Yehova Wakinge Yehoshafata

Yehoshafata, mulopwe wa Yuda, wāonakenye bisōkelo bya Bāla ne bilezaleza byādi mu ntanda’ya. Wādi usaka bantu bayuke bijila bya Yehova. O mwanda wātumine bamfumu ne bene Levi mu Yuda monso bakafundije bantu bijila bya Yehova.

Mizo ya kubwipi yādi ityina kutamba Yuda divita mwanda yādi iyukile’mba Yehova udi na bantu bandi. Bāletēle’nka ne Mulopwe Yehoshafata byabuntu. Inoko bene Moabu, bene Amone, ne mizo itambile ku ntanda ya Seila bāile kulwa na Yuda. Yehoshafata wādi uyukile amba usakilwa bukwashi bwa Yehova. Wākongakenye bantu bonso mu Yelusalema, bana-balume, bana-bakaji, ne bana. Wāimana ku meso abo kālombela’mba: ‘Yehova, pampikwa abe, ketubwanyapo kunekenya divita. Tubakwisāshila witusapwile’ko bya kulonga.’

Yehova wālondolwele ino milombelo amba: ‘Kemwakikwatwai moyo. Nsa kwimukwasha. Imanai, imanai kujina mpika, mumone monsa kwimupandijija.’ Le Yehova wēbapandije namani?

Lubanga lwālondele’po, Yehoshafata wātonga batuimba ne kwibasoñanya bende basala kumeso kwa kibumbo kya divita. Bādi benda basala tamba mu Yelusalema kutūka ne ku kifuko kwa kulwila kwitwa bu Tekoa.

Batuimba pobātumbije Yehova na nsangaji na diwi ditunduke, Yehova wālwila bantu bandi. Wāletele kavutakanya kakatampe mu bukata bwa bene Amone ne bene Moabu, bāanza kwilwa abo bene na bene, kadi kekwāpandilepo nansha umo. Inoko Yehova wākingile bantu ba Yuda, basola, ne babitobo. Bantu bonso ba mu matanda a kubwipi bāivwene byālongele Yehova, bājingulula’mba Yehova ukikiñanga bantu bandi. Le Yehova upandijanga bantu bandi namani? Wibapandijanga mu miswelo mivule. Kasakilwangapo bukwashi bwa bantu kampanda pa kupandija bantu bandi.