Yehova Watonge Yoshua

Pa kupwa kwendeja muzo wa Isalela mu myaka mivule, būmi bwa Mosesa kebusa kufula. Yehova wāmulombwele amba: ‘Ke abepo ukatweja bene Isalela mu Ntanda ya Mulao. Inoko nsa kukulombola ino ntanda wiimone.’ Penepo Mosesa wānena Yehova atonge mwendeji mupya wa kukwatakanya bantu. Yehova wāmulo- mbola’mba: ‘Enda kudi Yoshua, umusapwile’mba i aye onatonga.’

Mosesa wāsapwila muzo amba kasa kufwa ne amba Yehova watonge Yoshua akebatweje mu Ntanda ya Mulao. Kupwa, Mosesa wālombola Yoshua amba: ‘Kokikwatwa moyo. Yehova usa kukukwasha.’ Kupwa papo, Mosesa wākanda pa nsongo ya Lūlu lwa Nebo, pene pāmulombwele Yehova ntanda yaālaile Abalahama, Izake, ne Yakoba. Mosesa wāfwile na myaka 120.

Yehova wālombwele Yoshua amba: ‘Abuka Munonga wa Yodano, ukatwele mu Kenani. Nsa kukukwasha monka monakwashishe Mosesa. Longa bukomo bwa kutanga Bijila byami difuku ne difuku. Kokikwatwa moyo. Wikomeje. Enda ukalonge byonakusoñanya kulonga.’

Yoshua wātumine batubedibedi babidi mu kibundi kya Yediko. Mu mānga ilonda’ko, tukayuka myanda mivule yākalongekele’ko. Pājokele batubedibedi, bāletele musapu amba i kitatyi kiyampe kya kutwela mu Kenani. Difuku dyālondele’po, Yoshua wāsapwila muzo utalule nkambi. Kupwa, wātangidija babitobo bādi baselele sanduku wa kipwano babadikile ku Munonga wa Yodano. Munonga wādi muyule mema. Inoko babitobo pa kutyimpa’mo’tu maulu, mema ātyepa! Babitobo bāenda bakemana pa bukata bwa munonga kufika ne byāpwile muzo onso kwabukila bukila bwa munonga. Le kino kingelengele kyēbavulwije byālongele Yehova pa Dijiba Dityila?

Pa kupwa kwa ino myaka yonso, Isalela wātwelele mu Ntanda ya Mulao. Bāubakile mobo ne bibundi. Bādimine madimi, mañanza, ne byombe. Yādi ntanda ikuka mabele ne buki.