KIFUNDWA 53
Tonga Kwipwija Mukose Kusangaja Yehova
Yehova i “Leza wa nsangaji.” (1 Temote 1:11) Usakanga netu twikale na nsangaji ne kusangela būmi bwetu. Usangalanga potwilamija’ko kitatyi kya kutūja shi tubapu mingilo. Mu kino kifundwa, tusa kumona motubwanya kupityijija kitatyi kyetu kya kutūja mu muswelo witusangaja, otumwena’mo, kadi usangaja ne Yehova mwine.
1. I bika byotufwaninwe kuvuluka shi ketutonge kwipwija mukose?
Le abe usenswe kwipwija mukose na bika? Bamo batoñanga kupityija kitatyi kya kwipwija mukose na kushikata talala kwinjibo—batanga kitabo, bateja minjiki, batala video, nansha ke kunanga pa Entelenete. Bāngi nabo bapityijanga’kyo na kukaya pamo na balunda—kimfwa na kwinangija, koila, ne kukaya makayo makwabo. Ino nansha tutonge kwipwija mukose kwa muswelo’ka, tufwaninwe kukimba kokwa ‘kwitabijibwa na Mfumwetu.’ (Bene Efisesa 5:10) I biyampe twivwanije kino, mwanda makayo avudile dyalelo alombolanga bintu bishikilwe Yehova kimfwa, bukalabale, busekese ne majende. (Tangai Ñimbo ya Mitōto 11:5.) Le i bika biketukwasha tutonge na tunangu kwipwija mukose kwetu?
Shi tutonge balunda basenswe Yehova, nabya bakokeja kwikala na lupusa luyampe potudi ne pa mutongelo wetu wa kwipwija mukose. Monka motwefundile mu kifundwa kipityile’ki, “Yewa unanga na ba tunangu ukekala wa tunangu.” Pakwabo napo, shi kyaba kyonso twinangila na bantu kebasenswepo misoñanya ya Leza, ‘tukamona malwa.’—Nkindi 13:20.
2. Mwanda waka i biyampe kutala ne kitatyi kyotupityija ku kwipwija mukose?
Nansha shi kwipwija mukose kotutongele i kuyampe, i biyampe kutadija twakapityija’ko kitatyi kivule bininge. Shi bitupu, tukabulwa ne kitatyi kya kupityija ku bintu bya mvubu mpata. Bible witukankamika ‘kwingidija biyampe shē kitatyi kyetu.’—Bene Efisesa 5:15, 16.
LANGULUKA BININGE
Wifunde, umone muswelo wa kukwata butyibi buyampe mu mwanda utala kwipwija mukose.
3. Tyina kwipwija mukose kubi
Mwanda wa bika tufwaninwe kutonga kwipwija mukose na katentekeji? Talai VIDEO, ne kwisambila pa bino bipangujo:
Lelo kwipwija mukose kwa mu bikailo bya pa kala kwiifwene namani na kwa dyalelo?
Mu video, i bika byefunda Danny pa mwanda utala kwipwija mukose?
Tangai Bene Loma 12:9, ne kwisambila pa kino kipangujo:
Lelo ino vese ifwaninwe kukutonona utonge namani kwipwija mukose kobe?
I bintu’ka bimo bishikilwe Yehova? Tangai Nkindi 6:16, 17 ne Bene Ngalatea 5:19-21. Pa kupwa kutanga kisonekwa ne kisonekwa, mwisambilei pa kino kipangujo:
Le mu bino bintu bitelelwe mu ano mavese, i byepi byomonanga bininge mu kwipwija mukose kwa dyalelo?
Muswelo wa kutonga na tunangu kwipwija mukose
Wiipangule amba:
Bika? Le mu kuno kwipwija mukose mudi bintu bishikilwe Yehova?
Kitatyi’ka? Le kuno kwipwija mukose kwidyanga mponya na bintu bya mvubu mpata?
Bāni? Le kuno kwipwija mukose kukulengejanga witane kyaba kyonso na bantu kebasenswepo Yehova?
I biyampe kwikinga na kupityila kulampe na kyaka. O mwanda mwine, tufwaninwe kwepuka kwipwija mukose konso kotumona’mba kukokeja kwikala kubi kotudi
4. Ingidija kitatyi kyobe na tunangu
Talai VIDEO, ne kwisambila pa kino kipangujo:
Mu ino video, nansha uno tutu byakadipo umwene kibi mu kwipwija mukose kwandi, ino le, kitatyi kyapityija’mo kyadi na lupusa’ka pādi?
Tangai Bene Fidipai 1:10, ne kwisambila pa kino kipangujo:
Le uno vese ubwanya kwitukwasha namani tuyuke kitatyi kya kupityija mu kwipwija mukose kwetu?
5. Tonga kwipwija mukose kuyampe
Nansha shi kwipwija mukose kumo kekusangajangapo Yehova, inoko kudi bintu bivule biyampe bimusangaja. Tangai Musapudi 8:15 ne Bene Fidipai 4:8, ne kwisambila pa kino kipangujo:
Le abe i kwipwija mukose’ka kuyampe koikalanga nako?
Ubwanya kusokola kwipwija mukose kuyampe
BANTU BAMO BANENANGA’MBA: “Kepadipo kibi kwipwija mukose na bintu bilombola bukalabale, busekese, ne majende, shi ami mwine nkiloñanga’byopo.”
Le ubwanya kunena’po namani?
MU KĪPI
Yehova usaka tutonge kwipwija mukose kuyampe.
Pitulukai’mo
Le i kwipwija mukose’ka kufwaninwe kwepuka bene Kidishitu?
Mwanda wa bika tufwaninwe kudyumuka pa kitatyi kyotupityija mu kwipwija mukose?
Le usaka pano kutonga kwipwija mukose kusangaja Yehova? Mwanda waka?
KIMBA
Tala mwine ufwaninwe kutonga kwipwija mukose kwetu.
“Le Batumoni ba Yehova Bapelejanga Mavideo, Bitabo, ne Ñimbo Imoimo?” (Kishinte kya pa Entelenete)
Tala muswelo obwanya kutonga biyampe makayo ne kwipwija mukose.
“Le Kwipwija Mukose Kobe I Kuyampe?” (Kiteba kya Mulami, 1 Kweji 10, 2011)
Mu nsekununi inena’mba, “Nanekenye Mfwatakani Yami,” tala kine kyalengeje muntu umo ashinte mutongelo wandi wa kwipwija mukose.
Tala inabana umo mwakwatyila butyibi bwa tunangu pa mwanda utala kwipwija mukose kulombola bya majende.