Mpunda wa Balame Wanena

Bene Isalela abalonga myaka isenselela ku 40 mu ntanda mutuputupu. Ke banekenye bibundi bivule bikomokomo. Pano, abatūla nkambi mu malungu a Moabu, kutunduka kwa Munonga wa Yodano, kitatyi kyābwene kya abo kutwela mu Ntanda ya Mulao. Balake, mulopwe wa Moabu, wādi utyina bene Isalela bakamuyata yandi ntanda. O mwanda wāityije mwana-mulume umo wa dijina dya bu Balame āye ku Moabu afinge bene Isalela.

Inoko Yehova wāsapwidile Balame amba: ‘Kufwaninwepo kufinga bene Isalela.’ Penepo Balame wāpela kwenda. Mulopwe Balake wāmwityija musunsa wa bubidi ne kumulaya’mba usa kumupa kintu kyonso kyasaka. Balame wāpela monka. Kupwa, Leza wāmulombola’mba: ‘Ubwanya kwenda, inoko ukanena’nka byonkakulombola.’

Balame wākanda pa mpunda wandi kāenda ku Moabu. Wākwata mulangwe wa kukafinga bene Isalela, nansha byāmupeleje Yehova kukebafinga. Mwikeulu wa Yehova wāmumwekela misunsa isatu. Balame kādipo umona uno mwikeulu. Dibajinji mpunda wāsāsuka mu dishinda kāenda mu budimi. Kupwa mpunda wētyininya ku lubumbu lwa mabwe, wāfininya’ko ne Balame kulu. Ku mfulo, mpunda wālāla panshi mu bukata bwa dishinda. Musunsa ne musunsa onso, Balame wādi ukupila mpunda na lusonde.

Pa kupwa musunsa wa busatu, Yehova wāneneja mpunda. Mpunda wāipangula Balame amba: ‘Mwanda waka unkupila’nka kunkupila?’ Balame wāmulondolola’mba: ‘I mwanda ubaunembakanya. Shi nadi na kipete nadi wa kukwipaya.’ Mpunda wāmunena’mba: ‘Unkandanga mu myaka mivule. Le nkendi mukulonge monka uno muswelo?’

Penepo Yehova wālengeja Balame amone mwikeulu. Mwikeulu wāmunena’mba: ‘Yehova wakudyumunanga’mba kokikafinga Isalela.’ Balame wānena’mba: ‘Naluba. Nakajokela kwami.’ Inoko mwikeulu wamulombola’mba: ‘Ubwanya kwenda ku Moabu, inoko ukesamba enka bikakulombola Yehova kunena.’

Le Balame wēfundile’ko kintu kampanda? Aa. Balame wāsakile kufinga Isalela misunsa isatu, inoko Yehova wāmulengeje ebesele misunsa yonso isatu pa kyaba kya kwibafinga. Mwenda mafuku, bene Isalela bākatamba’dyo Moabu, ne Balame nandi wāipaibwa. Mwene byādi bya kwikala biyampe, shi Balame wātejeje Yehova enka musunsa mubajinji’wa?