Mulao wa Yefeta

Bene Isalela bālekele monka Yehova kebatōta baleza ba bubela. Bene Amone pobāile kutamba bene Isalela divita, bano baleza ba bubela kebālongelepo kintu nansha kimo mwanda wa kwibakwasha. Bene Isalela bāsusukile mu myaka mivule. Ku mfulo, bāsapwila Yehova amba: ‘Tubalonga bubi. Tubakwisāshila, witupandije ku balwana netu.’ Bene Isalela bāonakenye bilezaleza byabo, bāanza monka kutōta Yehova. Yehova kāsakilepo kwibamona bendelela na kususuka.

Muntu umo wa bulwi, wa dijina dya bu Yefeta, wātongelwe kuludika bantu mu divita dya kulwa na bene Amone. Wāsapwidile Yehova amba: ‘Shi witukwashe tunekenye dino divita, nakulaya’mba ponkajoka nkakupa muntu ense ukabadikila kutamba mu yami njibo kwiya kuntundaila.’ Yehova wātejeje milombelo ya Yefeta, wāmukwasha anekenye divita.

Yefeta pa kujokela kwandi, muntu mubajinji wātambile kwiya kumutundaila i wandi mwana mwana-mukaji, wandi mwana umo kete. Wādi uja koku omba ñoma. Le Yefeta wālongele’po namani? Wāvulukile mulao wandi, kānena’mba: ‘Yō, a wami mwana! Ubantyumuna mutyima. Nalaile Yehova mulao. Pa kufikidija’o, mfwaninwe kukutuma ukengile ku kipema, mu Shilo.’ Wandi mwana wāmunena’mba: ‘A tata, shi wālaile Yehova mulao, ufwaninwe kufikidija’o. Nkyonomba’tu i nkalonge myeji ibidi mu ngulu na balunda nami bana-bakaji. Kupwa, keñenda.’ Mwanā Yefeta wāingile na kikōkeji ku kipema mu būmi bwandi bonso. Mwaka ne mwaka, balunda nandi bādi benda ku shilo kukamwimuna.