KIFUNDWA 10
Le Ukayuka Namani Kipwilo kya Bine?
1. Lelo kudi enka kipwilo kimo kete kya bine?
“Dyumukai bapolofeto ba bubela.”—MATEO 7:15.
Yesu wāfundije balondi bandi enka mutōtelo umo kete, ke mutōtelo wa bine kadi. Udi bwa dishinda ditwala ku būmi bwa nyeke. Yesu wānenene amba: “Ba kwidisokola bene i batyetye.” (Mateo 7:14) Leza witabijanga kipwilo kilonda enka Kinenwa kyandi kya bine. Batōtyi bonso ba bine i bakutyilwe mu bumo na lwitabijo lumo.—Tanga Yoano 4:23, 24; 14:6; Efisesa 4:4, 5.
Tala video Lelo Leza Witabije Bipwilo Byonso?
2. Le i bika byānenene Yesu pa bene Kidishitu ba bubela?
“Banenanga patōkelela amba bayukile Leza, ino bamutuna na mingilo yabo.”—TETUSA 1:16.
Yesu wādyumwine amba bapolofeto ba bubela bakasubija bwine Kidishitu. Bano bapolofeto ba bubela bemwekejanga bu batōtyi ba bine. Bipwilo byabo bimwekanga bu bya bene Kidishitu. Inoko ukokeja kuyuka na bubine mwikadile bano bantu. Namani? Enka mu mutōtelo wa bine kete mo mudi bene Kidishitu ba bine bayukena ku ngikadila ne bilongwa byabo.—Tanga Mateo 7:13-23.
3. Le ukayuka namani batōtyi ba bine?
Tala bino biyukeno bitano:
Batōtyi ba bine balēmekele Bible amba i Kinenwa kya Leza. Baloñanga bukomo bwa kulonda misoñanya idi’mo. O mwanda kipwilo kya bine i kishile na bipwilo bikwabo bilonda milangwe ya bantu. (Mateo 15:7-9) Batōtyi ba bine kebafundijangapo bintu bishile na byobalonga.—Tanga Yoano 17:17; 2 Temote 3:16, 17.
Balondi ba bine ba Yesu balēmekele dijina dya Leza, Yehova. Yesu wādi ulēmekele dijina dya Leza na kwidiyukanya. Wākweshe bantu bayuke Leza, kadi wēbafundija balombe amba dijina dya Leza dipandulwe. (Mateo 6:9) Le i kipwilo’ka kiyukanyanga dijina dya Leza mu kyenu kibundi?—Tanga Yoano 17:26; Loma 10:13, 14.
Bene Kidishitu ba bine basapulanga Bulopwe bwa Leza. Leza wātumine Yesu akasapule myanda miyampe ya Bulopwe. Bulopwe bwa Leza lo lukulupilo lumo kete ku muzo wa muntu. Yesu wāendelele na kwibusapula kufika’nka ne difuku dyaāfwile. (Luka 4:43; 8:1; 23:42, 43) Kadi wānenene amba balondi bandi nabo bafwaninwe kwibusapula. Shi ubamone muntu wakufwena mwisambile nandi pa Bulopwe bwa Leza, le molangila ukokeja kwikala wa mu kipwilo’ka?—Tanga Mateo 24:14.
Balondi ba Yesu kebatwelangapo mu myanda ya ino ntanda mibi. Ukebayukila ku kubulwa kutwela mu politike nansha mu ñuma ya tubila. (Yoano 17:16; 18:36) Kadi kebeulangapo bilongwa ne ngikadila imbi ya ino ntanda.—Tanga Yakoba 4:4.
Bene Kidishitu ba bine badi na buswe bukatampe umbukata mwabo. I befunde mu Kinenwa kya Leza kulēmeka bantu ba tubila tonso. Nansha bipwilo bya bubela byobyendelela kukwatakanya bininge mavita a mizo, batōtyi ba bine abo bapelanga kukwatakanya’o. (Mika 4:1-3) Bene Kidishitu ba bine bengidijanga kitatyi ne lupeto lwabo na mutyima umo mwanda wa kukwasha ne kukankamika bakwabo.—Tanga Yoano 13:34, 35; 1 Yoano 4:20.
4. Le pano ubwanya kujingulula kipwilo kya bine?
Le i kipwilo’ka kilondanga’nka Kinenwa kya Leza mu byonso byokifundija, kilēmeka dijina dya Leza, ne kusapula Bulopwe bwa Leza amba lo lukulupilo lumo kete ku bantu? Le i bāni badi na buswe bwa bine ne bapela kwiela mu mavita? Nenanga molangila, a?—Tanga 1 Yoano 3:10-12.