Le Masusu Akapwa?

BIBLE UNENA’MBA

“Leza . . . ukapampulanga impolo yonso mu meso abo, ne lufu kelukekala’kopo dikwabo, nansha madilo nansha miyoa nansha misanshi mine.”​—Kusokwelwa 21:3, 4, Bwalamuni bwa Ntanda Mipya.

BYOKAMWENA’MO

Kikulupiji kya amba ke Lezapo ulengeja masusu etu.​—Yakoba 1:13.

Ukasengibwa pa kuyuka’mba Leza nandi bimusansanga paetumona tususuka.​—Zekadia 2:8.

Lukulupilo lwa amba masusu onso asa kupwa.​—Ñimbo ya Mitōto 37:9-11.

LE TUBWANYA BINE KUKULUPILA BYOBYA BINENA BIBLE?

I amo, tala bidi bubinga bubidi:

• Leza ushikilwe masusu ne bukondame. Langulukila pa muswelo wēivwene Yehova Leza pādi pasusulwa bibi bantu bandi ba mu bitatyi byāsonekelwe Bible. Bible unena’mba, byāmusense mwanda wa “boba badi bebamwesha malwa.”​—Batyibi 2:18, Bwalamuni bwa Ntanda Mipya.

  Leza ufityilwanga mutyima boba basanshija bakwabo. Kimfwa, Bible unena’mba “makasa amwanga mashi ampikwa mambo” i a munyanji kwadi.​—Nkindi 6:16, 17.

• Leza utele muntu ne muntu mutyima. Ke’nkapo muntu ne muntu uyukile “kilonda kyandi ne masusu andi,” ino Yehova nandi uyukile’byo!​—2 Bilongwa 6:29, 30.

  Panopano ponka, Yehova usa kufundula’ko masusu a bantu bonso kupityila ku Bulopwe bwandi. (Mateo 6:9, 10) Pano’ko bidi, useñanga na lusa boba bamukimba bya binebine.​—Bilongwa 17:27; 2 Kodinda 1:3, 4.