Bulombodi ku Bakatanwa ku Kitango

BATUNDAILA BĀYA Batundaila bāya i bapebwe kiselwa kya kwimukwasha. Ingidilai nabo pamo mu byonso na kulēmeka bwendeji bwabo mu myanda itala kwa kushīka myotoka ne makinga, kwa kupityila, kwa kushikata, ne bikwabokwabo.

BINTU BIJIMINE NE BISOKOLWE Bintu byonso biboibwa bifwaninwe kukatūlwa ku Mwingilo wa Bintu Bijimine ne Bisokolwe. Shi ubajimija kintu, enda ku uno mwingilo, ukokeja kujiula kintu kikujimine. Bana bajimine bakimba bambutwile babo, bafwaninwe kukatūlwa ku uno mwingilo. Inoko, kutyina kususuka bya bitupu, i biyampe kukwatakanya benu bana, ne kwikala nabo nyeke pabwipi.

BISHIKATWA Langila bakwenu. Vuluka’mba bishikatwa bikalaminwa enka boba bomwiile nabo mu motoka umo, bomushikatanga nabo njibo imo, nansha bomwifundanga nabo Bible. Kokitūla bintu pa bishikatwa bikwabo.

BUNDAPI BUBAJINJI Vuluka’mba i bukwashi bwa bukidibukidi kete.

BYABUNTU Bulongolodi i bulupule lupeto luvule pa kuteakanya bifuko bya kushikata’po, binanda, ne mingilo mikwabo mivule ya kukwasha bevwaniki basangele kitango ne kwitukwasha tufwene pabwipi na Yehova. Byabuntu byobe bisa kukwasha ku kwaluja luno lupeto lulupukile ne kukwatakanya mwingilo wingilwa ntanda yonso. Usa kumona kufulakufula kwa kipaka tumasanduku tulembelwe’po senene amba byabuntu, mo mwa kutūla’byo. Kadi ubwanya ne kutūla byabuntu pa Entelenete na kutwela pa donate.jw.org. Byabuntu byonso bitendelwanga bininge. Kitango Kyendeji kibabadikila kala kukufwija’ko pa mwanda wa mutyima obe wa buntu wa kusaka kukwatakanya tumweno twa Bulopwe.

LUBATYIJO Bishikatwa bya ba kubatyijibwa bikatūlwa kala kumeso kampalampala na lukala, poso’tu kwikala kushinta. Ba kubatyijibwa bafwaninwe kukashikata pa kifuko kibashidilwe kumeso kwa mwisambo wa lubatyijo kushilula mu Dya Mposo lubanga. Umo ne umo ukasela mbwija ya kwipampula nayo mema ne bivwalwa bifwaninwe byakatokenibwa nabyo.

MWINGILO WA KWILANGA Shi usaka kukwasha ku mingilo mishileshile iteakanibwe ku kitango, enda ku Mwingilo wa Bulombodi nansha ku Mwingilo wa Kwilanga.

MĪSAMBO YA PA BULA

Masomo a Basapudi ba Bulopwe Bapania badi na myaka kushilwila pa 23 kutūla ku 65, basaka kutandabula mwingilo wabo i betwe kutanwa ku mīsambo ikalongwa mu Dya Yenga kyolwa, ya boba basaka kukafunda Masomo a Basapudi ba Bulopwe. Kitatyi ne kifuko bikemuyukijibwa.