Kulupila mudi Yehova!

“Kulupila mudi Yehova ne mutyima obe onsololo.”​—⁠NKINDI 3: 5

MISIONELE umo wāingile umbula mwa kitatyi kilampe wāsonekele’mba: “‘KULUPILA MUDI MFUMWETU NE MUTYIMA OBE ONSOLOLO; NE KOKALEMENENAPO PA KWIMVWANIJA KWA ABE MWINE.’ Bino bishima bilupulwe mu Bible, byādi bilēmbwe senene pa ka tabulo kamo ne kulamikwa ku lubumbu mu njibo imo yōnakapempwile, byākokele milangwe yami. Kitatyi kyonso kyāsheleko dine difuku’dya, nādi nangulukanga enka pa bine bishima’bya. Neipangula ami mwine’mba lelo nkokeja kukulupila mudi Leza ne mutyima wami onso?” Uno muntu wādi na myaka 21 yakubutulwa. Ne pano pakadi na myaka 90, ukingila nyeke na kikōkeji bu mukulumpe mu Perth, mu ntanda ya Australie, ukokeja kuvuluka mafuku a kunyuma a mu būmi bwandi buyūle bipá bya kukulupila mudi Yehova na mutyima umo, kutentekelapo ne myaka 26 ya mwingilo mukomokomo wa bu misionele umpya mu madimi a mu ntanda ya Ceylan (dyalelo i Sri Lanka), Birmanie, (dyalelo Myanmar) Malaisie, Thaïlande, Inde ne Pakistan.a

[Kunshi kwa dyani]

² “Kulupila mudi Yehova ne mutyima obe onsololo”​—⁠bino bishima bidi mu Nkindi 3:​5, bifwaninwe kwitutakika batwe bonso twendelele na kupāna būmi bwetu na mutyima umo kudi Yehova, na kukulupila’mba ukakankamika lwitabijo lwetu, nansha ke mu kitatyi kyotukatanwa na bikambija bidi pamo bwa ngūlu mikatampe. (Mateo 17:20) Pano tubandaulei binena Nkindi 3:⁠5 mu butuntulu bwandi.

Bufundiji bupāna Tata

3 Mu ma shapitra kitema a kungalwilo kwa dibuku dya Nkindi mu Bible, mudi bufundiji bwa pabula bupāna tata, madingi a tunangu apāna Yehova kudi yewa yense ukulupīle na nsangaji kukekala wandi mwana momwa mūlu nansha ku “bwanapabo ne ku ntumbo ya bāna ba Leza” mu paladisa pano pantanda. (Loma 8:​18-21, 23, MB) I madingi a tunangu akokeja kwingidija bambutwile kitatyi kyobafundija bāna, bāna-balume ne bāna-bakaji. Mwanda wa mvubu imbajinji i madingi adi mu Nkindi shapitra 3, ashilula na kidyumu: “Wami mwana, kokavulaminwapo lufundijo lwami ino mutyima obe ulame bijila byami.” Byēnda bifwena mafuku amfulo ya ino ntanda imbi ya Satana, tutei mutyima nakampata ku buvuluji bwa Yehova. Dino dishinda dikokeja kumweka wi dilampe, ino mulao ulailwe boba bonso bakōminina i “kulēpa kwa mafuku, ne myaka ya būmi, ne ndoe mine”​—⁠būmi bwa nyeke mu ngikadilo impya ya Yehova.​—⁠Nkindi 3:​1, 2.

⁴ Kipwano kya nsangaji pabukata bwa tata ne mwana kikokeja kwikala kilumbuluke kutabuka. Umpangi wetu, Yehova Leza, wēkiteakenye mwanda wa kikale uno muswelo. Kristu Yesu wēsambile pa kipwano kyandi kya pabwibi na Yehova’mba: “Mwana kayūkapo kwilongela kintu aye mwine, nansha kika, nansha kika, poso wamona Shandi ulonga’kyo, ke-pantu, bintu byonso byalonga aye, ne Mwana byo byonka ulonga byonka’byo. Ke-muntu Shandi usenswe Mwana kadi umulombola byonso byaūbanga aye, nanshi ukamulombolanga mīngilo mikwabo ītabukile ne īno mīne, mwanda wa kunena’mba ne bānwe mukatendele.” (Yoano 5:​19, 20) Mpango ya Yehova i ya kusaka kumona kipwano kya pabwibi kya muswelo umo onka, pabukata bwandi ne kisaka kyandi kyonso pano pantanda, ka na mokikadile pabukata bwa bambutwile ne babo bāna.

