“Vulukai Boba Bemutangidile Kumeso”

BINO binenwa bya mutumibwa Polo bilembelwe mu Bahebelu 13:7, bibwanya ne kwalamunwa’mba: “Vulukai boba bemwendeja.” Tamba mu Pentekosa 33 Yesu ke mwiye, batumibwa ba kikōkeji ba Mfumwetu Yesu Kidishitu bāfikidije kino na kwingila bu kitango kyendeji kyādi kimanine mwingilo wa kupāna bwendeji ku kipwilo kya bwine Kidishitu kyādi kikishilula. (Bil. 6:2-4) Dya mu mwaka wa 49 Yesu ke mwiye, kino kitango kyendeji kyābaijibwe na kutweja’mo ne boba ke batumibwapo ba Yesu. Pātyibilwe mwanda wa disao, mu kitango kyendeji mwādi “batumibwa ne bakulumpe mu Yelusalema.” (Bil. 15:1, 2) Bādi ne na mwingilo wa kupwija myanda itala bene Kidishitu konsokonso. Bātumine mikanda ne mbila yādi ikankamika bipwilo ne kulengeja bana ba bwanga bekale mu bumo, mu milangwe ne mu bilongwa. Bipwilo byādi bikōkela ne kukōkelelela ku bwendeji bwa kitango kyendeji, ne kino kyālengeje bipwilo byeselwe na Yehova ne kwendelela kumeso.​—Bil. 8:1, 14, 15; 15:22-31; 16:4, 5; Bah. 13:17.

² Batumibwa pa kufwa, kwāikala bupondo bukatampe. (2 Ts. 2:3-12) Enka mwānenene’kyo Yesu mu kyelekejo kya biyombo bityani ne ñano, mu ñano (bene Kidishitu bashingwe māni) mwākuninwe biyombo bityani (bene Kidishitu ba bubela). Mu bula bwa myaka tutwa tuvule, bino bisumpi byalekelwe byenda bitamina pamo kufika ne ku mwangulo, ko kunena’mba ku “mvuyo ya ngikadilo ya bintu.” (Mat. 13:24-30, 36-43) Mu kino kitatyi, bene Kidishitu bashingwe māni wa pandi wa pandi baendelele kwitabijibwa na Yesu, inoko kitango kyendeji kekyakidi’kopo, kekwadipo dishinda dipotoloke pano pa ntanda dingidijibwa na Yesu mwa kupēla balondi bandi bwendeji. (Mat. 28:20) Inoko, wālaile amba mu kitatyi kya mwangulo, bintu byadi bya kushinta.

³ “Na bubine, le umpika mukōkele ne mudyumuke i ani le?” Kino kyo kipangujo kyāshilwile nakyo Yesu kyelekejo kyandi, bu kipindi kya “kiyukeno” kyaāletele kitala pa “mvuyo ya ngikadilo ya bintu.” (Mat. 24:3, 42-47) Yesu wānenene amba uno umpika mukōkele wadi wa kwikwata’ko na mingilo ya kupa bantu ba Leza byakudya bya ku mushipiditu “pa kitatyi kifwaninwe.” Monka mwāingidijije Yesu kisumpi kimo kya bana-balume​—pa kyaba kya muntu umo​—mwanda wa kutangidila kumeso mu myaka katwa kabajinji, ne umpika mukōkele wingidijibwa na Yesu ku mvuyo ya ngikadilo ya bintu nandi ke muntupo umo.

KUJINGULULA “UMPIKA MUKŌKELE NE MUDYUMUKE”

⁴ Le Yesu wātongele ani wa kudisha balondi bandi? I kyendele’mo engidije enka bene Kidishitu bashingwe māni pano pa ntanda. Bible wibatela bu “butobo bwa bulopwe” bapelwe mwingilo wa kusapula “‘pi na pi binengele’ bya yewa webetyile ku fukutu bende ku kitōkeji kyandi kya kutendelwa.” (1 Pe. 2:9; Mal. 2:7; Kus. 12:17) Lelo bashingwe māni bonso pano pa ntanda bo babundile umpika mukōkele? Aa. Yesu paādishishe mu kingelengele kintu kya bana-balume 5 000, pampikwa kubala bana-bakaji ne bana, wāpele’byo bidi bana bandi ba bwanga, kupwa nabo kebabila bibumbo. (Mat. 14:19) Wāingidije bantu batyetye mwanda wa kudisha bavule. Ne dyalelo mo monka mwapānina byakudya bya ku mushipiditu.

⁵ Nanshi “kalama mukōkele, mudyumuke,” i kisumpi kityetye kya batutu bashingwe māni bene bepēne mu kuteakanya ne kupāna byakudya bya ku mushipiditu mu kitatyi kya kwikala’po kwa Kidishitu. (Luka 12:42) Mu bula bwa mafuku a mfulo, batutu bashingwe māni babundile “umpika mukōkele ne mudyumuke” bengidilanga pamo ku kité kya ntanda yonso. Dyalelo, bano batutu bashingwe māni kyo Kitango Kyendeji kya Batumoni ba Yehova.

