Mulami wa Kifungo Wefunde Bubine

Mu Fidipai, mwādi umpika umo nsongwakaji wādi na ndemona. Uno ndemona wādi umukwasha kubuka lubuko, ye mwaādi upetejeja bamfumwandi. Ba Polo ne Shilasa pobāile mu Fidipai, wēbalondele mu mafuku mavule. Ndemona wāmweleja mabila’mba: “Bano bantu i bapika ba Leza Mwine wa Peulu Mwine.” Ku mfulo, Polo wānena uno ndemona amba: ‘Mu dijina dya Yesu, mutambe’mo!’ Ndemona’wa wāmutamba’mo.

Bamfumwandya uno nsongwakaji pa kumona’mba kakibasokwelapo monka lupeto, bāloba bininge. Bāselela ba Polo ne Shilasa kudi bandela-bantu, bēbasapwila’mba: ‘Bano bantu batyumunanga bijila kadi baletanga kavutakanya mu kibundi monso!’ Bandela-bantu bāsoñanya bakupile ba Polo ne Shilasa ne kwibela mu buloko. Mulami wa kifungo wēbela mu kifungo, mu kyumba mufīta fututu, kadi wēbela ne mu bikulo.

Ba Polo ne Shilasa bāimbīle Yehova mitendelo, papo bakutwa bakwabo bevwene. Mu kitulumukila, pa bukata bwa bufuku, kwāikala kutenkena kwa ntanda kukatampe kwājinya kifungo tamba kūlu kufika ne kunshi. Bibelo bya kifungo byāpomoka, miyololo ya bakutwa yātyibika, ne bikulo bine byāladika. Mulami wa kifungo pa kunyemena lubilo mu kifungo, wātana bibelo pululu. Wālanga’mba bakutwa bonso abanyema, wātekuna kipete kasake kwiipaya.

Ponka’pa, Polo wāmwela lubila’mba: ‘Kokelonga kibi! Batwe bonso tudi monka!’ Mulami wa kifungo wātwela lubilo mudi ba Polo ne Shilasa, wāpona panshi ku meso abo. Wēbepangula’mba: “Le nonge namani mpande?” Bāmusapwila’mba: ‘Abe ne ba mu njibo yobe mufwaninwe kwitabija mudi Yesu.’ Kupwa, ba Polo ne Shilasa bāfundija uno mulami wa kifungo ne ba mu njibo yandi, ebiya abo bonso bābatyijibwa.