⁵ Mu Isalela wakala, bādi bakankamika bantu ba mu kisaka bekale kwitūdila kikulupiji umo ku mukwabo. Yehova wādingile bambutwile’mba: “Po pa mwanda omukabikila ino myanda yami umutyima wenu ne mu muya wenu; kabidi mukeikuta ke ya kiyukeno pa kuboko kwenu, kadi ikekala bwa tuzaza pa nsambakeno ya makiki? Penepo kadi mukalombolanga’yo bāna benu kwisamba’yo poshikete mu njibo yobe, ne ponanga mwishinda, kadi polāla ne polanguka pene. Kadi ukebilemba pa ñunji ya njibo yobe, ne pa binjilo byobe bine; amba mafuku enu avudijibwe bungi ne mafuku a bāna benu mene kumo, mu yoya nshi yatyipile Yehova kudi bashenu kwibapa, pamo bwa ao mafuku a madiūlu peūlu pa panopantanda’pa.” (Kupituluka 11:​18-21) Binenwa bya Mufundiji wetu Mukatampe Yehova Leza, byālembelwe kupityila ku bukomo bwa mushipiditu, bikokeja kukwasha bambutwile ne babo bāna bekale na kipwano kya pabwipi na Yehova, ne na boba bonso bamwingidila mu kipwilo kya bukristu.​—⁠Isaya 30:​20, 21.

⁶ Madingi a tunangu apāna Tata ku bantu bandi, batamé ne bankasampe, endelela mu Nkindi Shapitra wa 3 vese wa 3 ne wa 4: “Kanye ne binebine kebikuzobololapo, kuta’byo ku nshingo yobe; lemba’byo pa kipapo kya mutyima obe; ko kutana ukatana biyampe ne ñeni milumbuluke, mu meso a Leza ne mu a bantu mene.” Yehova Leza aye mwine, utabukile mu kwingidija kanye ka lusa [buswe, MN] ne bubinebine. Ka na mwikinenena Mitoto 25:​10, “Mashinda onso a Yehova i a kanye ka lusa [buswe, MN], ne a binebine.” Mu kusaka kwiūla Yehova, tufwaninwe kulama senene ino ngikadilo ne lupusa lwayo lwakwitukinga, na kwibipa bulēme, pamo bwa nkano ya nsahabu ne kwiīlamika mu mityima yetu pototo pamo bwa kabudimbo. Penepo tukokeja kulombela na kusumininwa’mba: “Abe Yehova, kanye ka lusa [buswe, MN] lobe ne byabinebine byobe bīkale kundela nyeke.”​—⁠Mitoto 40:⁠11.

Kikulupiji mu kitatyi kyonso

⁷ Dibuku dimo dishintulula bishima (Webster’s Ninth New Collegiate Dictionary) dinena’mba kukulupila i “kwikala na kikulupiji pamwanda wa ngikadila, manwa, bukomo nansha bubinebine bwa muntu nansha bwa kintu kampanda.” Ngikadila idi na Yehova, i mikwatañane senene na kanye kandi ka buswe. Ne tukokeja kwikala na kikulupiji kilumbuluke mu manwa andi a kulonga bintu byālaile, mwanda dijina dyandi dine dya bu Yehova, dimuyukanya bu muntu uleta mpango mikatampe. (Divilu 3:14; 6:​2-8) Byadi Umpangi, ye aye nsulo ya bukomo ne bulobo. (Isaya 40:​26, 29) Bubinebine budi munda mwandi, mwanda “Leza kakokejapo. . . kubepa.” (Bahebelu 6:​18, MB) Shi ke pano, twibakankamikwe kutula kikulupiji kyetu kyonso mudi Yehova wetu Leza, Nsulo mikatakata ya bubinebine bonso, aye mwine bukomo bonso bwa kukinga boba bakulupīle mwādi ne kufikidija mpango yandi mikatampe ku kutūbuluka kukatampe kwa ntumbo.​—⁠Mitoto 91:​1, 2; Isaya 55:​8-11.

