Balongololwe Mwa Kulongela Kiswa-Mutyima kya Yehova

KUJOKOLOKA ntanda yonso, kudi malongolodi mavule a bipwilo, a politike, a busunga, ne a bitango bya bantu a miswelo, bitungo, mimweno, ne milangilo palapala ya bantu. Ino kudi bulongolodi bumo bwishile kulampe na ano onso. Kinenwa kya Leza kilombola patōka’mba buno bulongolodi i bwa Batumoni ba Yehova.

² Na bya dyese, nobe ubatwela mu bulongolodi bwa Yehova. Pano uloñanga kiswa-mutyima kya Leza mwanda ubemwena mokikadile. (Ñim. 143:10; Loma 12:2) Wi mwingidi wingila pamo na kitango kya buswe kya bana na bana ba ntanda yonso. (2 Ko. 6:4; 1 Pe. 2:17; 5:9) Monka mwālaile’kyo Kinenwa kya Leza, kino kikuletelanga madyese mavule ne nsangaji. (Nki. 10:22; Mako 10:30) Kulonga kolonga kiswa-mutyima kya Yehova na kikōkeji pano, kukuteakanyanga ku būmi bwa kumeso bwa endaenda kadi bwa ntumbo.​—1 Tm. 6:18, 19; 1 Yo. 2:17.

³ Umpangi wetu Mukatakata udi na bulongolodi bumo kete bwa ntanda yonso bwa pa bula buludikwa mungya kiteokratike. Ko kunena’mba buludikwanga na Yehova, Mutwe wa byonso. Tumukulupile ne pa mfulo. Aye ye Mutyibi wetu, wetu Mujidiki wa Bijila, kadi Mulopwe wetu. (Isa. 33:22) Byadi Leza wa ndudi, i mutūle’ko mpangiko amba ‘twingile nandi pamo’ mu kuvuija mpango yandi.​—2 Ko. 6:1, 2.

⁴ Pano penda pafwena bininge mfulo ya ino ngikadilo ya bintu, twendanga’nka kumeso na kulonda bwendeji bwa Kidishitu Yesu, Mulopwe mutongwe. (Isa. 55:4; Kus. 6:2; 11:15) Yesu ye wālaile amba balondi bandi bakengila mingilo mikatampe kupita yoya yawāingile paādi pano panshi. (Yoa. 14:12) I bya bine, mwanda balondi ba Yesu bādi ba kusambakanya mwaba mukatampe, mu kitatyi kilampe, ne kadi bantu badi ba kuvudila’ko. Badi ba kusapula myanda miyampe ya Bulopwe kufika ne ku mfulo kwa ntanda.​—Mat. 24:14; 28:19, 20; Bil. 1:8.

⁵ Kino i kifikidile bine. Inoko, pamo na mwānenene’kyo Yesu patōkelela, mwingilo wa kusapula myanda miyampe ukafula pa kitatyi kitungwe na Yehova mwine. Biyukeno byonso bya mu Kinenwa kya Leza kya bupolofeto bilombola’mba difuku dikatampe dya Yehova kadi dilenga nzuba dibafwena pabwipi.​—Yoe. 2:31; Zef. 1:14-18; 2:2, 3; 1 Pe. 4:7.

⁶ Byotwajingulula kiswa-mutyima kine kya Yehova mu ano mafuku a mfulo, tufwaninwe kwielela’ko kulonga byobya bisaka Leza. Kino kitulomba kujingulula biyampe mwingidila bulongolodi bwa Leza ne kwingidila nabo pamo mu byonso. Mwingidilo wa bulongolodi wimanine pa misoñanya ya mu Bisonekwa, kadi ne pa mbila, bijila, bulombodi, ne bufundiji bulombwelwe patōka mu Kinenwa kya Leza kya ku bukomo bwa mushipiditu.​—Ñim. 19:7-9.

⁷ Bantu ba Yehova pobalonda buno bwendeji bwa mu Bible, bashikatanga ne kwingidila pamo mu ndoe ne mu bumo. (Ñim. 133:1; Isa. 60:17; Loma 14:19) I kika kiningishanga kipwano kya banabetu pi na pi? I buswe. Tutononwanga na buswe kadi twibuvwele. (Yoa. 13:34, 35; Kol. 3:14) Bitutōkelwe Leza mutyima uno muswelo, o mwanda twendelanga pamo na kipindi kya mūlu kya bulongolodi bwa Yehova.

