Bukankamane bwa Yehoyada

Yezebele wādi na mwana mwana-mukaji witwa bu Atadia, mwine wādi mubi pamo bwa inandi. Atadia bāmusongele kudi mulopwe wa Yuda. Wandi mulume pa kufwa, wandi mwana mwana-mulume waānza kuludika. Uno mwana paāfwile, Atadia wēbikika aye mwine bu mulopwe wa Yuda. Penepo wākimba kujimankanya musuku wa bulopwe, na kwipaya muntu yense ubwanya kukekala bu mulopwe pa kyandi kyaba, wāipaile’nka ne bandi bankana bene. Bantu bonso bādi bamutyina.

Yehoyada, Kitobo Mukatampe ne wandi mukaji, Yehosheba, bāyukile’mba bilonga Atadia’bya i bibi mpata. Bātūla būmi bwabo mu kyaka na kufya’ko munkana umo wa Atadia, witwa bu Yoashe, wādi ukidi mwana wa lukeke. Bāmulelela ku tempelo.

Yoashe paābwenye myaka isamba-ibidi, Yehoyada wābunga bamfumu bonso ne bene Levi, wēbasapwila’mba: ‘Lamai bibelo bya tempelo, kadi kemwakitwejai muntu nansha umo mu tempelo.’ Ebiya Yehoyada wābikika Yoashe bu mulopwe wa Yuda, wāmuvwika ne kilongo kya bulopwe ku mutwe. Bantu ba Yuda bātūta kyungwe amba: ‘Mulopwe ufwa bununu!’

Atadia mulopwe mukaji pa kwivwana lunwa lukatampe lwa kibumbo, wāenda lubilo ku tempelo. Aye pa kumona mulopwe mupya, wāela lwanji amba: “I kitumba! I kitumba!” Bamfumu pa kumumona, bāmukwata, bākamwipaya. Ino le lupusa lubi lwaāzambaleje mu muzo nalo le?

Yehoyada wākweshe muzo usambe kipwano na Yehova, na kulaya’mba bakatōta’nka Yehova kete. Yehoyada wēbasoñanya bapomone tempelo ya Bāla ne kulalakanya bilezaleza. Wātonga babitobo ne bene Levi bengile ku tempelo mwanda wa bantu banze kutōtela’ko monka. Wātūdile banzamu ba ku bibelo balame tempelo kutyina mwakatwela muntu nansha umo wa disubi. Kupwa, Yehoyada ne bamfumu bāselela Yoashe ku njibo mikatakata, bāmutūla pa lupona. Bantu ba Yuda bāsangele. Pano bādi kebengidila Yehova, mwanda bākūdilwe kudi Atadia mwana-mukaji mubi ne ku butōtyi bwa Bāla. Lelo ubamone bukankamane bwa Yehoyada mobwākwashishe bantu bavule?