⁸ I kya bulanda kumona’mba mu ino ntanda yenda ibipilako yotudimo, kemudipo kikulupiji. Pa kyaba kya bubinebine, mu bifuko byonso, mudi lwiso ne majika-kanwa. Pa kibalu kya zyulunale umo (World Press Review) wa mu kweji wa butano 1993, pādi palembwe na dyangi musapu unena’amba: “KWENDELELA KWA MAJIKA-KANWA​—⁠Lupeto lwa busala mu Ngikadilo Impya ya Ntanda.” Bantu ne bilongwa bitandabula bisela bya majika-kanwa, bingidijanga lupusa lukomo tamba mu Brésil kufika ne mu Allemagne, mu Etats-Unis kufika ne mu Argentine, mu Espagne kufika ne mu Pérou, mu Italie kufika ne mu Mexique, mu Vatican kufika ne mu Russie.” Pamwanda wa mushikwa, lwiso ne kubulwa kwikulupila, ngikadilo yobatela bu ngikadilo impya ya ntanda, keilupulapo bintu bikwako enka kuvudija masusu a bantu.

⁹ Kushiyañana na mizo ikujije mu mapolitike, ba Tumoni twa Yehova badi na nsangaji ya kwikala bu “muzo udi ne Leza wao Yehova.” Enka abo kete, bobakokeja kunena’mba “Mudi Leza nakulupila.” Umo ne umo umbukata mwabo ukokeja kwela kabobo na kusumininwa’mba: “Mudi Leza, nkatōtanga mwanda wandi . . . . Mudi Leza nkakulupila nkikakwatwapo moyo, mhm.”​—⁠Mitoto 33:12; 56:​4, 11.

¹⁰ Mu ntanda ya Azia mwādi tununu twa bankasampe ba Tumoni twa Yehova bāsuswilwe bya mwiko na kukupilwa ne kwelwa mu bifungo, kikulupiji kyabo mudi Yehova kwāpele bukomo ku kibalwa kikatampe kya bano bankasampe bominine pototo. Bufuku bumo mu kifungo mobādi, nkasampe umo Kamoni wāsuswilwe bikomo, wēivwene bu kādipo ukikokeja kadi kwendelela na kūminina. Ino, nkasampe mukwabo wāendele kwadi, wenda ufufukuta mu fukutu mu bufyafya. Wāmubabwija ku kutwi’mba: “Kokīlekelela; Ami nadi najilula bijila bya Leza, tamba ka penepa, kikidipo na ndoe nansha mityetye mu mutyima wami.” Nkasampe umbajinji’wa, wāaluja monka milangwe yandi ya kūminina pototo. Tufwaninwe kukulupila mudi Yehova na kusumininwa kukatampe amba uketukwashanga mwanda wa kukomena bukomo bonso, nansha ke bukomo’ka bukalupula Satana mwanda wa konakanya kikōkeji kyetu.​—⁠Yelemia 7:​3-7; 17:​1-8; 38:​6-13, 15-17.

¹¹ Kipindi kya mbila imbajinji kinena’mba: “Ukasanswa Yehova Leza obe ne mutyima obe onso.” (Mako 12:30) Kitatyi kyotulanguluka pa Kinenwa kya Leza, bubinebine bulumbuluke botwifunda, bukekala munshi mwine mwa mutyima wetu, namino tukatononwa tukepāne batwe batuntulu mu mwingilo wa Leza wetu wakwakamwa, Mfumwetu Mulopwe Yehova. Mutyima wetu wa kufwijako kukatampe​—⁠kwa pamwanda wa bufundiji bonso bwaētupa, bintu byetulongela, ne byobya byāketulongela​—⁠witutakikanga twikale na kikulupiji kya kubulwa mikalo mu lupandilo lwandi.​—⁠Isaya 12:⁠2.

¹² Tufwaninwe kukwatakanya kino kikulupiji umbula bwa myaka mivule. Mwingidi umo wa Yehova wādi na kwityepeja waīngile na kikōkeji umbula bwa myaka 50 ku kitako kikatampe kya mingilo ya Sosiete Watch Tower ku Brooklyn, kushilwila mu kweji wa buná 1927, unena’mba: “Kumfulo kwa mwine kweji’wa, baumpēle dollard 5, lupeto lwa ami kwingidija mu bisakibwa byami bishileshile, lukute mu muvungo muyampe mwine ne kapapye kamo kayampe pādi palembwe vese wa mu Bible udi mu Nkindi 3:​5, 6 . . . Nādi na buluji bulumbuluke bwa kukulupila mudi Yehova mwanda ku kitako kikatampe kya mingilo, Yehova udi na ‘umpika wa ñeni ne wa manwa’ ukwatakanya kamweno konso ka Bulopwe pano pantanda na kikōkeji.​—⁠Mateo 24:​45-47.”b Mutyima wa uno mukristu wādi mutūke, ke pamwandapo wa kusaka lupeto, mhm, ino i pamwanda wa kukatambula ‘lupeto luleme lwakubulwa kōneka, momwa mu madyūlu.’ Pamo ponka ne mu ano etu mafuku, tununu twa bana betu bengidila ku kitako kikatampe kya mingilo ya Sosiete Watch Tower mu ma Betele kujokoloka ntanda yonso, bengilanga uno muswelo na kulemeka mutyipo wa kwikala balanda kukwatañana na bijila bya Leza. Bakulupīle mudi Yehova mwanda wa kwibapa bisakibwa byabo bya ku difuku ne difuku.​—⁠Luka 12:​29-31, 33, 34.

