Kingelengele pa Dijiba Dityila

Felo pāivwene amba bene Isalela abatambe mu Edipito, wēalakenye kine kyāebalekele bende. Wāsoñanya bantu bandi ba bulwi amba: ‘Teakanyai makalo ami onso a divita tukebalonde! Ketufwaninwepo kwibaleka bende.’ Aye ne bantu bandi bāshilula kulonda lubilo bene Isalela.

Yehova wādi wendeja bantu bandi, mu dyuba na dikumbi, bufuku na mudilo. Wēbendeje kufika ne pa Dijiba Dityila, wēbanena bashimike nkambi.

Penepo bene Isalela bāmona Felo ne kibumbo kyandi kya divita bebalonda lubilo. Bājikīlwe pa bukata, koku dijiba, koku nako kibumbo kya divita kya bene Edipito. Kēbadidila Mosesa amba: ‘Tubafu! Shi wetulekele’nka mu Edipito’mwa.’ Ino Mosesa wēbanena’mba: ‘Kemwakikwatwai moyo. Ilaijai, mumone musa kwitupandijija Yehova.’ Na bubine, Mosesa wākulupile Yehova, mwene i amo?

Yehova wāsapwidile bene Isalela batalule nkambi. Bwine bufuku’bwa, Yehova wātalula dikumbi wēditūla pa bukata bwa bene Edipito ne bene Isalela. Ku mutamba wa bene Edipito kwādi fukutu. Inoko ku mutamba wa bene Isalela kwādi kitōkeji.

Yehova wāsapwidile Mosesa ōlole kuboko kwandi pa dijiba. Kupwa Yehova wāpukumija luvula lukatampe bufuku bonso. Dijiba dyēkalañanya pabidi, mu bukata mwāshala dishinda dya kupita’mo. Bene Isalela midiyo ne midiyo bāpita pa nshi pōmu tē, pa bukata bwa mumbu ya mema, bāenda bukila.

Kibumbo kya Felo kyālondele bene Isalela mu kyalo kya mema mūmu. Kupwa Yehova wāleta kavutakanya mu kibumbo kya divita. Matonto a makalo abo onso āshilula kukonkoka. Basola bāela ñanji amba: ‘Tutambei’mo! I Yehova wibalwila.’

Yehova wāsapwila Mosesa amba: ‘Ōlola kuboko kobe pa dijiba.’ Ponka’po mumbu ya mema yābundukila kibumbo kya divita kya bene Edipito. Felo ne bantu bandi bonso bāfwa. Kekwāpandilepo nansha umo.

Ou mutamba mukwabo wa dijiba, kibumbo kikatampe kya bantu kyātendela Leza na lwimbo amba: “Imbila Yehova, mwanda wezunzula peulu bininge. Kabalwe ne mwine utentamine’po webela mu dijiba.” Bantu pobādi bemba, bana-bakaji bāja ne komba maoma. Abo bonso bāsangele bininge amba pano bine abanyongololwa.