Kukwatakanya Bulopwe—Kūbaka Mobo a Kutōtela’mo ne Kuleta Bukwashi

UBATWELA mu yenu Njibo ya Bulopwe, kotulumuka mwashintyila munda. Wadi witembanga nyeke ino njibo. Kadi ubavuluka ne mowakwashishe ku lūbako myaka kunyuma. Ino pano kyowitemba mu ino Njibo ya Bulopwe, i pa mwanda ibashinta ke kifuko kya kupānina’mo bukwashi mu bula bwa kitatyi kampanda. Kimpumpu pokyalobeje bibundi byenu, pambulwa kwija, Komite wa Musambo wakwete’ko mpangiko ya kukwasha boba batenwe na kino kinkumbulu amba bapebwe bidibwa, bivwalwa, mema malumbuluke, ne bikwabo. Byabuntu i bipange munda senene. Batutu ne bakaka bayule’mo batyikinya bapebwa byobasakilwa, impolo ya nsangaji ya bavule ibayengayenga mu meso.

Yesu wānene’mba kiyukeno kikatampe kya bantu bandi i buswe bobesenswe abo bene na bene. (Yoa. 13:34, 35) Mu kino kipindi tusa kubandaula’mo muswelo wilombola patōkelela Batumoni ba Yehova buswe kupityila ku mapoloje a lūbako, ne ku byabuntu bya bukwashi. Buno buswe i bukamoni bumwekelele bulombola’mba twi babikalwa ba Bulopwe buludikwa na Yesu.