[Kunshi kwa dyani]

Lēmenena kudi Yehova

¹³ Tata wetu wa mūlu witusoñanya’mba: “Kokalemēnenapo pa kwivwanija kwa abe mwine.” (Nkindi 3:⁠5) Badingidi ne bantu ba bwino ba pano pantanda, kebakokejapo kukulupila kwenzakana na tunangu ne kwivwanija kulombola Yehova. “Ñeni [kumvwanija, MN] yandi yaendaenda’tu.” (Mitoto 147:⁠5) Kyaba kya kulēmenena ku tunangu twa bantu ba bwino ba pano pantanda nansha ku mwīivwanino wetu wa mu mutyima keuyūkile kintu, tutei mutyima kudi Yehova, na kukimba madingi malumbuluke mu Kinenwa kyandi, ne ku bakulumpe mu kipwilo kya bwine-kristu.​—⁠Mitoto 55:22; 1 Kodinda 2:⁠5.

¹⁴ Tunangu twa bantu nansha kibengo kya kusaka kwikala na kitenta kya mvubu, kekiketulongelapo kintu mu kino kitatyi kyenda kifwena matompo makomokomo na kampeja bukidi. (Isaya 29:14; 1 Kodinda 2:14) Mu ntanda ya Japon, kitatyi kya Divita dya Bubidi dya ntanda yonso, mwingidi umo wa Leza wādi na manwa ino wa mitatulo, wātongele kulēmenena pa ñeni yandi aye mwine. Mu kitatyi kya masusu, wāalamukine kwikala kapondo, ne kibalwa kikatampe kya luombe nakyo, kyāleka mwingilo wa busapudi pamwanda wa kupangwapangwa. Kaka umo wa kikōkeji mwine Japon, wanekenye ano masusu makomokomo na bukankamane, mu kifungo kya busala, unena’mba: “Boba bonso bāendelele na kikōkeji, kebādipo na ngikadilo ya pabula bininge, kadi ketukokejapo kunena’mba kebādipo bebamona. Bine, batwe bonso tufwaninwe kukulupila mudi Yehova ne mutyima wetu onso.”c

[Kunshi kwa dyani]

¹⁵ Kukulupila mudi Yehova kupitako kukulupila mu ñeni ya batwe bene, kulomba kwikala na kwityepeja. I kya mvubu ku boba bonso basaka kusangaja mutyima wa Yehova kwikala na ino ngikadila! Mwanda’ka, nansha ke wetu Leza mwine, byādi Mfumwetu Mulopwe udi peūlu pa byonso, ulombolanga kwityepeja mu muswelo wandi wa kupwāna na bipangwa byandi bya ñeni. Pa kino, tufwaninwe kwikala na kufwijako. “Wēpelula aye mwine pakubandila bintu bidi mulu ne bidi pano panshi? Utalulanga mulanda mu luvumbi.” (Mitoto 113:​6, 7) Pamwanda wa mutyima wandi wa kufwila lusa, witulekelanga bubi bwetu kupityila ku kyabuntu kyandi kilumbuluke kyāpele bantu, kitapwa kya kinkūlwa kya bulēme kya wandi Mwana muswe, Kristu Yesu. Bine tufwaninwe kwikala na kufwijako pamwanda wa kano kanye koketufwaninwe!

¹⁶ Yesu aye mwine wituvuluja’mba: “Yewa wakwilemeka ukapēlulwa, kadi yewa wa kwipelula ukalemekwa.” (Mateo 23:12) Bāna betu kebapwe kala kubatyijibwa, bafwaninwe kukimba kupebwa madyese mu kipwilo kya bukristu na kwityepeja. Eyo, bemaniji kebafwaninwepo kumona mwingilo wabo wi mwingilo wa kwitumbija nao, ino bu muswelo wibapelwe mwanda wa kuvuija mwingilo na kwityepeja, na kufwijako ne na bupyasakane, ka na mwālongele Yesu wānene’mba: “Tata wingilanga ne pano pene, ne ami nami mo monka.”​—⁠Yoano 5:17; 1 Petelo 5:​2, 3.

