Yesu Wādi Ukōkela Nyeke

Lelo kyaba kyonso upēlelwanga kukōkela bobe bambutwile?— Kyaba kimo kekipēlangapo. Le uyukile amba Yesu wādi ukōkēle Yehova ne bandi bambutwile?— Kimfwa kyandi kikokeja kukukwasha ukōkele bobe bambutwile nansha pomona’mba i bikomo kulonga namino. Ivwana bivule pa uno mwanda.

Pādi Yesu kaile pano pa ntanda, wādi momwa mūlu pamo na Shandi Yehova. Ino Yesu wādi kadi ne bambutwile pano pa ntanda. Majina abo i Yosefa ne Madia. Le uyukile mobāikadile ke bandi bambutwile?—

Pādi Yesu momwa mūlu, Yehova wāyete būmi bwandi ne kwibwela mu difu dya Madia mwanda wa Yesu abutwilwe pano pa ntanda. Kino kyādi bine kingelengele! Yesu wādi wenda utama mu difu dya Madia enka mutaminanga bana bonso mu mafu a ba inabo. Kintu kya myeji kitema pa kupita’po, Yesu wābutulwa. Momwāikadile ba Madia ne mulumyandi Yosefa ke bambutwile ba Yesu ba pano panshi.

Yesu pa kufikija’tu myaka 12, wālongele kintu kimo kyālombwele amba wādi usenswe Shandi Yehova bya binebine. Wālongele kino pobāendele na kyabo kisaka ku Pashika mu Yelusalema. Pobādi bajokela kwabo, ba Yosefa ne Madia bākimba Yesu konsokonso, ino kumumona mpika. Le uyukile kwaādi?—

Yosefa ne Madia bājokela mu Yelusalema lubilo bakakimba Yesu konsokonso. Bāselele mutyima kūlu mwanda wa kubulwa kumumona. Ino kupwa kwa mafuku asatu, bāmutana mu tempelo! Le uyukile mwanda waka Yesu wādi mu tempelo?— I mwanda wa kufunda’ko myanda ya Shandi Yehova. Wādi usenswe Yehova kadi wādi usaka kufunda ayuke bya kulonga pa kumusangaja. Nansha ke paātamine, Yesu wādi ukōkela nyeke Yehova. Yesu wādi ukōkela nansha ke paādi umona’mba i bikomo kadi bimulomba asusuke. Le Yesu wākōkele ne ba Yosefa ne Madia?— En-en, momunenena’kyo Bible.

Le kimfwa kya Yesu kibakufundija bika?— Unenwe kukōkela bobe bambutwile, nansha pomona’mba i bikomo. Le ukalonga namino?—