Bulopwe Bukekala’Ko Nyeke

Difuku dimo bufuku, Mulopwe Nebukaneza wālotele kilotwa kimo kilenga moyo. Kino kilotwa kyāmuvutakenye ñeni, wākomenwa’nka ne kulāla. Wāityija bantu bandi ba majende, wēbasapwila’mba: ‘Nshintulwilei kilotwa kyonalota.’ Nabo bāmunena’mba: ‘A mulopwe, witusapwile byowalota.’ Inoko Nebukaneza wēbasapwila’mba: ‘Aa! Banwe nsapwilei byonalota, shi bitupu nsa kwimwipaya.’ Bamajende’ba bāmusapwila monka’mba: ‘Abe witusapwile’tu byowalotanga, nabya tusa kubwanya kwibishintulula.’ Nandi wānena’mba: ‘Banwe bonso mukimbanga kumbepela. Banwe nsapwilei byonalotanga!’ Nabo bāmusapwila’mba: ‘I kutupu muntu mūmi nansha umo ubwanya kukusapwila byowalotanga. Ubalombe bintu kebibwanikapo.’

Nebukaneza wālobele bininge, wāsoñanya bepaye bantu bonso ba tunangu ba mu ntanda’ya. Mu bano bantu mwādi ne Danyele, Shadelake, Meshake, ne Abedenengo. Danyele wālomba mulopwe ebashile’ko bidi kityi kityetye. Penepo Danyele ne balunda nandi basatu bālomba Yehova ebakwashe. Le Yehova wālongele’po namani?

Mu kimonwa, Yehova wālombwele Danyele kilotwa kya Nebukaneza ne nshintulwilo yakyo mine. Difuku dyālondele’po, Danyele wāenda kukamona mwingidi wa mulopwe, wāmunena’mba: ‘Kokepaya mwana-mulume wa tunangu nansha umo. Ami mbwanya kushintulula kilotwa kya mulopwe.’ Uno mwingidi wākatūdile Danyele kudi Nebukaneza. Danyele wāsapwila mulopwe Nebukaneza amba: ‘Leza wakusokwela bintu bya mu mafuku a kumeso. Kilotwa kyobe i kino: Ubamonenga nkishi mupuñame wadi na mutwe wa olo, kyadi ne maboko bya ndalama, difu ne matangatanga bya mukuba, maulu a kyuma, ne binyantyilo bya kyuma kityange na dilongo. Kupwa, dibwe dibālamuka ku lūlu, dibaase ku binyantyilo bya nkishi’wa. Nkishi’wa wavingakana bukula ne kupepuka’bo na luvula. Dino dibwe dibaikala ke lūlu lukatampe, kadi lubayula pa ntanda ponso.’

Kupwa, Danyele wāsapwila Nebukaneza amba: ‘Kilotwa kyobe kishintulula’mba: Bobe bulopwe ye mutwe wa olo. Ndalama i bulopwe bukāya’ko pa kupwa kwa bulopwe bobe. Kupwa, kukekala bulopwe budi pamo bwa mukuba, bwine bukaludika ntanda yonso. Bulopwe bukalonda’po bukekala bukomo pamo bwa kyuma. Ku mfulo, kukekala bulopwe bumo bwa bipindi bimo bikomo pamo bwa kyuma, bipindi bikwabo nabyo bizoze pamo bwa dilongo. Dibwe dyatambanga ku lūlu i Bulopwe bwa Leza. Bukonakanya ano malopwe onso, kadi bukekala’ko nyeke.’

Nebukaneza wāpona mpala panshi ku meso a Danyele. Kānena’mba: ‘Leza obe wakusokwela kino kilotwa. I kutupu Leza udi pamo bwa aye.’ Pa kyaba kya kwipaya Danyele, Nebukaneza wāmutūla bu mukatampe wa bantu ba tunangu, wāmupa ne kuludika mu Babiloni. Le ubamone mwālondolwedile Yehova milombelo ya Danyele?