Kibumbo kya Divita kya Mudilo kya Yehova

Bene-Hadada mulopwe wa bene Shidea, wādi utamba nyeke Isalela bulwi. Inoko mupolofeto Edisha wādi udyumuna mulopwe wa Isalela kyaba ne kyaba, mwanda wa epandije. O mwanda Bene-Hadada wākwete butyibi bwa kukakwata Edisha. Aye pa kuyuka’mba Edisha udi mu kibundi kya Dotani, wātuma’ko kibumbo kya divita kya bene Shidea mwanda wa bakamukwate.

Bene Shidea bāfikile mu Dotani bufuku. Bukya lubanga, mwingidi wa Edisha pa kutamba panja wāmona’mba kibundi ke kijokolokwe na kibumbo kikatampe kya divita. Wāzakele bininge, wāela lubila’mba: ‘Edisha, le tusa kwibilonga namani?’ Edisha wāmusapwila’mba: ‘Botudi nabo i bavule kupita bobadi nabo.’ Ponkapo Yehova wāpūtula mwingidi wa Edisha meso, wāmona ngulu yonso ijokolokele kibundi miyule tubalwe ne makalo a mudilo a bulwi.

Basola bene Shidea pa kukimba kukwata Edisha, wālombela’mba: ‘Yehova, nakwisāshila, wibasabe meso.’ Mu kitulumukila, batunya kujingulula kobadi i kwepi, nansha byobādi bamwene. Edisha wāsapwila basola amba: ‘Mudi mu kibundi kibi. Nondei, nsa kukemutūla kudi muntu omukimba’ye.’ Bālondele Edisha kufika ne ku Samadia, mu kibundi mwine mwādi mushikata mulopwe wa Isalela.

Ke mungya kala, bene Shidea bājingulula kwine kokebadi. Ebiya mulopwe wa Isalela wāipangula Edisha amba: ‘Le nebepaye?’ Lelo Edisha wāmwene uno bu mukenga wa kulubwila kinongo bano bantu bādi bakimba kumusanshija? Aa. Edisha wāmulondolola’mba: ‘Kokibepaya. Wibape byakudya, kupwa wibaleke bende.’ Penepo mulopwe wēbasobela masobo makatampe, kupwa wēbaleka bajokele kwabo.