KIPINDI KYA MŪLU KYA BULONGOLODI BWA YEHOVA

⁸ Mupolofeto Isaya, Ezekyele, ne Danyele, bāmwene bimonwa bya kipindi kya mūlu kya bulongolodi bwa Yehova. (Isa., shap. 6; Ezk., shap. 1; Dan. 7:9, 10) Ne mutumibwa Yoano nandi wāmwene kimonwa kya ino mpangiko ya mūlu, wētupa’ko netu kitōkeji kityetye mu mukanda wa Kusokwelwa. Wāmwene Yehova pa lupona lwa ntumbo koku bamwikeulu bēla tubobo amba: “Ujila, ujila, ujila i Yehova Leza, Mwinē Bukomo Bonso, wādi’ko ne udi’ko ne ukāya’ko.” (Kus. 4:8) Kadi Yoano wāmwene “mu bukata mwa lupona . . . mwimene Kana ka Mukōko,” Kana ka Mukōko ka Leza, ke Yesu Kidishitu kadi.​—Kus. 5:6, 13, 14; Yoa. 1:29.

⁹ Kino kimonwa kya Yehova ushikete pa lupona kilombola’mba aye ye Mutwe wa buno bulongolodi. Kisonekwa kya 1 Bilongwa bya Mafuku 29:11, 12 kīsambila padi ne pa kitenta kyandi kya peulu amba: “A Yehova, bukatampe ne bukomokomo ne bulumbuluke ne buya bwa dyangi ne bukatakata i byobe, mwanda bintu byonso bidi mūlu ne pano panshi i byobe. Bulopwe i bobe, abe Yehova. Abe Ye wizunzulanga bu mutwe pa bonso. Bupeta ne ntumbo bitambanga kodi, kadi uludikanga bintu byonso, mu kuboko kobe mudi bukomo ne bukomokomo, kadi mu kuboko kobe mubwanya kubaija ne kupāna bukomo ku bonso.”

¹⁰ Yesu Kidishitu i mwingidi wingila pamo na Yehova, o mwanda nandi udi na kitenta kikatampe momwa mūlu, kadi i bamupe ne lupusa luvule. Bine, Leza “watūdile bintu byonso munshi mwa maulu andi, wamutūla bu mutwe pa bintu byonso pa mwanda wa kipwilo.” (Ef. 1:22) Mutumibwa Polo wēsambīle padi Yesu amba: “Leza wamuzunzwile pa kyaba kya peulu kutabuka kadi wamupa na mutyima tō dijina didi peulu pa majina makwabo onso, amba mu dijina dya Yesu manwi onso amufukatyile​—a badi momwa mūlu ne a badi pano panshi ne a badi munshi mwa pa nshi​—kadi ndimi yonso itabije patōkelela amba Yesu Kidishitu i Mfumwetu pa mwanda wa ntumbo ya Leza Tata.” (Fid. 2:9-11) Nanshi tufwaninwe kukulupila na mutyima umo bwendeji boloke bwa Yesu Kidishitu.

¹¹ Mupolofeto Danyele wāmwene mu kimonwa Mukulu wa Mafuku ushikete pa lupona Lwandi mūlu koku bamwikeulu ‘tununu kanunu bamwingidila, kadi tununu dikumi misunsa tununu dikumi bemene ku meso andi.’ (Dan. 7:10) Bible utela kino kibumbo kya bamwikeulu bu “mishipiditu mwanda wa mingilo ijila, batumwa kukengidila boba ba kukapyana lupandilo.” (Bah. 1:14) Bino bipangwa byonso bya ku mushipiditu i bilongololwe mungya ‘mpona, bufumu, imbikalo, ne lupusa.’​—Kol. 1:16.

¹² Shi twitūdile’ko kitatyi kya kubandaula bintu palapala bya kipindi kya mūlu kya bulongolodi bwa Yehova, tukevwanija biyampe kine kyātuyukīle Isaya pa kumona mu kimonwa Yehova “ushikete pa lupona lulampe kadi luzunzulwe,” koku nako “baselafimi badi bemene” pangala pandi. Isaya wādila’mba: “Malwa ami! Kendi pamo’nka bwa mufwe, mwanda amiwa ne muntu wa milomo ya disubi, kadi nshikete mu bantu ba milomo ya disubi; mwanda meso ami abamone Mulopwe, Yehova wa bibumbo aye mwine!” Bine, Isaya wāponenwe na nzuba, wētyepelwa pa kujingulula mwikadile bukatampe bwa bulongolodi bwa Yehova. Wātengelwe mpata na kino kintu, o mwanda pobāityile lwito momwa mūlu lwa kukimba wa kukengila mwingilo wa pa bula wa kukasapula butyibi bwa Yehova, Isaya wālondolwele amba: “Ami uno! Ntume.”​—Isa. 6:1-5, 8.