⁶ Kidishitu wingidijanga kino kitango pa kulupula myanda ya kufikidila kwa bupolofeto bwa mu Bible ne kuleta pa kitatyi kifwaninwe bwendeji bulombola mwa kulondela misoñanya ya mu Bible mu būmi bwa difuku ne difuku. Bino byakudya bya ku mushipiditu bipebwanga bantu kupityila ku bipwilo bya Batumoni ba Yehova. (Isa. 43:10; Ngt. 6:16) Mu kitatyi kyāsonekelwe Bible, umpika ukulupilwa, nansha kalama, ye wādi utala njibo. Ne dyalelo nadyo, umpika mukōkele ne mudyumuke udi na kiselwa kya kutala ba mu njibo ya lwitabijo. Kadi umpika mukōkele utalanga ne bituntwa bya ku ngitu, mwingilo wa busapudi, mpangiko ya bitango, kutongwa kwa batadi ba kwingila mu mingilo palapala mu bulongolodi, ne kulupula mabuku esambila pa Bible, byonso bino mwanda wa kamweno ka “ba mu njibo.”​—Mat. 24:45.

⁷ Penepo, le “ba mu njibo” i bāni? Mu kīpi, i boba bonso badishibwa. Dibajinji, ba mu njibo bonso bādi bashingwe māni. Mwenda mafuku, kibumbo kikatampe kya “mikōko mikwabo” nakyo kyabadilwa mu ba mu njibo. (Yoa. 10:16) Bino bisumpi byonso bibidi bidyanga byakudya bya ku mushipiditu bilupulwa na umpika mukōkele.

⁸ Mu bula bwa kyamalwa kikatampe, pasa kwiya Yesu kuketa mambo ne kufikidija butyibi pa ino ngikadilo mibi, ye pasa kutūla umpika mukōkele “kulama bintu byandi byonsololo.” (Mat. 24:46, 47) Boba babundile umpika mukōkele bakatambula mpalo yabo ya mūlu. Abo pamo ne bashele’ko mu ba 144 000, bakengila pamo na Kidishitu mu lupusa lwandi lwa mūlu. Nansha byokekukelapo monka umpika mukōkele ne mudyumuke pano panshi, ino ba Yehova ne Yesu bakendelela kuleta bwendeji ku babikalwa badi pano pa ntanda ba Bulopwe bwa Meshiasa kupityila ku boba bakatongwa kwingila bu “bamfumu.”​—Ñim. 45:16.

MWANDA WAKA ‘TUVULUKE BOBA BATANGIDILE KUMESO’?

⁹ Kudi bubinga buvule bulengeja ‘tuvuluke boba batangidile kumeso’ ne kwibakulupila. Mwanda waka kwibavuluka kudi na kamweno kotudi? Mutumibwa Polo wānenene amba: “Bemulamanga bu bantu bakeshintulwila, amba balonge namino na nsangaji ke na kubinzapo, nabya bikemwikadila bibi.” (Bah. 13:17) I kya kamweno kotudi kukōkela ne kukōkelelela bwendeji bwa boba betutangidile mwanda betukiñanga ne kwitwikadija biyampe ku mushipiditu.

¹⁰ Polo wānenene monka mokilembelwe mu 1 Bene Kodinda 16:14 amba: “Byonso byomulonga longai’byo na buswe.” Butyibi bukwatwa pa mwanda wa bantu ba Leza bwimaninanga pa ino ngikadila mitabuke bukata, ke buswe kadi. 1 Bene Kodinda 13:4-8 unena pangala pa buswe amba: “Buswe budi na kitūkijetyima ne kanye. Buswe kebudipo na mukao. Kebwianyangapo, kebwitatulangapo, kebuloñangapo byampikwa kwendela’mo, kebukimbangapo tumweno twa abo bwine, kebukelwangapo bulobo. Kebubalangapo bibi bilongelwe. Kebusangelangapo bukondame, ino busangalanga pamo na bubine. Butyumwinanga byonso mu manwi, bwitabijanga byonso, bukulupilanga byonso, būmininanga byonso. Buswe kebukankalwangapo.” Butyibi bonso bukwatwa mwanda wa kamweno ka bengidi ba Yehova byobwimanine pa buswe, nanshi tudi na bubinga bwa kwikala na mutyima-ntenke mu buno bwendeji. Kadi buno buswe i kilomboji’tu kya buswe bwa Yehova.

