I Bika Byokatana pa Diteba Dyetu dya Entelenete?

Yesu Kidishitu wāsapwidile balondi bandi amba: “Lekai kitōkeji kyenu kimunike ku meso a bantu, amba bamone mingilo yenu milumbuluke ne kutumbija Shenu udi mūlu.” (Mateo 5:16) O mwanda, twingidijanga mobifwaninwe busendwe budi’ko dyalelo, kubadila’mo ne Entelenete. Diteba dyetu dya Entelenete, jw.org, i diteba diyukane didi’po myanda ya nkulupilo ne mingilo ya Batumoni ba Yehova. Le padi bika?

Padi malondololo a Bible ku bipangujo bipangulwanga divule. Ukatana’po malondololo a bipangujo bimobimo bya mvubu bipangulanga bantu divule. Kimfwa, matrakte Le Masusu Akapwa? ne Le Bantu Bafwe Babwanya Bine Kwikala Monka Bōmi? adi pa Entelenete mu ndimi 900 ne kupita. Ukatana’po ne Bible Bwalamuni bwa Ntanda Mipya mu ndimi 160 ne kupita ne mabuku akwasha pa kwifunda Bible, kubadila’mo ne dibuku Lelo I Bika Bitufundija Bible? pamo ne manimelo a panopano a Kiteba kya Mulami ne Langukai! Mabuku mavule mu ano akokeja kutangwa nansha kwivwanwa pa Entelenete, akokeja kutentulwa na bavule mu MP3, mu PDF, mu EPUB. Ubwanya ne kutampa mapaje kampanda pa mapapye mwanda wa kupa’o boba basaka kwiatanga mu ludimi lwabo! Padi ne mavideo a mabuku mu ndimi makumi na makumi a batumama. Ukokeja ne kutentula’po madrame a butangi bwa Bible, madrame a mu Bible, ne minjiki miyampe ikokeja kukusangaja powitūja.

Padi myanda ya bine ya Batumoni ba Yehova. Padi kadi ne myanda ya panopano ne mavideo a mwingilo otwingila ntanda yonso, binkumenkume bitenwe na Batumoni ba Yehova, ne bukomo botulonga mwanda wa kukwasha bantu badi mu byamalwa. Ukepatana ne mpangiko ya bitango bisa kulongeka ne muswelo okokeja kwisamba na mabilo a misambo.

Bino byonso bitukwashanga tumunike kitōkeji kya bubine ne kulampe kwine kwa ntanda. Bantu ba mu makontina onso, kubadila’mo ne ba mu Antarkitike, bamwenanga’mo. Tulomba’mba “kinenwa kya Yehova kyendelele kusambakana bukidibukidi,” mu ntanda yonso, amba Leza atumbijibwe ntumbo.—2 Tesalonika 3:1.

• Lelo jw.org ukwashanga namani bantu bavule befunde bubine bwa mu Bible?

• Lelo i bika byokasangela kutala pa diteba dyetu dya Entelenete?