¹⁷ Twikalei nyeke kufwijako mu milombelo ne na kwityepeja na kuyuka’mba tudi enka pamo bwa luvumbi ku meso a Yehova. Bine tukekala na nsangaji mikatampe mpata, mwanda “lusa lwa Yehova i lwa kalā nyeke ne kunyuma kutūla ne kukalā nyeke kwa kumeso kudi boba bamwakaminwe”! (Mitoto 103:​14, 17) Shi ke pano, batwe bonso tufwaninwe kwifunda na bupyasakane Kinenwa kya Leza. Kitatyi kyotupitija mu bwifundi bwa batwe bene ne bwa mu kisaka, ne mu kupwila pamo mu kipwilo, kifwaninwe kwikala umbukata mwa kitatyi kyetu kya mvubu mikatambe ku yenga ne yenga. Mu uno muswelo, tukobaka mushipiditu wa “kuyukidija kwa Mwineukola.” Kuno “kokwimvwanija.”​—⁠Nkindi 9:⁠10.

“Mu mashinda obe onso  . . .”

¹⁸ Na kwitutelela Yehova, Nsulo ya kwivwanija, Nkindi 3:6 ubwejako na kunena’mba: “Mu mashinda obe onso, muyuke, kadi aye ukōlolanga tushinda tobe.” Kuyuka Yehova, kulomba kwikala nandi bulunda bwa pabwipi kupityila mu milombelo. Nansha ku kifuko’ka kotukekala nansha mu ngikadilo’ka yotukatanwa nayo, ka penepa, tukokeja kwisamba nandi kupityila mu milombelo. Mu mingilo yetu ya difuku ne difuku, kitatyi kyotwiteakanya mwanda wa mwingilo wetu wa busapudi, kitatyi kyotwendanga ku njibo ne njibo kukasapula Bulopwe bwandi, tufwaninwe kulombela nyeke Leza ēsele mwingilo wetu. Mu uno muswelo, kikekala kya dyese dikatampe kotudi ne kya nsangaji, ‘kunangila pamo na Leza,’ na kukulupila’mba ‘ukōlolanga mashinda etu,’ mwēkilongele na Enoka, muntu wādi wākamwa Leza, Noa, ne bene Isalela bādi na kikōkeji, kimfwa Yoshua ne Danyele.​—⁠Ngalwilo 5:22; 6:9; Kupituluka 8:6; Yoshua 22:5; Danyele 6:23; tala monka Yakoba 4:​8, 10.

¹⁹ Kitatyi kyotusenga Yehova, tufwaninwe kwikala na kikulupiji’mba ‘ndoe ya Leza ya kutabuka ñeni yonso, ikalama mityima yetu ne kufwatakanya kwetu kwine kumo mudi Kidishitu Yesu.’ (Fidipai 4:⁠7) Ino ndoe ya Leza imwekanga mu nsangaji idi mu kyetu kilungi, ikokeja kukwasha bekadi ba mu njibo kampanda botwitana nabo mu mwingilo wetu wa busapudi. (Kolose 4:​5, 6) Ikokeja kadi monka kukankamika boba bapēpwa mityima pamwanda wa kubulwa boloke kwenda kuvudilako mu ino ntanda, mu kino kyetu kitatyi, na mwikilombwela mānga ilondako ino.d

[Bilembwa bya pa Bifwatulo]

²⁰ Max Liebster, Muyuda wakibutwila wāpandile mu muswelo umweka bu kingelengele kwikalaye bu Kitapwa, wīsambila pa lwendo lwandi lwa ku kaso ka kasuku ka Nazi kobādi bepaya bantu mu bino bishima: “Twādi bafungilwe mu wagon imo yādi mikalañanye mu tujibo tutyetutye twa bantu babidi. Banshutula kala na kūlu ne kunsukumina mu kajibo kamo, mwinemwa, natēnemo muntu umo wa buloko wādi untala na meso a ndoe. Wādi mwinemwa mwanda wādi ulemeka mbila ya Leza, wātongele kwelwa mu kaso nansha ke kufwa kwine kupitako kumwanga mashi a bantu bakwabo. Wādi umo wa mu ba Tumoni twa Yehova. Bāmuyete bandi bāna, ne wandi mukaji wāipailwe. Nandi wādi ukunga enka lufu. Ano mafuku 14 a lwendo, āndetele malondololo ku milombelo yami, mwanda i umbula bwa lwine lwendo lwakukepaibwa monatēne kikulupiji kya būmi bwa nyeke.”

