Tempelo ya Yehova

Pābikele Solomone bu mulopwe wa Isalela, Yehova wāmwipangwile amba: ‘Le usaka nkupe bika?’ Solomone wālondolola’mba: ‘Nekidi nkasampe, kadi nkiyukilepo ne byononga bine. Nakwisāshila, mpe’ko tunangu mwa kwendejeja bantu bobe.’ Yehova wāmunena’mba: ‘Byowalomba tunangu, nsa kukwikadija muntu wa tunangu kupita bantu bonso ba pano pa ntanda. Kadi nsa kukwikadija mpeta mukatampe. Kadi shi unkōkele, mafuku obe akavula.’

Solomone wāshilwile kūbaka tempelo. Wāubakile’yo na olo milumbuluke, ndalama milumbuluke, mityi milumbuluke, ne mabwe malumbuluke. Bana-balume ne bana-bakaji tununu ne tununu ba bwino bādi bengila ku lūbako lwa tempelo. Myaka isamba-ibidi pa kupita’po, tempelo yādi ke mipwe mwa kupānina’yo kudi Yehova. Mu ino tempelo mwādi ne kisōkelo, bātūla’po byamulambu. Solomone wāfukama manwi panshi ku meso a kisōkelo, kālombela’mba: ‘A Yehova, nansha ino tempelo byoidi mityetye kadi keikufwaninwepo ku buya, inoko itabija butōtyi bwetu ne milombelo yetu.’ Le Yehova wāmwene namani tempelo ne milombelo ya Solomone? Solomone upwa’tu kulombela, mudilo wātūka mūlu wāsōka byamulambu byonso pa kisōkelo. Bine, Yehova wāitabije tempelo. Bene Isalela pa kumona kino, bāsangala.

Mulopwe Solomone wādi mutumbe mu Isalela monso ne ku bifuko bya kulampe pa mwanda wa tunangu twandi. Bantu bādi bāya kudi Solomone amba ebakwashe na yabo myanda. Enka ne mulopwe mukaji wa ku Sheba wāile kutompa Solomone na bipangujo bikomo. Uno mwana-mukaji pa kwivwana bilondololwa byandi, wānena’mba: ‘Nkyadipo ngitabije byadi bikunenena bantu, inoko pano namone amba udi na tunangu kupita ne mobadi banenena mwine. Yehova, Leza obe i mukwesele.’ Muzo wa Isalela wādi mu būmi buyampe, kadi bantu bādi mu nsangaji. Inoko bintu byādi kebisa kushinta.