¹¹ Monka mobyādi bikadile mu myaka katwa kabajinji, boba bengidijibwa na Yehova mwanda wa kwendeja bantu bandi i bantu ba kubulwa kubwaninina. Ne pa kala pene, Yehova wādi wingidija bantu ba kubulwa kubwaninina mwanda wa kufikidija kiswa-mutyima kyandi. Noa wāpungile safina ne kusapula kwiya kwa bonakani mu mafuku andi. (Ngo. 6:13, 14, 22; 2 Pe. 2:5) Mosesa wātongelwe kutambija bantu ba Yehova mu Edipito. (Div. 3:10) Bantu ba kubulwa kubwaninina bo bāpelwe mushipiditu ujila amba basoneke Bible. (2 Tm. 3:16; 2 Pe. 1:21) Kwingidija kwingidija Yehova bana-balume ba kubulwa kubwaninina dyalelo batangidile mwingilo wa kusapula ne kulonga bana ba bwanga kekuzozejangapo kikulupiji kyotukulupile bulongolodi bwa Leza. Ino kwitukomejanga, mwanda tubayuka’mba kwampikwa bukwashi bwa Yehova, bulongolodi kebwadipo bwa kubwanya kulonga byonso byobulonga’bi. Mu bikoleja ne myanda mikomo itutana, umpika mukōkele i mulombole amba mushipiditu wa Leza o wendeja bintu. Dyalelo madyese mavule i mapungulwilwe pa kipindi kimweka kya bulongolodi bwa Yehova. O mwanda mwine twibukwatakenye na mutyima umo ne kwibukulupila.

MOTULOMBWELA KIKULUPIJI KYETU

¹² Boba batongelwe kusela biselwa mu kipwilo balombolanga kikulupiji kyabo na kwitabija na nsangaji biselwa bine byobebatongēle ne kwibivuija na kikōkeji. (Bil. 20:28) Byotudi basapudi ba Bulopwe, tutambilanga na bupyasakane mu mwingilo wa ku njibo ne njibo, tulonga kujokela’mo, ne kwendeja bifundwa bya Bible ku mobo. (Mat. 24:14; 28:19, 20) Kadi twiteakanyanga ne kutanwa ku kupwila ne ku bitango mwanda wa kumwena ne pa mfulo mu byakudya bya ku mushipiditu byobetupa kudi umpika mukōkele. Tumwenanga mpata mu kwikankamika kwa batwe bene na bene potwitana na banabetu ku kuno kupwila kwa bwine Kidishitu.​—Bah. 10:24, 25.

¹³ Kitatyi kyotukwatakanya bulongolodi bwetu na byabuntu bya ku ngitu, tulombolanga’mba twibukulupile. (Nki. 3:9, 10) Potwivwana’mba kudi banabetu basakilwa bukwashi ku ngitu, twibakwashanga pampikwa kulejaleja. (Ngt. 6:10; 1 Tm. 6:18) Tuloñanga bino byonso na mushipiditu wa buswe bwa bu bana na bana, koku tukimba nyeke mikenga ya kufwija’ko Yehova ne bulongolodi bwandi pa biyampe byobetulongela.​—Yoa. 13:35.

¹⁴ Kadi tulombolanga’mba tukulupile bulongolodi na kukwatakanya butyibi bobukwata. I kubadila’mo ne kulonda na kwityepeja bwendeji bwa boba batongelwe bu batadi, kimfwa batadi ba bipindi ne bakulumpe pa kipwilo. Bano batutu babadilwa mu boba ‘batangidile kumeso,’ bene botufwaninwe kukōkela ne kukōkelelela. (Bah. 13:7, 17) Nansha shi ketwivwanijepo senene buluji bwakwatyilwa butyibi kampanda, tuyukile amba kwibukwatakanya kuketuletela byabuyabuya bya endaenda. O mwanda Yehova nandi witweselanga pangala pa kikōkeji kyotukōkele Kinenwa kyandi ne bulongolodi bwandi. Namino tulombolanga’mba tukōkele Mfumwetu, ke Yesu Kidishitu kadi.

¹⁵ Bine, tudi na bubinga bonso bwa kukulupidila ne pa mfulo umpika mukōkele ne mudyumuke. Satana, leza wa ino ngikadilo ya bintu, uloñanga bukomo bwandi bonso bwa kufwija bumvu dijina dya Yehova ne bulongolodi bwandi. (2 Ko. 4:4) Kokolwa kuponena mu makinga mabi a Satana! (2 Ko. 2:11) Aye uyukile amba kubamushadila “kakitatyi katyetye” kete elwe mu lupongo, o mwanda i musumininwe kupalula bantu ba Yehova bavule kwadi. (Kus. 12:12) Inoko, pano penda palundila’ko Satana bukomo bwandi, tufwenei bininge kudi Yehova. Tukulupilei Yehova ne dishinda dyaingidija pa kuludika bantu bandi dyalelo. Kino kikalengeja twikale mu bumo bwa bu bana na bana.