Bubi bwa Mulopwe Davida

Solo pa kufwa, Davida wābikele bu mulopwe. Davida wādi na myaka 30. Myaka mityetye pa kupita’po na paābikele, difuku dimo kyolwa Davida paādi wimene pa musaka wa njibo yandi mikatakata, wāmona mwana-mukaji umo muyampe mpala bininge. Davida wāyuka’mba dijina dyandi i Bafe-Sheba ne amba i mukaja sola umo witwa bu Udia. Davida wāityija Bafe-Sheba ku njibo yandi mikatakata. Wālāla nandi, wāmupa dīmi. Davida wālongele bukomo bwa kufya byaālongele. Wāsoñanya mukata wandi wa basola atūle Udia ku mulongo mubajinji wa divita kupwa bāmusonsoloke’ko. Udia bāmwipaya ku divita, Davida wāsonga Bafe-Sheba.

Nansha nankyo, Yehova wāmwene bibi byonso byālongekele. Le wālongele’po namani? Yehova wātumine mupolofeto Natana kudi Davida. Natana wāsapwila Davida amba: ‘Mpeta umo wadi na mikōko mingi, mulanda umo nandi wadi’tu na kana ka mukōko kamo kadi wadi wikasenswe bininge. Mpeta’wa wasela kana ka mukōko kamo kete ka mulanda.’ Davida wāloba, kanena’mba: ‘Yao mpeta ufwaninwe kufwa!’ Kupwa, Natana wāsapwila Davida amba: ‘Mpeta’u i abewa!’ Davida wātyumukilwe mutyima, wāitabija kilubo kyandi kudi Natana amba: ‘Napi mambo kudi Yehova.’ Davida ne kisaka kyandi bāsusukile bininge pa mwanda wa buno bubi. Yehova wāpele Davida mfuto, inoko wāmuleka mūmi mwanda Davida kādipo na budimbidimbi kadi wādi mwityepeje.

Davida wāsakile kūbakila Yehova tempelo, inoko Yehova wātonga Solomone mwanā Davida ōbake’yo. Davida wāshilula kukongakenya Solomone bya kūbaka nabyo, kāeneneja’mba: ‘Tempelo ya Yehova ifwaninwe kwikala milumbuluke. Solomone ukidi nkasampe, inoko nsa kumukwasha’ko na kumuteakenya bintu.’ Davida wāletele kyabuntu kya lupeto lwandi luvule lwa kwingidija ku mwingilo wa lūbako. Wākimbile bengidi ba ñeni. Wākongakenye olo ne ndalama, wātundija ne mityi ya sedele ku Tyila ne ku Shidona. Davida paādi kadi kubwipi na kufwa, wāpele Solomone bupunga bwa mwa kūbakila tempelo. Wāsapwila Solomone amba: ‘Yehova wansapwidile nkulembele’byo. Yehova usa kukukwasha. Kokikwatwa moyo. Wikomeje kadi enda kengile.’