Le Bible Ubwanya Kunkwasha Namani?

WADI WA KULONGA’PO NAMANI?

Tala bidi uno mwanda: David wendeja motoka mu ntanda-bene mwakebidile. Biyukeno bya kufula ne bya mu mashinda bimulombola’mba weluba dishinda. David wayuka’mba wajimina. Paadi wiya, watwelanga mu dishinda dingi.

Shi wadi’mba abe ye David, wadi wa kulonga’po namani?

KUNKUMANA ULANGULUKE!

Udi na butongi bwa kutonga:

1. Kwipangula dishinda.

2. Kutala kalata, nansha GPS (mpangiko ya elektronike ilombola kodi).

3. Kwenda bitupu, na kikulupiji kya amba usa kusokola dishinda abe mwine.

Bimweka’mba, kutonga Kipindi C ke kuyampepo.

Kutonga Kipindi B kudi na kamweno kupita’ko kibajinji. Mwanda, kalata nansha GPS i kintu kyodi nakyo mu lwendo, kikuludika kwa kwenda.

Bible ubwanya kukukwasha muswelo umo!

Dino dibuku dipotwa konso dibwanya

• kukukwasha mu makambakano a mu būmi

• kukukwasha wiyuke ne kwikala muntu muyampe

• kukulombola mwa kwikadila na būmi butabukile kunengela

KULONDOLA BIPANGUJO BIKATAMPE BYA MU BŪMI

Mu kitatyi’tu kyotushilula kunena, tuvudile kwiipangula bipangujo.

• Mwanda waka diulu difītuluka?

• Ñenyenye i mipungwe na bika?

Kupwa twiipangulanga pa bitala ntanda yotudi’mo.

• Mwanda waka bintu bibi bilongeka?

• Mwanda waka bantu bafwa?

Le tukeimvwana namani shi twatana mu Bible malondololo a bino bipangujo?

Bavule banenanga’mba mu Bible i muyule ñano ne mānga ya bitupubitupu, aba amba ke wa kala, nansha amba i mukomo kwimvwana. Ino le makambakano adi pa binena Bible’ni nansha ku bilañanga bantu amba byo binena Bible? Le babulwe padi basapwidilwe bya bubela?

Kimfwa kudi bantu balanga’mba Bible unenanga’mba i Leza uludika ino ntanda. Le i bya bine? Ino ntanda miyule kavutakanya nenki! I miyule misanshi ne masusu, misongo ne lufu, bulanda ne bimpengele. Le bine Leza wa buswe ubwanya kuleta bino bintu?

Le usaka kuyuka malondololo? Padi ukatulumuka pa kuyuka binena Bible pa mwine uludika ino ntanda!

Monka mowamwena, madingi adi mu uno boloshile i matambe mu Bible. Batumoni ba Yehova bakulupile amba mu Bible mo mutamba bwendeji bukulupilwa. Ne kino i mwanda, kino Kinenwa kya Leza i “kisonekejibwe na mushipiditu wa Leza kadi i kya kamweno pa kufundija, pa kudingila, pa kolola.” (2 Temote 3:16, 17) Tukulomba abe mwine witangile kino kitabo kya kala, inoko kidi’mo myanda ipita dyalelo!