Samwele Wādi Ulonga Nyeke Byoloke

Samwele paākidi mwanuke, wāshikete ne kwingila ku tabenakulo kwādi kwiyanga bantu mwanda wa kutōta Yehova. Le uyukile byālengeje Samwele akashikate ku tabenakulo? Ivwana bidi lusango lwa inandi Hana.

Mu bula bwa myaka, Hana wādi usaka kubutula mwana, ino kumona’ye mpika. O mwanda wālombele Yehova ne kumwisāshila’mba amukwashe. Wāmulaya’mba shi abutule’tu mwana mwana-mulume, nabya ukamutuma akashikate ne kwingila ku tabenakulo. Yehova wālondolwele milombelo yandi, penepa wābutula mwana mwana-mulume. Wāmwinika bu Samwele. Samwele aye ubwanya’tu myaka shi isatu shi iná, Hana wakamutūla ku tabenakulo akengidile Leza’nka na mwaālaile’kyo.

Edi ye wādi kitobo mukatampe ku tabenakulo. Bandi bana bana-balume babidi nabo bādi bengila’ko. Yuka’mba tabenakulo yādi njibo ya kutōtela’mo Leza, ne bantu bādi’mo bādi basakilwa kulonga’nka biyampe. Ino bana ba Edi abo bādi balonga bibi. Samwele wādi umwene bilongwa byabo. Le Samwele nandi wālongele bibi pamo na bana ba Edi?— Aa, aye wāendelele na kulonga byoloke, monka mwamufundijije’kyo ba shandi ne inandi.

Le ulanga, Edi wādi ufwaninwe kulonga bandi bana babidi bika?— Wādi ufwaninwe kwibapa mfuto. Kādipo wa kwibaleka bendelele na kwingila mu njibo ya Leza. Ino Edi kālongelepo namino, o mwanda Yehova wāmufityīlwe, aye ne bandi bana babidi. Yehova wānene kwibapa mfuto.

Difuku dimo bufuku Samwele ulēle, wāivwene muntu umwita’mba: ‘Samwele!’ Wānyemena kudi Edi, ino Edi aye’mba: ‘Nkikwityilepo.’ Kino kyālongeka misunsa ibidi. Musunsa wa busatu, Edi wālombola Samwele’mba shi waivwana bamwita monka nabya alondolole’mba: ‘Ami uno, Yehova, nena, nkutejanga.’ Ye mwālongēle Samwele. Ebiya Yehova wālombola Samwele’mba: ‘Sapwila Edi amba kisaka kyandi nkekipa mfuto pangala pa bintu bibi byobalonga.’ Le ulanga’mba kusapwila Edi uno musapu wādi mwanda upēla kudi Samwele?— Aa, ke mwandapo upēla. Ino nansha Samwele byaādi na kamoyo, aye’ko wālongele byāmunene Yehova. Bino binenwa bya Yehova byāfikidile. Bana babidi ba Edi bāipailwe, Edi nandi wāfwa.

Samwele i mwitushīle kimfwa kiyampe. Wālongele byoloke, nansha byaādi umona bakwabo balonga bibi. Le abe nobe? Le ukekala pamo bwa Samwele ne kulonga nyeke byoloke? Shi ulonge namino, nabya Yehova pamo ne bambutwile bobe bakasangala.