Bidibwa bya Yesu bya Mfulo

Bayuda bādi basoba masobo a Pashika mwaka ne mwaka mu difuku dya 14 kweji wa Nisane. Ino Pashika yādi ibavuluja muswelo wēbanyongolwele Yehova mu bupika mu Edipito wākebatweja mu Ntanda ya Mulao. Mu mwaka wa 33 Y.M. (Yesu ke mwiye), Yesu ne batumibwa bandi bāsobele Pashika mu kyumba kya pangala kya mu Yelusalema. Ku mfulo kwa byakudya, Yesu wēbalombwele’mba: ‘Umo momudi usa kungaba.’ Uno mwanda wāsense batumibwa, kebamwipangula’mba: ‘Le i ani?’ Yesu wānena’mba: ‘I yewa onsa kupa uno mukate.’ Ebiya wāpa Yudasa Isakadiota kipindi kya mukate. Ponka na ponka, Yudasa wāimana ne kutamba mu kyumba.

Kupwa, Yesu wālombela, wātyumuna mukate bipindibipindi, wāpa’o batumibwa bāshele. Wēbanena’mba: ‘Dyai uno mukate. Welekeja umbidi wami, mwine onsa kupāna pa mwanda wenu.’ Kupwa, wālombela ne vinyu, wāpa’yo batumibwa bandi. Wēbanena’mba: ‘Tomai ino vinyu. Yelekeja mashi ami, mene onsa kupāna mwanda wa mulekelwe bubi bwenu. Nemulaya’mba mukabikala bu balopwe pamo nami momwa mūlu. Longai kino mwaka ne mwaka ke pa kumvulukila.’ Balondi ba Yesu bādi nyeke bebungila pamo mu kine kyolwa’kya mwaka ne mwaka. Kuno kwibunga ye kwitwa dyalelo bu Bidibwa bya Kyolwa bya Mfumwetu.

Pa kupwa kudya bino bidibwa, batumibwa bāshilula kwipotomeja bakimba kuyuka mukatampe pobadi. Inoko Yesu wēbasapwila’mba: ‘Mukatampe umbukata mwenu i yewa wimona bu mwanuke bininge, kadi wa bulēme butyetye.’

‘Mwi balunda nami. Nemulombola bintu byonso byadi binsakila Tata kwimulombola. Panopano ponka nsa kujokela mūlu mudi Tata. Banwe musa kushala, kadi bantu bakayuka’mba mwi bami bana ba bwanga shi mwisanswe banwe bene na bene. Mufwaninwe kwisanswa banwe bene na bene monka monemusanshilwe.’

Ku mfulo, Yesu wālombela, wālomba Yehova akinge bandi bana ba bwanga bonso. Wālombele Yehova ebakwashe bengidile pamo kadi mu ndoe. Wālomba ne dijina dya Yehova dipandulwe. Kupwa, Yesu ne batumibwa bandi bāimba mitendelo kudi Yehova, bātamba panja. Yesu wādi kadi pabwipi na kukwatwa.