¹³ Kujingulula ne kutendela bulongolodi bwa Yehova kukunkanga bantu bandi ku mutyima muswelo umo onka. Ponso pendelela bulongolodi kumeso, netu twielelanga’ko kwendela nabo pamo. Tuloñanga buninge bwa kukulupila mu bulongolodi bwa Yehova dyalelo.

BULONGOLODI BWA YEHOVA BWENDANGA KUMESO

¹⁴ Mu shapita 1 wa bupolofeto bwa Ezekyele, i balombole’mo Yehova ukandile pa dikalo dikatakata dya momwa mūlu. Dino dikalo dyeñenya dyelekeja kipindi kyambulwa kumweka kya bulongolodi bwa Yehova. Ukandile pa dino dikalo, mwanda aye ye wibubikele na mutyima muyampe ne kwibwingidija kukwatañana na mpango yandi.​—Ñim. 103:20.

¹⁵ Ditonto ne ditonto dya dino dikalo didi na ditonto dikwabo mu bukata mwadyo​—dya bula bumo dipindakene nadyo. Kino kyo kinenenwa’mba matonto’a adi abwanya “kwenda ku mutamba o-onso pa mitamba iná.” (Ezk. 1:17) Matonto’a akokeja kwenda bukidi bukila bonso. Inoko, dino dikalo kedyendangapo kyendeende pa kubulwa muntu wa ñeni widiludika. Yehova kalekangapo bulongolodi bwandi bwenda konso kobusaka kwenda. Ino Ezekyele 1:20 unena’mba: “Byadi byenda kokwa kwadi kwibisakila mushipiditu kwenda.” Nanshi Yehova ye wendeja bulongolodi bwandi konso kusaka mushipiditu wandi kwibwendeja. Ino kipangujo kyotufwaninwe kwiipangula i kino, ‘Le nami ñendelanga nabo pamo?’

¹⁶ Kwendela pamo na bulongolodi bwa Yehova kulomba bivule, ke’nkapo’tu kupwila ne kutambila mu mwingilo wa busapudi kete. Ino dibajinji, kwendela nabo pamo i kwendelela kumeso ne kutama ku mushipiditu. ‘Tujingululanga bintu bya mvubu mikatampe’ ne kulonda nyeke myanda mipya iletwa mu mpangiko ya byakudya bya ku mushipiditu. (Fid. 1:10; 4:8, 9; Yoa. 17:3) Kadi tufwaninwe kuvuluka’mba kokwa kudi bulongolodi, kufwaninwe kwikala ne ndudi miyampe ne kipwano kya kwingidila pamo. O mwanda tufwaninwe kuyuka mvubu ya kwingidija senene bituntwa bya ku mushipiditu ne bya ku ngitu bitupele Yehova mwanda wa kuvuija mwingilo wandi. Ponso potwendela pamo na dikalo dya mūlu dya Yehova, būmi bwetu bukwatañananga na musapu otusapula.

¹⁷ Bulongolodi bwa Yehova bwitukwatakanyanga, o mwanda twendanga’nka kumeso mu kulonga kiswa-mutyima kya Leza. Vuluka’mba Mwine ukandile pa dino dikalo dya mūlu i Yehova. Nanshi, kutabwila pamo na dikalo dyandi kulombola’mba tulēmekele Yehova kadi tukulupile mu Dibwe dyetu. (Ñim. 18:31) Bible ulaya’mba: “Yehova ukapa bantu bandi bukomo. Yehova ukesela bantu bandi na ndoe.” (Ñim. 29:11) Byotudi mu bulongolodi bwa Yehova dyalelo, netu tutambulanga bukomo bwapāna kadi tudi na ndoe yapanga bantu bandi balongololwe. Bine ne bine ponka, tukeselwa nyeke madyese mavule ponso potulonga kiswa-mutyima kya Yehova dyalelo ne mafuku onso nyeke ne nyekeke.