²¹ Kupwa kwa kukutululwa mu kaso ka kasuku ka mu Auschwitz nansha “kīna kya bantambo,” dyo dijina dyādi wīnikile kene kaso’ka, ne kupwa kubatyijibwaye, uno tutu wāsongele kaka umo Kamoni, mwine kaka’wa nandi wākutyilwe ne shandi wāsusukile bya mwiko mu kaso ka kasuku ku Dachau. Pādi shandi mu kaso, wāivwene’mba wandi mukaji ne wandi mwana wākidi nkasampe nabo bākutyilwe. Unenāmba: “Nafityilwe mutyima bininge. Penepa kala difuku dimo, ponādi ngimēne mu mulongo mwanda wa ku koya mema, nāivwene diwi dimo ditela Nkindi 3:​5, 6 . . . Dyāivwanikilwe bu diwi dyādi ditamba mūlu. Kyo kyonādi nsaka mwanda wa kukankamikwa.” Dine diwi’dya, dyādi dya muntu wa buloko mukwabo wādi utela uno vese, ino uno mwanda ulombola lupusa lwingidija Kinenwa kya Leza kotudi. (Bahebelu 4:12) Shi ke pano, tuleke diwi dya Yehova disambile na bukomo kotudi dyalelo kupityila ku kifundwa kya mwaka 1994: “Kulupila mudi Yehova ne mutyima obe onsololo.”

[Bipangujo]

1. Nkindi 3:5 yātenekele mutyima wa nsongwalume umo muswelo’ka ne i bipá’ka byālupukileko umbula mwa kitatyi kilampe?

2. I kikulupiji’ka kikokeja kubaka Nkindi 3:5 kotudi?

3. (a) I kukankamikwa’ka kotutana mu ma shapitra kitema mabajinji a Nkindi? (b) Mwanda’ka tufwaninwe kutá mutyima nakampata ku Nkindi 3:​1, 2?

4, 5. (a) I kipwano’ka kya nsangaji kisambilwepo mu Yoano 5:​19, 20? (b) I muswelo’ka wingidijibwa madingi adi mu Kupituluka 11:18-21 mu ano etu mafuku?

6. I muswelo’ka otukokeja kwitabijibwa na Leza ne na bantu?

7. Yehova wālombwele bubinebine bwandi mu miswelo’ka?

8, 9. Mwanda’ka i kya bulanda kumona’mba mu ino ntanda kemudipo kikulupiji, ne i kishīle muswelo’ka na bantu ba Yehova?

10. I kika kyākankamikile bankasampe bakristu bavule mwanda wa kwikala na kikōkeji?

11. I kika kitutakika twikale kukulupila mudi Yehova?

12. Umbula mwa myaka mivule, bakristu bālombwele kikulupiji kyabo mudi Yehova muswelo’ka?

13, 14. (a) I kwepi konka kotukokeja kutana madingi malumbuluke? (b) I kika kyotufwaninwe kwiēpeja nakyo mwanda wa kukōmena matompo?

15. I ngikadilo’ka ya bwine Leza ifwaninwe mwanda wa kusangaja Yehova?

16. Batutu bafwaninwe kukimba kupebwa madyese mu kipwilo muswelo’ka?

17. I kika kyotufwaninwe kwivuluja batwe bonso ne kiketutonwena ku mwingilo’ka?

18, 19. I muswelo’ka otukokeja kwingidija Nkindi 3:6 mu būmi bwetu ne kiketulupwila bipá’ka?

20, 21. (a) Umbula bwa kitatyi kya luzakalo lwa Nazi, ba Tumoni twa Yehova bakankamikile bakwabo muswelo’ka? (b) Diwi dya Yehova difwaninwe kulangula malanga-tyima’ka motudi?

[Bilembwa bya pa Bifwatulo]

Musapu wa Bulopwe wa nsangaji ukoka milangwe ya bantu badi na mutyima wabinebine

Mu kīpi

◻ Mu Nkindi mudi madingi a muswelo’ka?

◻ Kukulupila mudi Yehova kukokeja kwitukwasha muswelo’ka?

◻ Kulemenena kudi Yehova kushintulula kika?

◻ Mwanda’ka tufwaninwe kuyuka Yehova mu mashinda etu onso?

◻ Yehova ukōlolanga mashinda etu muswelo’ka?