Polo Watumwe ku Loma

Lwendo lwa busatu lwa Polo lwa busapudi lwāfudile mu Yelusalema. Mwine mobāmukwete ne kwelwa mu kifungo. Difuku dimo bufuku, Yesu wāmulombwele mu kimonwa’mba: ‘Usa kwenda ku Loma kukasapula.’ Bātalula Polo mu Yelusalema bāenda nandi ku Kesalea, kwine kwaālongele myaka ibidi mu kifungo. Paādi usamba ku meso a Mbikavu Fetuse, Polo wānenene amba: ‘Nalombe kukasamba kwa Kesala, mu Loma.’ Fetuse wāmunena’mba: “Byowalomba kukasamba kwa Kesala; usa kwenda kwa Kesala.” Bāselela Polo ku Loma lwa kyombo, kadi banababo babidi bene Kidishitu, ba Luka ne Aditakusa, bāendele nandi.

Pobādi pa mema, kivula kikatampe kyēbatana, kyālongele mafuku mavule. Bonso bādi mu kyombo bālangile’mba basa kukafwa. Inoko Polo wēbanena’mba: ‘A bana-balume, mwikeulu waunombolanga mu kimonwa’mba: “A Polo, kokikwatwa moyo. Musa kufika ku Loma, kadi bantu bonso bodi nabo mu kyombo basa kukafika’nka biyampe.” Kankamanai! Ketusapo kufwa.’

Kivula kyālongele mafuku 14. Ku mfulo, nshi yāshilula kumweka. Pādi pa kisanga kya Medita. Kyombo pa kwijīka, kyāladika bibesebibese, inoko bantu bonso 276 bādi mu kyombo bāfikile biyampe pa nshi’ya. Bamo bāsumbile, bakwabo nabo bākanda pa bibese bya kyombo kyāladikile’kya kēbatankaila nansha’mba kulela kufika ne ku nkula. Bantu ba mu Medita bēbatambwile biyampe, bēbabanjila ne mudilo wa kota.

Myeji isatu pa kupita’po, basola bākatūla Polo ku Loma na kyombo kikwabo. Pāfikile Polo, banababo bāile kumutundaila. Polo pa kwibamona, wāfwija’ko Yehova, kadi wākankamana ne kukankamana. Nansha Polo byaādi mukutwe, bāmupele lupusa lwa kushikata mu njibo yaādi ufutyila koku sola umulama. Wāshikete’mo myaka ibidi. Bantu bādi bāya kumupempula, nandi wibasapwila myanda ya Bulopwe bwa Leza ne kwibafundija myanda ya Yesu. Kadi Polo wālembēle bipwilo bya mu Azia Minele ne bya mu Yudea mikanda. Bine, Yehova wāingidije Polo pa kuzambalaja myanda miyampe ku mizo.