeji kitalanga ne kuteakanya byakudya bya ku mushipiditu, kikankamika bantu bengile mwingilo wa kusapula Bulopwe, ne kubandaula kutongwa kwa batutu ba kusela biselwa.

Kitabijanga kwendejibwa na mushipiditu wa Leza. Kitango Kyendeji kilondanga bwendeji bwa Yehova, Mubikadi wa Diulu ne Ntanda, ne bwa Yesu, Mutwe wa kipwilo. (1 Kodinda 11:3; Efisesa 5:23) Boba badi mu kano kabumbo kebemonangapo bu bendeji ba bantu ba Leza. Abo pamo ne bene Kidishitu bakwabo bashingwe māni, “balondanga nyeke [Yesu] Kana ka Mukōko konso kokenda.” (Kusokwelwa 14:4) Kitango Kyendeji kisangalanga potwikitela mu milombelo yetu.

• Le i bāni bādi mu kitango kyendeji mu myaka katwa kabajinji?

• Le Kitango Kyendeji dyalelo kikimbanga bwendeji bwa Leza namani?